'नीति तथा कार्यक्रम सत्तारुढ दलको एउटा गुटको जस्तो'
मकवानपुर — वाग्मती प्रदेशसभामा पेश भएको आगामी आर्थिक वर्ष २०७८/०७९ को नीति तथा कार्यक्रम असान्दर्भिक भएको गुनासो सांसदहरुले गरेका छन् ।
प्रदेश प्रमुख विष्णुप्रसाद प्रसाईंले बिहीबार सरकारको तर्फबाट सदनमा पेश गरेको नीति तथा कार्यक्रम सत्तारुढ दलको ‘एउटा गुट’को जस्तो मात्र देखिएको टिप्पणी सांसदहरुले गरेका छन् । प्रदेशसभामा नीति तथा कार्यक्रममाथि सांसदहरुले आफ्नो धारणा राख्ने क्रममा यस्तो टिप्पणी गरेका हुन् ।
‘गुटका आधारमा तयार पारिएको बहुवर्षे योजनाको सशक्त प्रतिवाद गर्नेछौं । आफ्नो पार्टीले जितेको स्थानमा मात्र बजेट पठाउने अन्य स्थानमा नपठाउने काम प्रदेश सरकारले गरिरहेको छ । यो गलत हो ।’, प्रमुख प्रतिपक्षी दल माओवादी केन्द्र संसदीय दलका नेता शालिकराम जम्कट्टेलले भने । उनले प्रदेशले चौथो पटक सुरुङमार्ग निर्माणलाई कार्यक्रममा समावेश गरेको र बहुवर्षे योजनाको मापदण्ड तयार नगरी ल्याएको दाबी गरे ।
‘सरकारले हतारमा नीति तथा कार्यक्रम र बजेट पास गर्नका लागि सांसदहरुले योजना मागेर बसेको छ ।’, जम्कट्टेलले अव्यवहारिक तथा उपलब्धिमूलक नभएका कारण नीति तथा कार्यक्रममा विमत्ति जनाउँदै समर्थन नगर्ने घोषणा समेत गरे ।
सत्तारुढ सांसद राजेन्द्र पाण्डेले सुरुङमार्ग प्राथमिकतामा राख्न नहुने र विद्युतीय बस सञ्चालन सरकारले गर्न नहुने धारणा राखे । ‘निजी क्षेत्रसँग प्रतिस्पर्धा गर्न सरकारले सक्दैन । त्यसकारण हामी जनतालाई सुविधा पुग्ने गरी काम गरौं । व्यापार व्यवसाय गर्न होइन ।’, उनले भने ।
कांग्रेस सांसद प्रभात तामाङले प्रदेश सरकारले घोषणा गरेको परियोजना बैंक, नीति तथा योजना आयोग पूर्णरुपमा असफल भइसकेको टिप्पणी गरे । ‘कोरोना महामारीलाई बेवास्ता गर्दै कर्मचारीलाई घुम्न जाने व्यवस्था मिलाउन लागिएको छ । यो गलत हो । असाध्यै कमजोर धरातलमा टेकेर नीति तथा कार्यक्रम ल्याइएको छ ।’, उनले भने ।
माओवादी सांसद लेखनाथ दाहालले प्रदेश सरकारले विगतको समीक्षा नगरी नीति तथा कार्यक्रम ल्याइएको बताए । एमाले सांसद डा. राजेन्द्रमान श्रेष्ठले हिँड्दै जाने गन्त्व्यमा नपुग्ने अवस्थामा प्रदेश सरकार पुगेको बताए । नेमकिपा सांसद सुरेन्द्रराज गोसाईंले हालसम्म तीनवटा नीति तथा कार्यक्रम खेर गइसकेको र यो पनि जाने निश्चित भएको बताए ।
विवेकशील साझा पार्टीका सांसद रमेश पौड्यालले विगतको आर्थिक वर्षहरुको समीक्षा नगरी नीति तथा कार्यक्रम ल्याइएको कारण प्रभावकारी नहुने बताए । ‘तथ्यमा आधारित भएर कार्यक्रम तयार पार्न सरकार असफल भयो । गल्ती सच्याउन, सुधारका काम गर्न नसक्दा प्रदेश सरकारले प्रभावकारी योजनाहरु ल्याउन सकेन ।’, पौड्यालले प्रदेश सरकारले खोपको आवश्यकतालाई जिम्मेवारी पूर्णरुपमा नलिएको बताए ।
प्रदेशसभा बैठकमा करिब तीन दर्जन सांसदले नीति तथा कार्यक्रममाथि आफ्नो धारणा राखेका थिए ।
प्रकाशित : जेष्ठ २८, २०७८ १८:४५