छुट्टाछुट्टै दुर्घटनामा ३ को मृत्यु

नगेन्द्र अधिकारी

काभ्रे — आइतबार काभ्रेमा भएका छुट्टाछुट्टै सवारी दुर्घटनामा ३ जनाले ज्यान गुमाएका छन् । साँगाबाट बनेपातर्फ आउँदै गरेको बा ९९ प ३३०७ नम्बरको स्कुटरले सोही दिशाबाट आइरहेको बा ६ ख ७३१५ नम्बरको ट्रकलाई बनेपा–१० भैंसेपाटीमा ओभरटेक गर्ने क्रममा पछाडिको भाग ठोक्किँदा स्कुटरमा सवार अन्दाजी २५/३० वर्षीय एक पुरुषको मृत्यु भएको प्रहरीले जनाएको छ ।

सोही घटनामा गम्भीर अर्का घाइतेको शीर मेमोरियल अस्पतालमा उपचार भइरहेको छ ।


काठमाडौंबाट बर्दिबास जाँदै गरेको ना ६२ प ७३१६ नम्बरको मोटरसाइकल रोशी –८ गिम्दीवेशीमा अनियन्त्रित हुँदा चालक नेपाली सेनाको कालिसिद्धी गण बर्दिवासमा कार्यरत अमलदार धादिङका भोजनारायण श्रेष्ठको मृत्यु भएको प्रहरीले जनाएको छ ।


आइतबार नै बनेपाबाट साँगातर्फ जाँदै गरेको बा ५७ प ९५६९ नम्बरको मोटरसाइकल विपरित दिशाबाट आउँदै गरेको बा १७ च ८११२ नम्बरको स्करपियोमा ठक्कर खाँदा मोटरसाइकल चालक बनेपा–१२ कोटथुम्काका २१ वर्षीय रविन थापाको मृत्यु भएको इलाका प्रहरी कार्यालय बनेपाले जनाएको छ । घाइते सोही स्थानका २६ वर्षीय रविन थापाको शीर मेमोरियल अस्पतालमा उपचार भइरहेको छ ।

प्रकाशित : श्रावण १९, २०७६ १५:०२
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

अरुण तेस्रोको काम २२ प्रतिशत सकियो

कान्तिपुर संवाददाता

काठमाडौँ — ९ सय मेगावाट क्षमताको अरुण तेस्रो जलविद्युत आयोजनाको काम २२ प्रतिशत सकिएको छ । आयोजनाको प्रवर्द्धक एसजेभीएन लिमिटेड (सतलज) का नवनियुक्त प्रमुख कार्यकारी अधिकृत अरुण धिमानले आइतबार उर्जा, जलस्रोत तथा सिचाईमन्त्री वर्षमान पुनलाई भेटेर आयोजनाको प्रगतिबारे जानकारी गराएका हुन् । एसजेभीएनमा भारत सरकारको पनि लगानी छ । 

भेटमा मन्त्री पुनले समयमै आयोजना सकिने अपेक्षा राखेको सचिवालयद्वारा विज्ञप्तिमा जनाइएको छ । उनले आयोजनामा समस्या देखिए सहजीकरणको लागि सरकारले सहयोग गर्ने प्रतिबद्धता जनाएको विज्ञप्तिमा उल्लेख छ ।

एसजेभीएनका नवनियुक्त प्रमुख कार्यकारी अधिकृत धिमानले आयोजना समयमै सकिन प्रतिबद्धता जनाए । उनका अनुसार सुरुङको १२ प्रतिशतसहित आयोजनाको कूल २२ प्रतिशत काम सकिएको छ । भेटमा मन्त्री पुनले सुरुङ निर्माण, आयोजनाको अवस्था, सुरक्षा व्यवस्थालगायतको बारे जिज्ञासा राखे ।

वैशाख अन्तिम साता प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीले काठमाडौंबाट भिडियो कन्फ्रेन्समार्फत आयोजनाको शिलान्यास गरेका थिए । सतलजले २०६५ साउन ३ गते आयोजना सर्वेक्षण अनुमति पाएको थियो ।

आयोजना निर्माणका लागि १ खर्ब १२ अर्ब रुपैयाँ लाग्ने अनुमान छ । पीडीए सम्झौताअनुसार नेपालले अरुण तेस्रोबाट उत्पादित बिजुलीको २१ दशमलव ९ प्रतिशत अर्थात् १ सय ९७ मेगावाट निःशुल्क पाउनेछ । बाँकी बिजुली प्रवर्द्धक कम्पनीले भारत निर्यात गर्नेछ ।

आयोजनाबाट नेपालले कुल १ खर्ब ६ अर्बभन्दा बढी रोयल्टी पाउने र ७७ अर्ब बढी राजस्व पाउने लगानी बोर्डको बोर्डको आंकलन छ । बोर्डको तथ्यांकअनुसार आयोजनाबाट नेपाललाई कुल ३ खर्ब ३८ अर्बभन्दा बढी आर्थिक लाभ हुनेछ ।

विश्वव्यापी खुला प्रतिस्पर्धाबाट सतजलले यो आयोजना निर्माणको जिम्मा पाएको हो । आयोजना संखुवासभामा पर्छ ।

प्रकाशित : श्रावण १९, २०७६ १४:३७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
×