थाहामा ५० प्रतिशत प्रगति- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

थाहामा ५० प्रतिशत प्रगति

कान्तिपुर संवाददाता

हेटौंडा — मकवानपुरको थाहा नगरपालिकाले चालू आवमा वित्तीय र भौतिक दुवैतर्फ ५० प्रतिशतभन्दा बढी प्रगति गरेको छ । जिल्ला समन्वय समितिले गरेको अनुगमनका क्रममा नगरपालिकाले चालू आवको फागुन मसान्त सम्ममा भौतिक र वित्तीय दुवैतर्फ ५० प्रतिशतभन्दा बढी प्रगति गरेको जानकारी दिएको छ । 



नगरपालिकाको कुल ५१ करोड १७ लाख ८ हजार बजेटमध्ये फागुन मसान्तसम्ममा २९ करोड ५५ लाख ६३ हजार निकासा भएको र २६ करोड ६६ लाख ८७ हजार रुपैयाँ अर्थात् ५२.२७ प्रतिशत खर्च भएको मेयर लवशेर विष्टले अनुगमन टोलीलाई जानकारी दिए ।


नगरपालिकालाई केन्द्रीय सरकारबाट प्राप्त ३५ करोड ६९ लाख १५ हजारमध्ये २० करोड ८६ लाख ८२ हजार अर्थात् ५८ प्रतिशत, प्रदेश सरकारबाट प्राप्त ३ करोड १० लाख २८ हजार मध्ये ४१ लाख १ हजार अर्थात् १३ प्रतिशत, आन्तरिक आयबाट प्राप्त २ करोड ९४ लाख ३५ हजारमध्ये १ करोड ८९ लाख ४ हजार अर्थात् ६४ प्रतिशत, र राजस्व बाँडफाँडबाट प्राप्त ९ करोड २८ लाख मध्ये ३ करोड ५० लाख अर्थात् करिब ३७ प्रतिशत रकम खर्च भइसकेका मेयर विष्टले बताए । उनका अनुसार समग्रमा थाहा नगरपालिकामा

५२.२७ प्रतिशत खर्च भएको छ ।


चालू आवमा नगरपालिकामा कुल ९४ वटा मात्र योजना रहेको र कुनै पनि योजना ५ लाखभन्दा कम रकमको थिएन । नगरपालिकामा रहेका भौतिकतर्फको ७४ वटा योजनामध्ये हालसम्म ७३ वटा योजना सम्झौता भइसकेका छन् । भौतिकतर्फ ६७ प्रतिशत प्रगति हासिल गरेको समेत नपाका उपमेयर खडग गोपालीले जानकारी गराएका थिए ।


थाहा नगरपालिकाले समग्रमा ५२.२७ प्रतिशत उपलब्धि हासिल गरेको भए पनि यतिमै चित्त बुझाउने अवस्था भने नरहेको मेयर विष्टले जनाए । कर्मचारी अभाव तथा विभिन्न झन्झटिला कानुनी प्रावधानका कारण सोचेअनुसारको काम भने गर्न नसकेको गुनासो उनले गरेका थिए ।


यसैगरी, न्यायिक समितिमा चालू आवमा ६१ वटा उजुरी परेको उपमेयर गोपालीले टोलीलाई जानकारी गराएका थिए । नगरपालिकामै न्यायिक इजलासको व्यवस्था रहेको र न्यायिक इजलास बस्ने निश्चित दिन तोकिएको समेत अवगत गराएका थिए । हालसम्म परेका ६१ मध्ये ५० वटा उजुरीको फर्स्योट भएको र एउटा अदालतमा पठाइएका छन् ।


जिल्ला समन्वय समितिका प्रमुख रघुनाथ खुलालले जिल्लामा हालसम्म गरिएका अनुगमनका क्रममा थाहा नगरपालिका अन्य स्थानीय तहमध्ये उत्कृष्ट पाइएको बताए । टुक्रे योजनाका कारण अन्य स्थानीय तहहरूले प्रगति राम्रो गर्न नसकेको अवस्थामा थाहा नगरपालिकाले ५ लाखभन्दा कमका योजना नबनाएर प्रगति गर्न सकेको उनको ठम्याइ थियो ।

प्रकाशित : वैशाख ३, २०७६ ०७:४१
प्रतिक्रिया
पठाउनुहोस्

तामेडाँडालाई थप सिँगारिने

टीकाप्रसाद भट्ट

रामेछाप — त्यसै त गुराँस र चिमालका थरीथरीका रंङले ढकमक्क सजिएको गमलाजस्तो तामेडाँडा लोभलाग्दो छँदै थियो । त्यसमाथि पर्यटन पूर्वाधारको विकास हुने भएपछि स्थानीय फुरुक्क छन् । अव तामे बेहुलीझैं सिंगारिनेमा उनीहरू ढुक्क छन् । 


गुराँसघारीको बीचबीचमा विशाल खर्क । हेर्दै मोहित बनाउने जमिनको आकृति । मनोरम दृश्यावलोकन हुने तामेडाँडाको पाखै गुराँसको जंगलले सजिएको छ । गौरीशंकर हिमाललाई आँखाअघि सिधा देख्न पाउने मात्र हैन, नुम्बुर चुली अनि पश्चिमको गणेशसम्म देखिने हिमाली शृंखलाले तामेडाँडाको शोभा अझ बढाएको छ ।

अघिल्ला वर्षसम्म नयाँ वर्ष मनाउनका लागि गाउँ मात्र हैन जिल्लै छोडेर बाहिरिने उत्तरी रामेछापका बासिन्दा यो वर्ष त्यही तामेमा अडिए । जति हेरे पनि हेरिरहुँ लाग्ने दृश्यले उनीहरूको आँखा औधि रमाए । ‘कस्तो राम्रो है,’ गाउँकै रमाइलो स्थानमा पहिलोपटक पुगेका स्थानीयले तामेको प्रशंसा गरिरहेका थिए ।

घरी हिमालतिर फर्केर त घरी गुराँस घारीमा फोटो खिच्नेहरूको लस्करै थियो । दिनभरि तामेमा डुल्दा पनि कतिपयले धित मार्न सकेनन् । ‘फेरि आउनुपर्छ गुराँसको फूल हुँदै,’ स्थानीय पार्वती सुनुवार भन्दै थिइन्, ‘यस्तो रमाइलो ठाउँ जति टाढा गए पनि भेटिँदैन ।’

मंसिर पुसतिर तामेको उत्तरी पाखो हुँदै चुचुरेसम्म हिउँले ढपक्क हुन्छ । रामेछापको पूर्वी क्षेत्रमा तामे र पश्चिमी क्षेत्रमा शैलुङ डाँडाँमा धेरै समय हिउँ अडिन्छ । हिउँ खेल्नेहरू तामे पुग्छन् । दक्षिणी क्षेत्रको पाखो घमाइलो छ । सूर्योदय मज्जाले देखिन्छ । ओखलढुंगाको पोकली अनि सोलुको पिके डाँडा त्यहीबाट देखिन्छ ।

‘अब हामी तामेबाटै सगरमाथा नियाल्ने गरी भ्यु टावरको निर्माण गर्ने छां,ै’ उमाकुण्ड गाउँपालिकाका अध्यक्ष शेरबहादुर तामाङले भने । उक्त डाँडाको शिरमा राष्ट्रिय झण्डा फहर्‍याउँदै सुनुवारले भने, ‘आन्तरिक मात्र हैन, बाह्य पर्यटकको गतिलो गन्तव्य बनाउनका लागि गुरुयोजना बनाएर काम अघि बढाएका छौं ।’ तामेको पश्चिमीतर्फको गाउँपालिका गोकुल गंगाका अध्यक्ष खड्गबहादुर सुनुवारले पनि गुरुयोजनाको विकासका लागि काँध मिलाएका छन् ।

दुई भाइ सुनुवारले धार्मिक, सांस्कृतिक र पर्यटकीय स्थलको रूपमा विकास गर्ने प्रतिबद्धता जनाएका छन । पूर्वाधारकै शृंखला सुरु गर्दै नयाँ वर्षका दिन उनीहरू दुई भाइले चाई मन्दिरको जगमा ढुंगा राखे ।

अब तामेमा अहिलेको स्वरुपमा हुँदैन । त्यहाँ ठूलो बुद्धको मुर्ति हुनेछ । चाई मन्दिर, भ्यु टावर, आधुनिक र व्यवस्थित पार्क अनि पूर्वी पाखोमा चिया बगान । झन्डै ३ हजार २ सय मिटरको अग्लो डाँडाको टाकुरामा राष्ट्रिय झण्डा फहर्‍याइएको छ । राष्ट्रिय झण्डाले तामे थप उचालिएको छ । अझ तामेको विकासका लागि गुरुयोजना बनाएपछि त्यसलाई सफल बनाउनका लागि आइतबार सयौं
सर्वसाधारणले अभिरुचि देखाएका हुन् ।

अब दोलखाको जिरी हुँदै सोलुतर्फ जाने पर्यटकलाई तामेमा आकर्षण गर्नका लागि सडक सुधार र तामे क्षेत्रमा पर्यटक केन्द्रित होटलको स्थापना हुनेछ । गोकुल गंगा गाउँपालिकाका अध्यक्ष सुनुवारले भने, ‘तामेले आन्तरिक र बाह्य पर्यटकहरूलाई लठ्ठै बनाउँछ, उनीहरूको बसाइ यतै लम्बिने पक्का छ ।’

उत्तरी रामेछापको नुम्बुर चिज सर्किट यसअघि पनि पर्यटक घुमाउने पदमार्गको रूपमा विकास भएको थियो । चुचुरेको शिवालय हुँदै नुम्बुर फेदी पुगेर फर्कने पर्यटक प्रीतिको लाप्चाने भएर ठोसे झर्ने गरी उक्त सर्किटको विकास भएको थियो । अब लाप्चाने हैन, तामे क्षेत्र त्यसैमा थपिने छ । लाप्चानेबाट तामे पुग्न झन्डै २ घण्टा पैदल हिँडे पुग्छ ।

हिमाली वनपाखा, शेर्पा, तामाङ र सुनुवार जातिको रहनसहन र संस्कृति अनि गाउँमै उत्पादन भएको परिकारका लागि त्यस क्षेत्र प्रख्यात छ । स्वादिलो चौंरीको चिज अनि कमलो छुर्पी चपाउँदै गुराँसको फूल सिउरिएर तामेबाट झर्दै गरेकी रस्नालुकी सुनीता सुनुवारले भनिन्, ‘नयाँ वर्षमा यसअघिको भन्दा धेरै रमाइलो भयो ।’

प्रकाशित : वैशाख ३, २०७६ ०७:४१
पूरा पढ्नुहोस्
प्रतिक्रिया
पठाउनुहोस्
×