हेटौंडामा डायलाइसिस केन्द्र स्थापना, नि:शुल्क सेवा सुरु
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
मकवानपुर — हेटौंडामा मिर्गौलाका बिरामीहरूका लागि नि:शुल्क डायलाइसिस सेवा सुरु भएको छ । हेटौंडा अस्पतालले दैनिक १० जनालाई सेवा दिने उद्देश्यका साथ डायलाइसिस सेवा सुरु गरेको हो ।
![](https://assets-cdn.ekantipur.com/uploads/source/ads/reward-900x100-pxl-2462024072414.gif)
![हेटौंडामा डायलाइसिस केन्द्र स्थापना, नि:शुल्क सेवा सुरु](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2021/miscellaneous/hetudadialisis-2862021103454-1000x0.jpg&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
हेटौंडा उपमहानगरपालिकाका मेयर हरिबहादुर महतले सोमबार हेटौंडा अस्पतालमा डायलासिस सेवाको शुभारम्भ गरेका थिए । हेटौंडामा डायलाइसिस गर्नुपर्ने मिर्गौलाका बिरामी पाँचसय ३७ जना रहेको अस्पतालले जनाएको छ ।
करिब ५ करोड रुपैयाँ लागतमा अस्पतालले नि:शुल्क रुपमा मिर्गौलाका बिरामीहरुलाई लक्षित गरी डायलाइसिस सेवा सुरु गरिएको हो । हेटौंडा अस्पतालमा डायलाइसिस सेवा सञ्चालनका लागि ३ वर्ष अगाडी नै तयार पारिएको भवनमा मेसिन जडान गरिएको हो ।
हेटौंडा अस्पतालमा तत्काल ५ वटा डायलाइसिस मेसिन रहेको छ । उक्त मेसिनलाई नेफ्रोलाजिष्ट डाक्टरको संयोजकत्व दैनिक २ पटक बिहान र दिउँसो सञ्चालन गरी मिर्गौलाका बिरामीहरुलाई सेवा प्रदान गरिनेछ । अस्पतालमा डायलाइसिस सेवा सञ्चालनका लागि हेटौंडा उपमहानगरपालिकाले ३ वटा, बहुराष्ट्रिय कम्पनी युनिलिभर र शिवम् सिमेन्टबाट एक/एक वटा डायलिसिस मेसिन सहयोग गरेको अस्पताल व्यवस्थापन समिति सदस्य उत्सव चौलागाईंले जानकारी दिए ।
एक महिनाभित्र थप ५ वटा डायलासिस मेसिन ल्याएर मिर्गौलाका बिरामीहरुलाई सेवा दिने मेयर महतले जानकारी दिए । ‘डायलाइसिस सेवा विस्तार गर्दै अझ सहज बनाउन उपमहानगरपालिकाले निरन्तर सहयोग गर्ने छ,’ उनले भने ।अस्पतालमा डायलाइसिस सेवा सञ्चालनको सम्पूर्ण खर्च हेटौंडा उपमहानगरपालिकाले व्यहोर्ने र स्वास्थ्यकर्मी व्यवस्थापन भने अस्पतालले गर्ने उनले बताए ।
हेटौंडामै डायलाइसिस सेवा सुरु भएपछि काठमाडौं, चितवन धाउन पर्ने बाध्यता हटेको छ । हेटौंडा अस्पतालमा यो सेवा नहुँदा मिर्गौलाका बिरामीहरु काठमाडौं, चितवनलगायतका सहरमा पुगेर डायलासिस गर्न बाध्य रहेका थिए ।
यसअघि हेटौंडामा रोटरी क्लब अफ मकवानपुरको सहयोगमा हेटौंडा–११ थानाभर्याङस्थित चुरेहिल हस्पिटलले ३ मेसिनबाट डायलाइसिस सेवा दिँदै आएको छ ।
![](https://assets-cdn.ekantipur.com/uploads/source/ads/900-x-100-0172024023126.gif)