घिमिरेलाई अन्तर्राष्ट्रिय अवार्ड
रामेछाप — सहकारीको क्षेत्रमा उत्कृष्ट योगदान गरेबापत रामेछापको मन्थली बचत तथा ऋण सहकारी संस्थाका सचिव गोविन्दप्रसाद घिमिरेले अन्तर्राष्ट्रिय अवार्ड प्राप्त गरेका छन् । घिमिरेलाई भारतको हिमाचल प्रदेशको भुट्टीको विवर्स सोसाईटीले उक्त अवार्ड प्रदान गरेको हो ।
हिमाचलको कुल्लु जिल्लामा बुधबार आयोजित एक कार्यक्रममा घिमिरेलाई कुल्लु जिल्लाकी डेपुटी कमिसनर डा. ऋचा शर्माले नगद पुरस्कारसहित उक्त अवार्ड प्रदान गरेकी थिइन् ।
करिब ३० वर्ष रामेछापको ग्रामीण क्षेत्रमा सहकारी व्यवसायमार्फत सदस्यहरुको आर्थिक सबलीकरणमा घिमिरेले उल्लेख्य योगदान गरेकोले पुरस्कार प्रदान गरिएको शर्माले बताइन् । कार्यक्रममा भारतका विभिन्न प्रान्तमा रहेर पत्रकारिता, कला, साहित्य, स्वास्थ्य, उद्योग/व्यवसाय, सीप अभिवृद्धिको काम गर्ने १० जनालाई राष्ट्रिय अवार्डद्वारा सम्मान गरिएको थियो ।
