भरतपुरले तय गर्‍यो सात गन्तव्य

कान्तिपुर संवाददाता

चितवन — नेपाल भ्रमण वर्ष २०२० का लागि भरतपुर महानगरपालिकाले आफ्नो क्षेत्रभित्र पर्ने सात पर्यटकीय गन्तव्य तय गरेको छ । वर्ष दिनभरि गर्ने ३२ पर्यटकीय क्रियाकलापको विवरण पनि महानगरले सार्वजनिक गरेको छ । महानगर क्षेत्रभित्र विश्वप्रसिद्ध चितवन राष्ट्रिय निकुञ्जका साथै नारायणी र राप्ती नदी रहेका छन् । धार्मिक पर्यटकीय स्थल पनि प्रशस्तै छन् । 

ZenTravel

महानगरपालिकाका पर्यटन विज्ञ विश्वराज सुवेदीका अनुसार छनोटमा परेका सात गन्तव्यमा मेघौली, पटिहानी, बिसहजारी ताल, देवघाटधाम, ज्ञानेश्वर ब्लक, चौकी डाँडा र नारायणी नदी किनार क्षेत्र छन् । वन्यजन्तु अवलोकन, धार्मिक पर्यटन र पहाडी क्षेत्रको प्राकृतिक दृश्यावलोकनजस्ता विषय समेटेर पर्यटकीय गन्तव्य तय गरेको उनले बताए ।

Meroghar

मेघौली पटिहानी क्षेत्र चितवन राष्ट्रिय निकुञ्जसँग जोडिएको पर्यटकीय स्थल हो । बिसहाजरी ताल रामसार सूचीमा परेको अन्तर्राष्ट्रिय महत्त्वको सीमसार क्षेत्र हो । जहाँ चरा, जलचर र गैंडा देखिन्छन् । देवघाटधाम हिन्दुहरूको प्रख्यात पवित्र धार्मिक स्थल हो । त्रिशूली र कालीगण्डकीको संगमस्थल देवघाटमा माघे संक्रान्ति नुहाउन लाखौं मानिस आउने गर्छन् । ज्ञानेश्वर ब्लक १० वटा सामुदायिक वनको समूह हो । भरतपुरदेखि सात किलोमिटर पश्चिम मंगलपुरदेखि सुरु हुने ज्ञानेश्वर ब्लकका सामुदायिक वन नारायणी नदीको किनारमा रहेका छन् । जहाँ दुर्लभ वन्यजन्तु गैंडा प्रशस्तै छन् । बाघ पनि ओहोरदोहोर गर्ने गर्छन् । भरतपुर महानगरपालिकाको पहाडी क्षेत्र कविलासमा चौकी डाँडा रहेको छ, जहाँबाट प्राकृतिक दृश्यावलोकन गर्न सकिन्छ ।

नारायणी नदी किनारमा पनि चहलपहल बढ्दो छ । नारायणगढ पुल आसपासमा देखिएको भीडभाडलाई व्यवस्थित गर्दै सामुद्रिक किनार (सी बिच) शैलीमा यसको विकास गर्ने महानगरको योजना रहेको छ । ‘पर्यापर्यटन र संरक्षित क्षेत्रको अवलोकनका लागि एकदेखि दुई दिनको पर्यटकीय प्याकेज तय भएको छ,’ भरतपुर महानगरका प्रमुख प्रशासकीय अधिकृत प्रेमराज जोशीले भने । त्योभन्दा धेरै बस्ने पर्यटकका लागि सात दिनसम्मको प्याकेज निर्माण गरेको उनले जानकारी दिए ।

‘पर्यटकका रुचिअनुसार पर्यटकीय स्थल यहाँ छन् । त्यहीअनुरूप प्रचारप्रसार गरेर उनीहरूले चाहेको ठाउँसम्म जाने घुम्ने अवसर दिन सक्नुपर्छ,’ चितवन उद्योग संघका वरिष्ठ उपाध्यक्ष राजु पौडेल भन्छन् । पर्यटकीय गन्तव्य र प्याकेज लगभग तय भए पनि शुल्क निर्क्यौल हुन बाँकी नै छ । निजी क्षेत्रलाई समेटेर योजना बनाए भ्रमण वर्ष थप प्रभावकारी हुने भरतपुर–२२ का वडाध्यक्ष विष्णुराज महतोले बताए ।



प्रकाशित : मंसिर २२, २०७६ ०९:५३
प्रतिक्रिया
पठाउनुहोस्
ADVERTISEMENT
ADVERTISEMENT

स्तरोन्नति हुँदै हेटौंडा–काठमाडौं सडक

प्रताप विष्ट

(हेटौंडा) — हेटौंडा–भीमफेदी–कुलेखानी–सिस्नेरी हुँदै दक्षिणकाली निस्कने सडकलाई प्रदेश सरकारले स्तरोन्नति गर्ने भएको छ । हेटौंडा–सिस्नेरी हुँदै दक्षिणकालीसम्मको सडक स्तरोन्नति गर्न विभिन्न खण्डमा विभाजित गरेर केही खण्डको टेन्डर आह्वान भइसकेको छ । केही खण्डको सर्भे भइरहेको छ । केही खण्डमा भने काम नै सुरु भइसकेको छ । 

कुलेखानीको हेभीदेखि सिस्नेरीसम्मको ६ किलोमिटर सडकमा स्तरोन्नतिको काम भइरहेको छ । उक्त खण्डको सबैभन्दा जोखिम र साँघुरो भीमफेदी–कुलेखानी सडकको प्रदेश सरकारले टेन्डर आह्वान गरिसकेको छ । ‘१६ किलोमिटर लामो उक्त जोखिमयुक्त सडकको मोड सुधार गर्ने, सम्भव भएको स्थानमा सडक फराकिलो पार्ने र कालोपत्रे गर्ने कार्यका लािग टेन्डर सार्वजनिक गरिसकेका छौं,’ प्रदेश ३ को भौतिक पूर्वाधार विकास मन्त्रालयका इन्जिनियर सहदेव भण्डारीले बताए ।’ टेन्डर स्वीकृत हुनेबितिक्कै काम थाल्ने उनको भनाइ छ । उक्त सडकखण्डको चौडाइ ६ मिटर बनाउने योजना छ ।

भौतिक पूर्वाधार विकास मन्त्रालयले सिस्नेरीदेखि दक्षिणकालीसम्मको सडक र भैंसेदेखि भीमफेदीसम्मको सडक स्तरोन्नति गर्न प्राविधिकबाट धमाधम सर्भे गराइरहेको छ । भीमफेदी–कुलेखानी खण्डमा सुरुङमार्ग निर्माण नभएसम्म प्रदेश र संघीय राजधानीको आवतजावत सहज बनाउन उक्त सडकको स्तरोन्नति गर्न लागेको मन्त्रालयका सचिव तेजराज भट्टले बताए । ‘भीमफेदी–कुलेखानी सुरुङमार्ग खन्न आगामी फागुन महिनासम्ममा टेन्डर आह्वान गर्नेछौं,’ उनले भने, ‘सुरुङमार्ग बन्नुअघिसम्मलाई सहज बनाउन भीमफेदी–कुलेखानी साँघुरो र जोखिमयुक्त खण्डको १६ किलोमिटर स्तरोन्नतिसहित कालोपत्रे गरेर आउजाउ सहज बनाउने छौं ।’ हेटौंडा र काठमाडौं आवतजावत गर्ने छोटो दूरीको उक्त सडक स्तरोन्नति सुरु भएपछि पूर्ण रूपमा सवारीसाधन सञ्चालनमा रोक लगाउने मन्त्रालयले जनाएको छ ।

उक्त मन्त्रालयको समेत जिम्मेवारी सम्हाल्दै आएका मुख्यमन्त्री डोरमणि पौडेलले हेटौंडाबाट राजधानी प्रवेश गर्ने विकल्पका सडकहरूको स्थलगत अध्ययन गर्न थालेका छन् । उनले शुक्रबार कोगटे–इपा सडकको निरीक्षण गरे । स्तरोन्नतिको काम सुरु भएपछि त्यहाँ गुड्ने सवारीसाधनलाई कान्ति राजपथ र भीमफेदी–कोगटे–इपा हुँदै सिस्नेरी निस्केर दक्षिणकाली पुगिने सडक प्रयोग गराउने योजना रहेको उनको भनाइ छ ।

२५ करोड ९९ लाख लागतमा निर्माण सुरु भएको सडकको लम्बाइ भीमफेदीदेखि सिस्नेरीसम्म साढे २३ किलोमिटर छ । ०७५ मंसिर २५ गते टेन्डर भएको उक्त सडक १८ महिनामा सम्पन्न गरिसक्नुपर्ने सम्झौता छ ।

प्रकाशित : मंसिर २२, २०७६ ०९:५३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×