राष्ट्रिय लाइनमा जोडिँदै चाकु जलविद्युत्- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

राष्ट्रिय लाइनमा जोडिँदै चाकु जलविद्युत्

कान्तिपुर संवाददाता

सिन्धुपाल्चोक — भोटेकोसी गाउँपालिका–४ फुल्पिङकट्टी सिल्डुङमा निर्माणाधिन् २२ दशमलव २ मेगावाट क्षमताको माथिल्लो चाकु ‘ए’ जलविद्युत् आयोजनाले उत्पादन थालेको छ ।

सिन्धुकै प्रायः व्यवसायीको लगानीमा निर्मित माथिल्लो चाकु ‘ए’ जलविद्युत् आयोजना (शिवश्री हाइड्रोपावर कम्पनी लिमिटेड) ले शुक्रबारबाट ८ मेगावाट विद्युत् उत्पादन थालेको हो ।

भोटेकोसी गाउँपालिका अध्यक्ष राजकुमार पौडेलसहित अन्य स्थानीयले विद्युत्गृहमा पानी पठाएर शुक्रबार शुभारम्भ गरे । २२ दशमलव २ मेगावाट क्षमता भए पनि अहिले ८ दशमलव २५ मेगावाट उत्पादन गरिएको शिवश्री हाइड्रोपावर कम्पनीका अध्यक्ष बच्चु पौडेलले जानकारी दिए । एक साताभित्र राष्ट्रिय प्रसारण लाइनमा यहाँको बिजुली जोडिँदै छ । ‘आयोजनाको सम्पूर्ण प्राविधिक मर्मत र विवाद सकाएर आयोजनाले विद्युत् उत्पादन थालेको छ,’ उनले भने, ‘एक साताभित्र राष्ट्रिय प्रसारण लाइनमा जोडिनेछ ।’

२०६७ मा नेपाल विद्युत् प्राधिकरणसँग विद्युत् खरिद सम्झौता (पीपीए) गरिएको आयोजनाका उमेश कसजूले बताए । गत वर्ष धितोपत्र बोर्डबाट सेयर निष्कासनको अनुमति पाएपछि आयोजनाले प्रभावितलाई लक्षित १४ करोड ७६ लाख ४० हजार रुपैयाँ बराबरको १४ लाख ७६ हजार ४ सय कित्ता सेयर बिक्रीमा ल्याएको थियो ।

प्रभावित फुल्पिङकट्टी, मार्मिङ, गाती, मानेस्वाँरा, राम्चे, पांग्रेटार, टेकानपुर र धुस्कुनका बासिन्दालाई १५ दिन म्याद राखेर सेयर (आईपीओ) खोलिएको थियो । आयोजनाको लागत प्रतिमेगावाट २० करोड अनुमान गरिएको छ ।

प्रकाशित : फाल्गुन ९, २०७७ ०७:०७
प्रतिक्रिया
पठाउनुहोस्

सहुलियत ऋण वितरण सुरु

कान्तिपुर संवाददाता

रुकुम पश्चिम — रुकुम पश्चिमका किसानलाई सहुलियतपूर्ण कृषि ऋण दिन थालिएको छ । चौरजहारी नगरपालिकामा चार वटा सहकार्य समूहलाई ऋण दिएर कार्यक्रम सुरु गरिएको हो ।

प्रक्रिया पूरा गरेका सहकार्य समूहलाई राष्ट्रिय वाणिज्य बैंकका प्रमुख कार्यकारी अधिकृत कविराज अधिकारीले ऋणको स्वीकृतिपत्र हस्तान्तरण गरे ।

कृषि ऋणका लागि चौरजहारीमा १ हजार ९ वटा सहकार्य समूह गठन गरिएको छ । एउटा सहकार्य समूहमा पाँच जना सदस्य छन् । ऋणका लागि सार्वजनिक सूचना जारी गरेको नगरपालिकाले ५ हजार ४५ जना कृषक इच्छुक देखिएको जनाएको छ । एउटा समूहलाई बढीमा १० लाख रुपैयाँसम्म ऋण दिइनेछ । उक्त ऋण समूहका सदस्यले व्यक्तिगत रूपमा २ लाख रुपैयाँका दरले कृषि व्यवसायमा लगानी गर्नुपर्ने कार्यविधि बनाइएको छ । कार्यविधिअनुसार किसानलाई वार्षिक २.६१ प्रतिशत ब्याजदरमा ऋण दिइनेछ ।

नगरपालिकामा तत्कालै १ अर्ब ९० लाख रुपैयाँ ऋण लगानी हुने नगरप्रमुख विशाल शर्माले बताए । सहुलियत ऋणका लागि जिल्लाका ६ वटै स्थानीय तहले बैंकसँग सम्झौता गरेका छन् । चौरजहारी नगरपालिकामा राष्ट्रिय वाणिज्य, मुसीकोट र आठबीसकोटमा ग्लोबल आईएमई, त्रिवेणी र बाँफीकोटमा लक्ष्मी र सानीभेरीमा सनराइज बैंकले सहुलियतपूर्ण ऋण लगानी गर्न लागेका हुन् । सहकार्य समूह, सहकारी तथा व्यक्तिलाई व्यवसाय प्रवर्द्धनका लागि ऋण प्रदान गर्न थालिएको हो ।

प्रकाशित : फाल्गुन ९, २०७७ ०७:०५
पूरा पढ्नुहोस्
प्रतिक्रिया
पठाउनुहोस्
×