१४ वर्षपछि सैलुङमा विशेष पूजा
रामेछाप — १४ वर्षपछि दोरम्बाको सैलुङ क्षेत्रमा बौद्ध धार्मिक परम्पराबमोजिम विशेष पूजा गरिएको छ ।
कोभिडका कारण विश्वमा धेरै नागरिकको अकालमा ज्यान गएको, करोडौं अस्वस्थ्य भएको र अशान्ति बढ्दै गएको बेला सबैको कल्याणका लागि विशेष पूजा गरिएको स्थानीय दावासङ्बु शेर्पाले बताए । शेर्पाका अनुसार झण्डै १४ वर्षपछि उक्त विशेष पूजा शैलुङ क्षेत्रमा आयोजना गरिएको हो । एक सातासम्म चलेको विशेष कङ्ग्युर पूजा आइतबार समापन भएको हो ।
प्रमुख लामागुरु काल्साङसहित १ सयभन्दा बढी लामागुरुहरुले कङ्ग्युर पूजामा पाठ गरेका थिए । शनिबार रामेछाप, दोलखा र आसपासका जिल्लाबाट आएका बौद्ध धर्मावलम्बीहरुले १ सय ८ वटा बौद्ध ग्रन्थ बोकेर बुद्धले पाइला टेकेको शैलुङ परिक्रमा गरेका थिए । बुद्धधर्मावलम्बीहरु काठमाडौंको स्वयम्भू पछिको बुद्धको पाइला शैलुङमा रहेको बताउँछन् ।
यसअघि शैलुङ्कै टाकुरामा पूजा गरिएको भए पनि हावापानीलाई ख्याल गरेर यो वर्ष राजभिरको पङ्खेरी गुम्बामा आयोजना गरिएको थियो । पूजाका लागि झण्डै ४० लाखभन्दा बढी खर्च लागेको शेर्पाले बताए । पूजाका लागि शैलुङलाई ध्वजा पताकाले सिंगारिएको थियो ।
