महानगरले दिए करमा छुट- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

महानगरले दिए करमा छुट

सीमा तामाङ

काठमाडौँ — काठमाडौँ र ललितपुर महानगरले राजस्व बढाउन सम्पत्ति करमा लाग्ने शुल्कको १० प्रतिशतसम्म छुट दिने भएको छ । यो सुविधा असोज मसान्तसम्म रहेको महानगरले जनाएका छन् ।

सम्पत्ति कर वर्षमा एकपटक मात्र तिर्नुपर्छ । आर्थिक वर्षको सुरुवातमै सेवाग्राहीले कर नतिर्ने हुँदा सेवाग्राहीलाई आकर्षित गर्न सम्पत्ति करमा छुट दिएको काठमाडौं महानगरका राजस्व विभाग प्रमुख नुरनिधि न्यौपानेले बताए । ‘नेपालीको वर्षको अन्तिममा मात्र कर तिर्ने बानी छ,’ उनले भने, ‘त्यसैले समयमै कर तिराउनका लागि करलगायत विभिन्न शीर्षकमा छुट दिएको हो ।’ महानगरमा तिर्न बाँकी राजस्वमा लाग्ने जरिवानामा समेत छुट दिएको उनले सुनाए । सम्पत्ति करमा छुट दिए पनि व्यवसाय, मालपोत, तथा घरबहाल करमा छुट नदिएको महानगरले जनाएको छ । घरबहाल कर ढिला तिरेमा जरिवाना लिने व्यवस्था पनि नभएको महानगरका प्रवक्ता ईश्वरमान डंगोलले बताए । ‘पहिलेदेखि बहाल करमा जरिवाना लिने व्यवस्था छैन,’ उनले भने । आर्थिक वर्षको सुरुवातमै सेवाग्राहीले कर तिर्ने हो भने करबापत् उठेको रकम महानगरले अन्य विकासका काममा खर्च गर्न पाउने भएकाले सम्पत्ति करमा छुट दिइएको उनले बताए । महानगरले ०७५/७६ मा ६८ करोड रुपैयाँ सम्पत्ति कर उठाएको थियो । महानगरले नक्सा पासको राजस्व मात्रै गतवर्ष १ अर्ब ७६ करोड रुपैयाँ संकलन गरेको थियो । त्यस्तै घरबाहल करबापत् १ अर्ब ३३ करोड रुपैयाँ राजस्व उठाएको महानगरले जनाएको छ । महानगरले यस वर्ष करको दरमा वृद्धि नगरे पनि सम्पत्ति करमा छुट दिएको उनले जानकारी दिए । काठमाडौं महानगरमा तिर्न बाँकी राजस्वमा लाग्ने जरिवानामा समेत छुट दिइरहेको छ ।

विभागका प्रमुख न्यौपानेका अनुसार ‘क’ वर्गका कार्ड पाएका भूकम्पपीडित अर्थात् घरधनीले पहिलेको जत्रै घर बनाउने हो भने घरको नक्सापास गर्दा लाग्ने दस्तुरमा समेत छुट दिएको छ । यदि कसैले व्यक्तिगत घर बनाउँदा नक्सापासमा पार्किङ स्थल भनी छुट्याई घर बनाउने र उक्त घरको पार्किङ स्थल सर्वसाधारणलाई उपलब्ध गराएमा यस वर्षको सम्पत्ति कर तिर्नु नपर्ने उनको भनाइ छ ।


त्यस्तै, परम्परागत शैली अपनाएर नयाँ घर बनाएमा नक्सापासमा लाग्ने दस्तुरमा समेत १० प्रतिशत छुट दिने महानगरले जनाएको छ । धारा, बत्ती जडान गर्न सिफारिस लिन आउने करदाताले २०२१ सालको नापीनक्सामा आफ्नो घर उल्लेख भएको देखाउन सके १ हजार रुपैयाँमा सिफारिस दिने छ । नयाँ तथा उक्त नक्सामा घर नदेखिएका सेवाग्राहीको हकमा भने सिफारिस लिन आउँदा ५ हजार रुपैयाँ शुल्क तिर्नुपर्ने नियम छ ।


मालपोत र व्यवसाय करमा पनि छुट


ललितपुर महानगरपालिकाले सम्पत्ति करसँगै मालपोत कर र व्यवसाय करमा लाग्ने शुल्कमा १० प्रतिशत छुट दिएको छ । करमा लाग्ने जरिवाना र तिर्नुपर्नेमा पनि १० प्रतिशत छुट दिएको ललितपुर महानगरका राजस्व महाशाखाका वरिष्ठ अधिकृत डिल्लीराज शाक्यले बताए । अघिल्ला आर्थिक वर्षर्हरूको तिर्न बाँकी करमा भने १५ प्रतिशत थप जरिवाना लाग्ने व्यवस्था गरेको छ । महानगरले घरबहाल करमा छुट नदिएको शाक्यले बताए । आर्थिक वर्ष ०७५/७६ भन्दा पहिले जरिवानाको व्यवस्था थिएन । त्यसपछिका आर्थिक वर्षमा समयमा घरबहाल कर नतिर्ने सेवाग्राहीलाई १५ प्रतिशत जरिवाना लिँदै आएको उनले बताए ।


आर्थिक वर्ष ०७४/७५ मा महानगरले कर वर्ष मनाएको थियो । त्यसबेला वर्षौंदेखि तिर्न बाँकी करमा लाग्ने जरिवाना छुट दिएको थियो । त्यसबेला बक्यौता छुटसँगै तिर्नुपर्ने करमा पनि १० प्रतिशत छुट दिइएको थियो ।


के–केमा छुट ?


काठमाडौं महानगरपालिका

  • सम्पत्ति करमा १० प्रतिशत
  • राजस्वमा लाग्ने जरिवाना
  • भूकम्पपीडितको नक्सापास
  • सर्वसाधारणलाई पार्किङ स्थल उपलब्ध गराउने गरी घर बनाएमा
  • पम्परागत शैली अपनाएर नयाँ घर बनाएमा

ललितपुर महानगरपालिका

  • सम्पत्ति, मालपोत र व्यवसाय करमा १० प्रतिशत छुट
  • २०२१ सालको नापी नक्सामा आफ्नो घर उल्लेख भएको देखाएमा १ हजारमै सिफारिस




प्रकाशित : आश्विन ३, २०७६ ०८:५८
प्रतिक्रिया
पठाउनुहोस्

तालिवान आक्रमणमा अस्पताल ध्वस्त

(एजेन्सी)

काबुल — अफगानिस्तानको दक्षिणी भेगको एक अस्पतालमा तालिवान विद्रोहीहरूले गराएको विस्फोटमा कम्तीमा १५ जनाको मृत्यु भएको छ । 

अधिकारीका अनुसार विस्फोटक पदार्थले भरिएको एक मिनी ट्रकलाई तालिवानले बिहीबार कलत सहरको एक अस्पतालअघि पड्काएका थिए । रक्षा मन्त्रालयका एक वरिष्ठ अधिकारीका अनुसार विस्फोटमा मारिनेमध्ये धेरैजसो चिकित्सक र बिरामी छन् । उक्त अस्पताल जाबुल प्रान्तको प्रमुख स्वास्थ्य संस्था रहेको बताइएको छ ।

पूर्वी अफगानिस्तानमा इस्लामिक स्टेट (आईएस) लडाकुलाई लक्षित गरी सुरक्षाकर्मीले गरेको हवाई आक्रमणमा ३० सर्वसाधारण मारिएका समाचार संस्था रोयटर्सले जनाएको छ । अफगानिस्तानमा गत महिना भएका विभिन्न घटनामा कम्तीमा ४ सय ७३ नागरिकले ज्यान गुमाएका बीबीसीको जनाएको छ ।

एक अध्ययनअनुसार अगस्ट महिनामा भएका घटनामा ४ सय ७३ जनाको मृत्यु भएको थियो । ज्यान गुमाउनेमा ५ मध्ये एक गैरसैनिक रहेको बीबीसीले जनाएको छ । घटनामा सयौं घाइते भएका थिए ।

तालिवान विद्रोहीले बिहीबारको आक्रमण आफूहरूले अस्पतालनजिकैका सरकारी गुप्तचर कार्यालयहरूलाई निसाना बनाएर आक्रमण गरेको दाबी गरेका छन् । अन्तर्राष्ट्रिय सञ्चारमाध्यमले बिहीबारको आक्रमणमा मृत्यु हुनेको यकिन तथ्यांक प्रस्ट नभइसकेको जनाएका छन् । प्रान्तीय परिषद्ले घटनामा २० भन्दा बढीको ज्यान गएको बताएका छन् । घटनामा करिब मानिस घाइते भएको बताइएको छ ।

घटनाका प्रत्यक्षदर्शीहरूले भग्नावशेषबाट महिला र बालबालिकालाई निकालिएको देखेको बताएका छन् । त्यसैगरी, बुधबार राति गरिएको हवाई हमला नान्गाहार प्रान्तमा आईएस लडाकु लक्षित आक्रमण गरिएको रक्षा मन्त्रालयलाई उद्धृत गर्दै रोयटर्सले जनाएको छ ।

नान्हारका सुरक्षा अधिकारीहरूले आक्रणमा कम्तीमा ३० सर्वसाधारणको मृत्यु भएको बताएका रोयटर्सले उल्लेख गरेको छ । खेतमा काम गर्ने किसान ड्रोन आक्रमण गरिएको समय आगो बालेर एकै ठाउँमा बसेका थिए । ४० जना घाइते छन् । घटनाबारे अनुसन्धान जारी रहेको जनाइएको छ ।

अफगानिस्तानमा गत मंगलबार आयोजित चुनावी सभामा गराइएको आत्मघाती बम विस्फोटमा कम्तीमा २४ को ज्यान गएको थियो । चुनावी सभालाई विस्फोटका समय अफगान राष्ट्रपति असरफ घानीले सम्बोधन गर्नै लागेका थिए । पछिल्लो समय अफगानिस्तान द्वन्द्व विश्वकै खतरनाक बन्दै गएको छ । तालिवान विद्रोहीले वार्ताका साथसाथै आक्रमणका घटनालाई तीव्रता दिएपछि उसको शान्तिप्रतिको इमानदारितामाथि प्रश्न उठाइएको छ ।

अफगान सरकालाई अमेरिकाको कठपुतली बताउने तालिवानले कतारको दोहामा अमेरिकी प्रतिनिधिसँग ९ चरणका वार्ता गरिसकेको छ । वार्ताका क्रममा दुई पक्षबीच अफागानिस्तानमा तैनाथ सेनामध्ये ५ हजार ४ सयलाई २० साताभित्र फर्काउने सहमति भएको थियो । सैनिक फिर्ताको बदलामा तालिवानले अमेरिका र उसका साझेदारविरुद्ध आक्रमण गर्नेहरूका लागि अफगानिस्तानलाई अखडा बन्न नदिने सुनिश्चित गरेको थियो । कतारको राजधानी दोहामा भएको वार्तापछि निष्कर्षमा दुवै पक्षबीच उक्त सहमति भएको थियो । तर काबुलमा र दुई साताअघि गराइएको विस्फोटमा एक अमेरिकी सेनासहित १२ को मृत्यु भएपछि अमेरिकी राष्ट्रपति डोनाल्ड ट्रम्पले तालिवानसँगको शान्ति सम्झौता रद्द गरेका थिए ।

ट्रम्पले अफगान राष्ट्रपति असरफ घानी र तालिवानका वरिष्ठ नेतासँग भेट्ने कार्यक्रम तय गरे पनि विद्रोहीको कार्यशैलीप्रति आपत्ति जनाउँदै रद्द गरेको घोषणा गरेका थिए । त्यसयता तालिवान समूहले आक्रमणका घटना थप बढाएका छन् । ट्रम्पको घोषणासँगै १८ वर्षदेखि अफगानिस्तानमा जारी युद्ध अन्त्यको पहल जोखिममा परेको छ ।

सन् २००१ को सेप्टेम्बर ११ मा आफ्नो देशमा आक्रमण गर्ने अल कायदालाई सुरक्षित स्थान दिएको भएको भन्दै अमेरिकाले तालिवान सरकारविरुद्ध आक्रमण गरेको थियो । त्यसयता तालिवानले हालसम्मकै सबैभन्दा धेरै क्षेत्र नियन्त्रणमा लिइसकेका छन् । हाल अफगानिस्तानको करिब ७० प्रतिशत भू–भागमा तालिवान क्रियाशील छन् ।

सन् १९९६ देखि २००१ सम्मको आफ्नो शासनकालमा महिलामाथि निर्मम व्यवहार गरेका तालिवानले धर्मसम्बन्धी कानुन कडा पारेका थिए । सन् २००१ को अमेरिकी हस्तक्षेपछि अफगानिस्तानमा गठबन्धन राष्ट्रका करिब ३ हजार ५ सय सुरक्षाकर्मीको ज्यान गइसकेको छ । त्यसमध्ये २ हजार ३ सयभन्दा बढी अमेरिकी छन् । सर्वसाधारण, लडाकु र सरकारी फौजको मृत्युको भने यकिन तथ्यांक छैन ।

सन् २०१९ को फेब्रुअरीमा सार्वजनिक एक प्रतिवेदनअनुसार युद्धका कारण ३२ हजार सर्वसाधारणले ज्यान गुमाइसकेका छन् । ब्राउन विश्वविद्यालयस्थित वाट्सन इन्स्टिच्युटका अनुसार ५८ हजार सुरक्षाकर्मी तथा ४२ विद्रोही युद्धका क्रममा मारिइसकेका छन् ।

प्रकाशित : आश्विन ३, २०७६ ०८:५४
पूरा पढ्नुहोस्
प्रतिक्रिया
पठाउनुहोस्
×