तातोपानीमा नुहाउनेको भीड

कान्तिपुर संवाददाता

सिन्धुपाल्चोक — शरीरको छालासम्बन्धी विभिन्न रोग निको हुने विश्वासमा अहिले भोटेकोसी गाउँपालिका—२, तातोपानीस्थित तातोपानी धारामा नुहाउनेको भीड बढेको छ ।

चीन जोड्ने सस्माक्षेत्र तातोपानी बजारमा रहेको अविरल तातोपानी धारामा सडक, बिजुली, होटलजस्ता सबै पूर्वाधार सहज भएपछि नुहाउन आउने तीर्थालु र पर्यटक बढेको हो ।

काठमाडौं भक्तपुरबाट परिवारसहित आएका सुरबहादुर श्रेष्ठलेआफ्नो छालासम्बन्धी रोगका लागि तातोपानी धारामा नुहाउन आएको बताए । ‘यहाँ नुहाएर छाला, हड्डीको समस्या निको भएको मान्छे भेटे, त्यसैले पनि परिवारसँगै नुहाउन भनेर आएको हुँ, साह्रै आनन्द लागेको छ,’ तातोपानी धारामा नुहाइरहेका उनले भने । शरीरको हाडजोर्नी र छाला दुखेपछि उनले स्वास्थ्यकर्मीको सल्लाह पनि लिएको सुनाए ।

तातोपानी धारामा नुहाएर फर्केका धेरैको अनुभव सुनेपछि श्रेष्ठ प्रयोगात्मकका लागि भने पनि परिवारसाथ आए । छिमेकीको दस जनाको समूहसँगै तातोपानी नुहाउन आएका चितवन गवाईका महेश भण्डारीले तातोपानीमा नुहाएपछि शरिर हलुका भएको महसुस गरे । ‘शरीरको माथिल्लो भाग दुखिरहन्थ्यो, नुहाएपछि एकदमै फुर्तिलो लागिरहेको छ, साँच्चिकै नुवाएलगत्तै दुखाइ हराएको छ,’ उनले भने ।

प्राकृतिक रूपले नै ४४ डिग्री सेन्टिग्रेडको तातोपानी आउने यहाँको पानीमा स्नान गर्न भनेर आउने विदेशीभन्दा स्वदेशीको संख्या दिनहुँ बढ्दो छ । दिनहुँ तीन सयभन्दा बढी पर्यटक नुवाएर फर्कने भएकाले त्यसको व्यवस्थापनमा जुटिरहेको तातोपानी धारा निर्माण सुधार समितिका अध्यक्ष अमृत खड्काले बताए । ०५० देखि हालसम्म अध्यक्ष बनेका खड्काका अनुसार पारिवारिक, सामूहिक रूपमा नुहाउन ७ वटा धारामध्ये महिला र पुरुषको लागि अलग रहेको छ । ‘बाथरोगी, अलग्गै नुवाउन इच्छुकलाई स्विमिङ पुलको समेत व्यवस्था गरिएको छ,’ उनले भने ।

भूकम्पअघि तातोपानीको बाटो प्रयोग गरेर वार्षिक ५० हजारभन्दा बढी विदेशी पर्यटक आउनेजाने गर्थे । जसमध्ये ४० हजारभन्दा बढी पर्यटक चीनका हुन्थे । तातोपानी नाका बन्द भएपछि सो बाटो भएर भारतलगायत मुलुकका तीर्थयात्रीले चीनको स्वशासित क्षेत्र तिब्बतको कैलाश मानसरोबर भ्रमण गर्न पाएका छैनन् ।

भूकम्प, भोटेकोसी बाढीपछि बर्सेनि ठूलो संख्यामा तातोपानी धारा नुवाउन आउने आन्तरिक पर्यटकको संख्यामा भारी गिरावट आएको थियो । अघिल्लो वर्ष पाँच हजार आन्तरिक पर्यटकले तातोपानी धारामा मेला भरेको तातोपानी धारा निर्माण सुधार समितिले जनाएको छ ।

‘अब भने पर्यटक आउने क्रम पुरानै अवस्थामा फर्केको छ,’ उनले भने । भूकम्प र भोटेकोसी बाढीले तातोपानीधारा क्षतिग्रस्त भएसँगै यहाँ भागभाग मच्चिएको थियो ।

प्रकाशित : कार्तिक ४, २०७६ १२:१२
ADVERTISEMENT
प्रतिक्रिया
पठाउनुहोस्

जोखिमपूर्ण ढुंगो हटाइँदा गाउँले ढुक्क

राजकुमार कार्की

(गणेस्थान, सिन्धुली) — सुनकोसी गाउँपालिका १ गणेस्थान बेसारेकी ७५ वर्षीया सुकमाया मोक्तानलाई यतिखेर सहज भएको छ । नेपालीहरूको महानचाड बडादसैंसमेत अरूको घरमा मनाउन पर्दा उनलाई कम्ता दु:ख लागेको थिएन ।

चाडबाड नै थातथलो छोडेर बाहिर मनाउन पर्ने गरी दु:ख दिने ढुंगालाई फोडेर तह लगाएपछि सुकमायालगायत सिंगो गणेस्थानवासीलाई यतिखेर शान्ति मिलेको छ ।

‘कतिखेर ढुंगा झरेर किच्ने हो भन्ने सधैंको त्रास थियो,’ सुकमायाले भनिन्, ‘अनाहकमा मरिने चिन्ताले वर्षौंदेखि हामीलाई सताइरहेको थियो । कहिले छिमेकीकोमा त कहिले ओडारमा समेत रात काटियो ।’ दसैंअगाडिको वर्षाद्ले ढुंगा उप्किएपछि बढी त्रासदीमा उनीहरू थिए । सुकमायाकै श्रीमान् ८० वर्ष पुग्न लागेका खड्गबहादुरले ढुंगाका कारण धेरै दु:ख पाएको सुनाए ।

घरको सिधा माथि जंगलमा घरभन्दा ठूलो एउटा अजंगको ढुंगा थियो । ६ दशकअघिदेखि नै गणेशस्थानमा घरजम गरेर बसेका खड्गबहादुरलाई त्यसको मतलब थिएन । उनीहरूको दैनिकी चलिरहेको थियो । ०७२ को भूकम्पले पनि ढुंगा डेग चलेको थिएन । अब ढुंगा खस्दैन भन्नेमा उनी ढुक्क थिए । तर दसैं नजिक भएको वर्षादले ढुंगा उप्किएर सरेपछि भने उनीलगायत पूरै गाउँमा सन्त्रास छायो । ‘ढुंगा २ मिटर जति सरेपछि जुनसुकै बेला खस्छ भनेर हामी त्रासमा थियौं,’ खड्गबहादुरले भने, ‘त्यो ढुंगा खसेको भए धेरै ठूलो क्षति हुने निश्चित थियो ।’

खड्गबहादुरको परिवारले घ्याम्पेखोला पारि काभ्रेको रोशी गाउँपालिकाको बाँसघारीमा रहेको सम्धीको घरमा शरण लिएर यसपालिको दसैं मनाए । अघिपछि दिउँसो काम गरेर राति छिमेकीको घरमा सुत्न जाने गरेका उनीहरू दसैं भने चिन्तामुक्त भएर मनाउन घरपरिवारका सदस्य, बस्तुभाउ र चाहिने अन्नपात, लत्ताकपडा लिएर नै घर छाडेका थिए ।

बर्दबहादुर गणका सेनाले साता लगाएर ढुंगा फोडेर गणेशस्थानलाई यतिखेर सुरक्षित बनाएको छ । फुटाएर तह नलगाउँदा स्थानीयहरू दैनिक ढुंगाको अवस्था बुझ्न जंगल जाने गर्थे ।

छिमेकी गाउँका वासिन्दा तथा सुनकोशी गाउँपालिकाका उपाध्यक्ष दिर्वुसिङ मोक्तानलाई ढुंगाका कारण गाउँ नै विस्थापित हुने सुनाएपछि स्थानीय प्रहरी चौकी हुँदै जिल्ला प्रशासन कार्यालयमार्फत सेनाको बर्दबहादुर गणमा खबर पुग्यो । बेसारे गणेस्थानका बासिन्दालाई सुरक्षित गर्न जोखिम मोलेर ढुंगा फोडेर हटाएको बर्दबहादुर गणका गणपति राजीव थापाले बताए । भन्छन्, ‘ढुंगा उप्किएर सरेकाले पार्टपार्ट गरेर फोरियो ।

एकैपटक फुटाउँदा गाउँमा क्षति हुने सम्भावना थियो ।’ अहिले गणेस्थानका २१ घरपरिवार आफन्तको शरण र ओडारको बासबाट मुक्त भएका छन् । उनीहरूले गाउँमै रहेको गणेस्थान मन्दिरमा ढुंगा झरेर घरपरिवार तथा गाउँमा क्षति नहोस् भनेर भाकलसमेत गरेका थिए । बीपी राजमार्गको नेपालथोकबाट घ्याम्पेखोला हुँदै करिब १० किलोमिटर माथितिर गएपछि गणेस्थान पुगिन्छ ।

प्रकाशित : कार्तिक ४, २०७६ १२:०५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT