१२ घर पहिरोको जोखिममा- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

१२ घर पहिरोको जोखिममा

हरिहरसिंह राठौर

धादिङ — धुनिबेसी नगरपालिका–९ खत्रीपौवा–सिस्नेखोलाका १२ घर पहिरोको जोखिममा परेका छन् । नागढुंगा–सिस्नेलोला सुरुङमार्गले सडक फराकिलो पार्ने क्रममा उपकरणहरूको प्रयोग गर्दा वर्षाका कारण गाउँ नै जोखिममा परेको हो ।

त्रिभुवन राजपथको नौबिसे–नागढुंगा सडक खण्डको खत्रीपौवाका करिब १२ घर जोखिममा परेको स्थानीय अगुवा राजीव लामाले बताए । सुरुङमार्गले सडक विस्तार गर्ने बेलामा नागरिकसँग समन्वय गरी कटिङको काम गर्दा यस्तो समस्या आएको धुनिबेसी नगरपालिकाका मेयर बालकृष्ण आचार्यले बताए ।

संघीय सरकारको मातहतमा सञ्चालन हुने आयोजनाले नागरिकलाई दुःख दिएको र कुनै पनि कार्यक्रममा नगरपालिकासँग समन्वय नगरेको मेयर आचार्यको आरोप छ । सोमबारमात्र धादिङका प्रमुख जिल्ला अधिकारी ज्ञानप्रसाद ढकालसहितको टोलीले स्थलगत निरीक्षण गरेको थियो । पहिरोको जोखिममा परेकालाई सुरक्षित स्थानमा सार्ने र यो बस्तीको घरजग्गाका लागि मुआब्जा माग गरिने नगर प्रमुख आचार्यले बताए ।

प्रकाशित : असार २३, २०७८ ०८:५७
प्रतिक्रिया
पठाउनुहोस्

मलेखु खोलाको बाढीले होटल बगायो

हृवासिन सिमेन्ट कम्पनीमा पनि क्षति
हरिहरसिंह राठौर

धादिङ — बेनिघाट रोराङ–२ ताल्तीमा बाढीले स्थानीय सिताराम गुरुङले सञ्चालन गर्दै आएको होटल बगाएको छ । अर्को २ वटा होटलमा पनि बाढी पसेको छ ।

यस्तै, हृवासिन सिमेन्टको तल्लो भागतिरका जग्गामा पनि बाढीले क्षति पुर्‍याएको स्थानीय प्रहरीले जनाएको छ । निर्माणाधीन हृवासिन सिमेन्ट कम्पनी निर्माणस्थलमा बिहीबार र शुक्रबारको भीषण वर्षा पछि बाढी पसेको हो ।

कम्पनीको छेउमै रहेको मलेखु खोलामा आएको बाढी सिमेन्ट कम्पनी भित्र पसेको छ । सिमेन्ट कम्पनीको छेउछाउमा भएको निर्माण सामाग्री समेत बगाएको छ ।निर्माणाधीन सिमेन्ट कम्पनीमा काम गर्ने चिनियाँ मजदुरहरुको आवासमा पनि बाढी पसेपछि कामदारहरुलाई सुरक्षित स्थानमा सारिएको कम्पनीका स्थानीय व्यवस्थापक तुलसी थापाले बताए ।

अघिल्लो वर्षको भन्दा ठूलो बाढी आएको स्थानीयले बताएका छन् । अघिल्लो वर्षको बाढीले पनि सिमेन्ट कम्पनीमा ठूलो क्षति पुर्‍याएको थियो ।

केही दिनदेखिको वर्षातले धादिङ जिल्लाका अधिकांश नदी तथा खोलाहरुमा बाढी आएको छ । बिहीबार बिहान त्रिशूली नदीको बाढीले गजुरी गाउँपालिका–५, घाटबेसी नजिकै निर्माणाधीन मोटरेबल पुलमुनि रोकिराखेको एक्स्काभेटर बगाएको छ ।

बेनिघाट रोराङको मलेखु खोला, गल्छीको महेश खोला, थाक्रेको आग्राखोला, धादिङबेसीको थोपलामा आएको बाढी बढ्ने क्रममा छ । खनियाबासको आशीखोला, नेत्रावतीको किन्ताङखोला, लपाङखोला, त्रिपुरासुन्दरीको माङपाङ र कास्टे लगायतका खोलाहरूमा पनि बाढी आएको छ ।

प्रकाशित : असार १८, २०७८ १४:३३
पूरा पढ्नुहोस्
प्रतिक्रिया
पठाउनुहोस्
×