ट्र्याक्टर दुर्घटनामा चालकको निधन

रमेशकुमार पौडेल

चितवन — खेत जोतेर फर्कँदै गरेको ट्रयाक्टर दुर्घटना हुँदा शनिबार पूर्वी चितवनको रत्ननगरमा एकजनाको ज्यान गएको छ । चितवन जिल्ला प्रहरी कार्यालयबाट प्राप्त जानकारी अनुसार रत्ननगर नगरपालिका-१६ खैरेटीमा खेत जोतेर फर्कँदै गरेको ना ७ त ४११ नम्बरको ट्रयाक्टर अनियन्त्रित भइ खेतबाट झण्डै १५ मिटर तल खसेको थियो । दुर्घटनामा घाइते चालकको उपचारको क्रममा निधन भएको हो ।

दिउँसो पौने १ बजे भएको घटनापछि चालक नारायण भन्ने झवराज न्यौपानेलाई उपचारका लागि भरतपुरको पुरानो मेडिकल कलेज ल्याइएको थियो । पौने दुई बजे उनको निधन भएको चितवन जिल्ला प्रहरी कार्यालयका प्रवक्ता प्रहरी नायब उपरीक्षक डिएसपी एकनारायण कोइरालाले जानकारी दिए । त्यसै गरी शनिबार मध्यान्ह पृथ्वीराजमार्गमा बस र ट्रिपर ठक्कर खाँदा १२ जना घाइते भएका छन् ।

इच्छाकामना गाउँपालिका-३ चुम्लिङटारमा काठमाडौंबाट दाङतर्फ आउँदै गरेको ना ७ ख ६५४४ नम्बरको बस र मुग्लिनबाट काठमाडौंतर्फ जाँदै गरेको बा ४ ख ३०३४ नम्बरको ट्रिपर पौने १२ बजे एक आपसमा ठोक्किएको प्रहरीले जनाएको छ । बसमा रहेका ३२ जना यात्रुमध्ये १२ जना सामान्य घाइते भएको प्रहरीले जनाएको छ । उनीहरुको स्थानीय मेडिकमा नै उपचार भएको छ ।

प्रकाशित : असार २८, २०७६ १५:५०
प्रतिक्रिया
पठाउनुहोस्

प्रदेश १  मा बाढीले नौको मृत्यु, सात बेपत्ता

रासस

विराटनगर — विगत चार दिनदेखि परेको अबिरल वर्षाका कारण प्रदेश १ अन्तर्गतका भोजपुर, खोटाङ, ओखलढुंगा, इलाम, झापा, सुनसरी, पाँचथर र मोरङ जिल्लामा गरी नौको मृत्यु भएको छ भने सात बेपत्ता भएका छन् । 

प्रदेश १ कार्यालय विराटनगरका अनुसार असार २६ गते भोजपुर जिल्ला रामप्रसाद राई गाउँपालिका-७ बस्ने ६६ वर्षीय जगत्बहादुर राईलाई खोलाले बगाई मृत्यु भएको छ भने सोही दिन भोजपुर जिल्लाकै ट्याम्केमयुम गाउँपालिका-९ बस्ने १४ वर्षीय जनक विकको शौचालयले पुरेर मृत्यु भएको छ ।

यसैगरी असार २७ गते खोटाङ खोटेहयाङ गाउँपालिका-२ बस्ने २८ वर्षीया रेखा राई र उहाँका छोराहरु चार वर्षीय रोमन राई र सात महीनाको रोहन राईको आफ्नै घरले किचेर मृत्यु छ । सोही दिन खोलाले बगाउँदा ओखलढुङ्गा चिसुङ्खुगढी गाउँपालिका-४ बस्ने ८५ वर्षीया पासाङपुटी शेर्पा, इलाम चुलाचुली-१ बस्ने ५० वर्षीय अञ्चल लावती र झापा दमक नगरपालिका-१० बस्ने छ वर्षीया बालिका ऐलिजा न्यौपानेको मृत्यु भएको छ ।

यस्तै असार २६ गते खोलाले बगाई बेपत्ता भएका उदयपुर घर भई इटहरी -५ सुनसरीमा बस्ने ३५ वर्षीय सागर थापा आज बिहान मृतावस्थामा फेला परेका छन् ।

कार्यालयका अनसार बेपत्ता हुनेहरुमा पाँचथर मिक्लाजुङ गाउँपालिका-४ बस्ने नौ वर्षीय दिवन राई, झापा भद्रपुर नगरपालिका-९ बस्ने ४५ वर्षीय सफल हज्दा, सुनसरी बराहाक्षेत्र-१ बस्ने १० वर्षीय अर्पन राई र मोरङ कानेपोखरी गाउँपालिका-२ बस्ने नाम, थर, वतन नखुलेका एक जनालाई खोलाले बगाई बेपत्ता बनाएको छ ।

भोजपुर रामप्रसाद राई गाउँपालिका-५ बस्ने ३५ वर्षीया मनकुमारी राई निजकै छोराहरु १७ वर्षीय शिवकुमार राई र १५ वर्षीय शक्तिकुमार राई आफ्नै भान्सा घरमा पुरिएर बेपत्ता भएका छन् ।

प्रकाशित : असार २८, २०७६ १५:४४
पूरा पढ्नुहोस्
प्रतिक्रिया
पठाउनुहोस्