प्रदेश सरकारले २२ सय ४६ घर निर्माण गर्ने

गत आवमा जनता आवास निर्माणका लागि प्रदेश सरकारले २८ करोड ४४ लाख ७४ हजार बजेट विनियोजन गरेकोमा १३ करोड ४२ लाख ५८ हजारमात्र खर्च भएको थियो । चालू आवमा मकवानपुर जिल्लामा ६ सय ५०, चितवनमा ७ सय ६६, सिन्धुपाल्चोकमा ५०, काभ्रेमा ५०, दोलखामा ५०, सिन्धुलीमा ५०, रामेछापमा ५०, नुवाकोटमा २ सय, धादिङमा ३ सय ३० र रसुवामा ५० वटा घर निर्माण गर्ने योजना रहेको छ । यसैगरी काभ्रेमा ज्येष्ठ नागरिक भवन निर्माणका लागि प्रदेश सरकारले यस आवमा १ करोड बजेट विनियोजन गरेको छ । गत आर्थिक वर्षमा प्रदेश सरकारले उक्त भवन निर्माणका लागि ३ करोड बजेट विनियोजना गरेको भए पनि कुल १ करोड ५७ लाख ४३ हजारमात्र खर्च भएको थियो । प्रदेश सरकारले जनता आवास निर्माण कार्य प्रभावकारी बनाउन काठमाडौं, मकवानपुर, चितवन, नुवाकोट, काभ्रे र सिन्धुलीमा भवन कार्यालय स्थापना गरी कार्य सञ्चालन गरिरहेको छ ।

प्रदेश सरकारलाई संघले जिम्मेवारी हस्तान्तरण गरेसँगै जनता आवास कार्यक्रमको कार्यविधि बनाई प्रदेशले सञ्चालन गरिरहेको छ । २०७४ साउन २२ गतेभन्दा अगाडि छनोट भएका लाभग्राहीहरूले आवास कार्यक्रमबाट अनुदान प्राप्त गरेका छन् । नेपाल सरकारले गरिब, दलित, लोपोन्मुख, सीमान्तकृत तथा विपन्न नागरिक लक्षित गरी जनता आवास कार्यक्रम ल्याएको हो । प्रदेश सरकारले हाल ३ किस्तामा आवास निर्माण रकम उपलब्ध गराउँदै आएको छ । लाभग्राही सूचीमा रहेकाहरूले कुल ३ लाख ५० हजार रकम अनुदान प्राप्त गर्नेछन् ।

सरकारले पहिलो किस्ताबापत् २५ प्रतिशत, जगको काम भएपछि ६० प्रतिशत र घरमा झ्याल, ढोका र अन्य काम सम्पन्न भएपछि १५ प्रतिशत रकम उपलब्ध गराउँदै आएको छ । यसैगरी प्रदेश सरकारले काठमाडौं जिल्लाका बस्ती व्यवस्थित गर्न सहरी गरिब एवं न्य्नू आय भएका परिवारका लागि अपार्टमेन्ट निर्माणका लागि १ करोड बजेट विनियोजन गरेको छ ।

जनता आवास कार्यक्रम जनशक्ति अभाव, कार्यविधि र कर्मचारी हेरफेरले गर्दा पनि प्रभावकारी बन्न नसकेको छैन । संघ, प्रदेश र स्थानीय तहको संरचनापछि मन्त्रालयले समन्वय गर्ने काम गर्दै आएको आवास निर्माणका इन्जिनियर खतिवडाले बताए । जिल्लामा भएको भवन शाखाले कुन क्षेत्रमा निर्माण भएको हो, त्यसको किस्ता रकम दिनेसँगै अनुगमन, प्रगति विवरणको प्रतिवेदन तयार गर्नुपर्छ ।

भौतिक मन्त्रालयले दिएको जानकारी अनुसार जनता आवास निर्माण कार्यक्रमको कार्यविधि संशोधन गर्ने तयारी भइरहेको छ । मकवानपुरमा ६ सय ५० घर निर्माण हुन बाँकी रहेका छन् । यसका लागि १५ करोड रकम चालू आर्थिक वर्षमा छुट्याइएको छ ।