स्थानीय तहको बजेट स्वास्थ्य र कृषि लक्षित- वाग्मती - कान्तिपुर समाचार

स्थानीय तहको बजेट स्वास्थ्य र कृषि लक्षित

केहीले कोरोना रोकथाम, विपद् व्यवस्थापन, शिक्षा र विकास निर्माणमा धेरै रकम छुट्याएका छन्
प्रदेश ब्युरो

हेटौंडा — वाग्मती प्रदेशका विभिन्न जिल्लाका अधिकांश स्थानीय तहले स्वास्थ्य, कृषि, शिक्षा र पूर्वाधारलाई प्राथमिकता दिएर आगामी आगामी आर्थिक वर्ष २०७८/७९ को नीति तथा कार्यक्रम र बजेट ल्याएका छन् । केही स्थानीय तहले कोरोना नियन्त्रण, रोकथाम र उपचारलाई समेत प्राथमिकतामा राखेर रकम छुट्याएका छन् ।

धादिङ, नीलकण्ठ नगरपालिकाको नगरसभा । तस्बिर : कान्तिपुर

मकवानपुरको बकैया गाउँपालिकाले १५ शय्याको अस्पताल बनाउन बजेट विनियोजन गरेको छ । गाउँपालिकाभित्र प्राविधिक शिक्षा निःशुल्क गर्ने जनाउँदै ६२ करोड ६३ लाख रुपैयाँ छुट्याइएको छ । जिल्लाकै मनहरी गाउँपालिकाले पनि १५ शय्याको अस्पताल बनाउने भएको छ । गाउँपालिकाका सबै घरलाई खरको छानामुक्त बनाउन जस्तापाता उपलब्ध गराउने नीति तथा कार्यक्रम पारित गरेको छ ।

यसैगरी, थाहा नगरपालिकाले ९५ करोड ६४ लाख ३२ हजार रुपैयाँ बराबरको बजेट ल्याएको छ । नगरसभाले कम्तीमा ७ लाखभन्दा माथिका योजना मात्रै सञ्चालन गर्ने नीति लिएको छ । ‘कुनै स–साना योजना सञ्चालन तथा मर्मत सम्भार गर्नुपरेमा वडा कार्यालयको लागि एकमुष्ट निःसर्त अनुदान रकम उपलब्ध गराइनेछ,’ नगर प्रमुख लवशेर विष्टले समयमै सम्पत्ति कर भुक्तानी गर्ने करदातालाई १० प्रतिशत छुट दिइने जनाए ।

रामेछापका सबै स्थानीय तहले बिहीबार आगामी आवका लागि नीति तथा कार्यक्रम र बजेट ल्याए । मन्थली नगरपालिकाले १ अर्ब ७ करोड ८५ लाखको बजेट ल्याएको छ । बजेटमा चालुतर्फ ५७ करोड र पुँजीगततर्फ ३९ करोड रुपैयाँ रहेको नगर प्रमुख रमेश बस्नेतले जानकारी दिए । उनका अनुसार यो वर्षको बजेटले नगरका मूलभूत संरचना निर्माणमा जोड दिएको छ ।

किसानलाई दूधमा अनुदान, विज्ञान विषयमा ३२ जना विद्यार्थीलाई छात्रवृत्ति, १५ शय्याको अस्पताल सञ्चालनलगायत कार्यक्रम बजेटमा समेटेको छ । रामेछाप नगरपालिकाले ६३ करोड १९ लाख रुपैयाँका योजनासहितको बजेट सार्वजनिक गरेको छ । नगर प्रमुख नरबहादुर थापामगरका अनुसार नगरले कृषि, पर्यटन र आवधिक योजनामा समावेश भएका योजनालाई प्रमुखता दिएको छ । जिल्लाको गोकुलगंगा, सुनापति र दोरम्बाले कृषि पर्यटनलाई प्रमुखता दिने गरी नीति तथा कार्यक्रम सार्वजनिक गरेका छन् ।

धादिङको नीलकण्ठ नगरपालिकाले १ अर्ब २ करोड १२ लाख ६७ हजार ५ सय २५ रुपैयाँ बजेट ल्याएको छ । पालिकावासीको जीवनस्तर उकास्न कृषि तथा पशु क्षेत्रलाई विशेष प्राथमिकतामा राखिएको छ । त्रिपुरासुन्दरी गाउँपालिकाले स्वास्थ्य, शिक्षा, खानेपानी र पूर्वाधारलाई प्राथमिकता दिएको छ ।

बजेटको अंकमात्रै पेस

असार १० भित्रमा राजस्व र व्यय (बजेट) को अनुमान पेस गर्नुपर्ने समयसीमा नगुजार्न काभ्रेका स्थानीय तहले अंक मात्रै तय गरेर आगामी आवको बजेट प्रस्तुत गरेका छन् । केही स्थानीय तहले भने नीति तथा कार्यक्रम मात्रै पेस गरेका छन् । स्थानीय तहले जेठ मसान्तसम्म एकीकृत बजेट तथा कार्यक्रम तर्जुमा गरी असार ५ सम्म कार्यपालिकाबाट स्वीकृत गराएर असार १० भित्र गाउँ वा नगरसभामा पेस गर्नुपर्ने हुन्छ ।

बिहीबार पाँचखाल नगरपालिकाले ८९ करोड ५६ लाख २८ हजार ५ सय ४३ रुपैयाँको बजेट प्रस्तुत गरेकोमा स्वास्थ्य पूर्वाधार, कृषि तथा ठूला आयोजनालाई प्राथमिकतामा राखिएको छ । नमोबुद्धमा नगर प्रमुख टंकप्रसाद शर्माले ६५ करोड ५९ लाख ४७ हजार ५ सय ३० रुपैयाँको बजेट प्रस्तुत गरे । स्वास्थ्य क्षेत्रको भौतिक सुधार र रोजगारी सिर्जना गर्ने योजनालाई प्राथमिकता दिएको उनले जनाए ।

यसैगरी, बनेपा नगरपालिकाले १ अर्ब ५५ करोड ६९ लाख ६८ हजार रुपैयाँ, मण्डनदेउपुर नगरपालिकाले ९९ करोड ५ लाख ९२ हजार १ सय ४२ रुपैयाँ, बेथानचोक गाउँपालिकाले ५२ करोड ५१ लाख ४२ हजार ५ सय १५ रुपैयाँ, रोशी गाउँपालिकाले ६४ करोड ४३ लाख ३१ हजार रुपैयाँ र खानीखोला गाउँपालिकाले ४६ करोड २८ लाख ७७ हजार ४ सय ३० रुपैयाँको बजेट ल्याएका छन् । बाँकी ४ स्थानीय तहले भने नीति तथा कार्यक्रम मात्रै पेस गरेका छन् । बजेटको तयारी अन्तिम चरणमा पुगेको ती स्थानीय तहहरूले जनाएका छन् ।

दूधमा अनुदान, एकल पुरुषलाई भत्ता

सिन्धुपाल्चोकका स्थानीय तहहरूले कृषि, युवा स्वरोजगार र विपद् व्यवस्थापनलाई विशेष प्राथमिकता दिएका छन् । इन्द्रावतीले कृषि, पूर्ण स्वरोजगार र व्यावसायिक खेतीलाई प्राथमिकता दिएको गाउँपालिका अध्यक्ष वंशलाल तामाङले बताए । ‘दूध बढी उत्पादन हुने इन्द्रावतीमा कृषकलाई प्रतिलिटर २ रुपैयाँ अनुदान, युवालाई ५० प्रतिशत ब्याज अनुदान र व्यावसायिक परियोजना सञ्चालन गर्ने युवालाई ५ लाख रुपैयाँ अनुदान दिने कार्यक्रम ल्याएका छौं,’ उनले भने । एक अर्ब १८ करोडको बजेट ल्याएको मेलम्ची नगरपालिकाले ६० वर्ष पुगेका एकल पुरुषलाई मासिक एक हजार भत्ता दिने नीति लिएको छ ।

कोरोना रोकथाम, मेलम्ची बाढी प्रभावितलाई प्राथमिकतामा राखिएको नगर उपप्रमुख भगवती नेपालले बताइन् । सुनकोसी र बाह्रबिसेले पनि कोरोना रोकथाम र अन्य विकास पूर्वाधारका परियोजनालाई नीति तथा कार्यक्रममा समावेश गरेका छन् । बाढीले क्षतिग्रस्त हेलम्बुले विपद्कै कारण गाउँसभालाई अन्तिम रूप दिन प्रस्ताव गर्ने समय कुरिरहेको छ ।

प्रकाशित : असार ११, २०७८ ०९:०७
प्रतिक्रिया
पठाउनुहोस्

अनलाइन पढाइ, फोनबाट भर्ना

कान्तिपुर संवाददाता

अर्घाखाँची — मालारानी गाउँपालिका–५, बाँगी आँटीघरकी नन्जिता अधिकारी निषेधाज्ञा सुरु भएदेखि स्कुल गएकी छैनन् । कक्षा ६ मा अनलाइनबाटै पढिन् । शिक्षकलाई फोनबाट नाम टिपाएर कक्षा ७ मा भर्ना भइन् ।

‘कोरोनाको बेला शिक्षकले स्कुल आउन हुँदैन भनेर फोनबाटै नाम टिपेर भर्ना गरिदिनुभयो । स्कुल जान नपाउँदा मन अत्तालिएको छ,’ उनले भनिन् । भर्नापछि पनि शिक्षकले अनलाइन क्लास हुने भनेको उनले बताइन् । ‘स्कुलमा गएर पढ्न पाउने दिन कहिले आउला खोइ ?,’ उनले भनिन्, ‘घरमा बसेर अनलाइन कक्षा नबुझिए पनि पढ्नैपर्ने बाध्यता छ । स्कुल जान नपाउँदा मन उकुसमुकस भएको छ ।’

अघिल्लो वर्षको शैक्षिक सत्रमा भर्ना गर्न शिक्षकले घरदैलो गर्थे । कोरोनाका कारण फोनबाट भर्ना लिएका हुन् । अहिले फोन गरेर विद्यार्थी भर्ना गर्नेको लहर चलेको छ । कोरोनाको जोखिमका कारण विद्यार्थीलाई स्कुल बोलाएर भर्ना नगरिएको शान्ति माविका प्रधानाध्यापक मानबहादुर पाण्डेले बताए । ‘फोन गरेर असार ६ गतेदेखि भर्ना गरिरहेका छौं,’ उनले भने, ‘६ सय विद्यार्थीमध्ये बुधबारसम्म ३ सय ५० जना भर्ना भए ।’ अनलाइन कक्षा प्रभावकारी हुन्छ, भर्ना गर्नूस् भनेर शिक्षकले फोन गरेको अभिभावक सीता खत्रीले बताइन् ।

‘स्कुल जान नपाएपछि छोराछोरीको पढाइ बिग्रने चिन्ता छ,’ उनले भनिन् । सदरमुकामको जनज्योति मावि स्कुल प्रशासनले हरेक कक्षामा दुई जना शिक्षकलाई जिम्मेवारी दिएर विद्यार्थीलाई फोन गर्न लगाएको छ । कक्षा ९ मा ९९ जना उत्तीर्ण विद्यार्थीमध्ये ६० जना भर्ना भइसकेको शिक्षक मोतीराज मिश्रले बताए । ६० मध्ये ४० जना विद्यार्थीलाई फोनबाट भर्ना गरिएको उनले बताए । ‘पहिलाजस्तो घरदैलो अभियान सञ्चालन गरेर विद्यार्थी भर्ना गर्न कोरोनाको जोखिम छ,’ जनज्योति माविका प्रधानाध्यापक पशुपति भुसालले भने, ‘आफ्नै स्कुलका विद्यार्थी अरू स्कुलमा गएर भर्ना नहोऊन् भनेर बारम्बार फोन र फेसबुक सम्पर्कमा रहेका छौं ।’

प्रकाशित : असार ११, २०७८ ०८:३८
पूरा पढ्नुहोस्
प्रतिक्रिया
पठाउनुहोस्
×