वाग्मती प्रदेशमा एमाले संसदीय बोर्ड गठन- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

वाग्मती प्रदेशमा एमाले संसदीय बोर्ड गठन

कान्तिपुर संवाददाता

मकवानपुर — वाग्मती प्रदेशमा सत्तारूढ एमालेले १५ सदस्यीय संसदीय प्रदेश बोर्ड गठन गरेको छ । प्रदेशसभास्थित एमाले संसदीय दलको कार्यालयमा शुक्रबार बसेको बैठकले गठन गरेको हो ।

मुख्यमन्त्री तथा संसदीय दलका नेता डोरमणि पौडेलको अध्यक्षतामा बसेको बैठकबाट गठित बोर्डमा एमाले संसदीय दलका नेता पौडेल, प्रमुख सचेतक केशवराज पाण्डे, प्रदेशसभा सदस्य अष्टलक्ष्मी शाक्य, राजेन्द्र पाण्डे, अरुण नेपाल, शान्ति थिङ, उर्मिला कर्माचार्य, शशिजंग थापा र सरस्वती बाटी छन् ।

बोर्डमा दलका उपनेता र सचेतक पदेन सदस्य रहने प्रमुख सचेतक केशवराजले बताए । संसदीय दलको बैठकले संसदीय दलको संशोधित विधानलाई पारितसमेत गरेको छ । ‘एमालेको आफ्नै संसदीय दलको विधान थिएन । हामी नेकपाको विधानअनुसार अगाडि बढिरहेका थियौं । पार्टी विभाजन भएपश्चात् आफ्नो विधान बनाएका हौं,’ पाण्डेले भने ।

प्रकाशित : वैशाख ४, २०७८ ०८:४०
प्रतिक्रिया
पठाउनुहोस्

सञ्चालनमा आयो नेपालगन्जको कोरोना विशेष वार्ड

रूपा गहतराज

नेपालगन्ज — बाँकेमा कारोना संक्रमण बढ्दै गएपछि नेपालगन्ज मेडिकल कलेज शिक्षण अस्पताल कोहलपुरले पुन: आईसीयु सहितको कोरोना विशेष वार्ड सञ्चालनमा ल्याएको छ ।

केही हप्तादेखि कोरोनाको संक्रमण दर ह्वात्तै बढेपछि नेपालगन्ज मेडिकल कलेजले पुन: कोभिड वार्ड सञ्चालनमा ल्याएको हो।

शुक्रबार रातिदेखि मेडिकल कलेजले कोहलपुरस्थित शिक्षण अस्पतालमा कोभिड आईसीयु र आइसोलेसन सञ्चालनमा ल्याएको हो । अस्पतालले १५ श्य्याको आईसीयू तथा ३० बेड क्षमताको आइसोलेसन वार्ड सञ्चालनमा ल्याएको हो ।

जिल्लामा कोरोना संक्रमणको दर र मृत्युु दर तीव्र रुपमा बढ्दै जान थालेपछि कोभिड आईसीयु तथा आइसोलेसन वार्ड सञ्चालनमा ल्याएको अस्पतालका सहायक निर्देशक डा. नितेशकुमार कनोडियाले बताए ।

कोरोनाको पहिलो माहामारीमा पनि कोरोना विशेष वार्ड सञ्चालन गरेको नेपालगन्ज मेडिकल कलेजले कोरोना संक्रमण दर कम भएसँगै कोभिड वार्ड हटाएको थियो ।

शुक्रबार मात्रै मेडिकल कलेजमा गरिएको परीक्षणमा ४५ जनालाई कोरोना पुष्टि भएको थियो । मेडिकल कलेजले ४५ जनाको जाँच गरेकोमा सबैमा कोरोना पुष्टि भएको हो ।

प्रकाशित : वैशाख ४, २०७८ ०८:३६
पूरा पढ्नुहोस्
प्रतिक्रिया
पठाउनुहोस्
×