प्रदेश ब्युरो

पछिल्लो पटक गत फागुनमा केन्द्रीय सत्ता समीकरण बदलिएसँगै प्रदेश सरकार फेरबदलका शृंखला रोकिएका छैनन् । यसले आगामी वर्षको बजेट निर्माण प्रभावित हुने देखिएको छ । प्रदेश सरकारले असार १ मा बजेट सार्वजनिक गर्ने संवैधानिक समयसीमा आउन सातादिन मात्र बाँकी रहँदा दलहरू भने सत्ता खिचातानीमै व्यस्त छन् । सत्ताको खिचातानीले मधेश, गण्डकी, सुदूरपश्चिम र कोशी प्रदेशमा बजेट निर्माण प्रभावित हुने देखिएको छ । 

दलहरूले गठबन्धन फेर्दा संघीय सरकार मात्रै होइन, त्यसको असरले प्रदेश सरकारहरू झन् प्रभावित हुने गरेका छन् । २०७९ मंसिर ४ को निर्वाचनपछि तेस्रो पटक फेरिएको केन्द्रीय सत्ता समीकरणले देशभर २१ पटक मुख्यमन्त्री फेरबदल भइसकेका छन् । बुधबार मात्रै जनता समाजवादी पार्टी (जसपा) नेपाल नेतृत्वको मधेश सरकार ढलेको छ ।