निजी आवास निर्माणमा ५ अर्ब ६१ करोड

प्रताप विष्ट

हेटौंडा — मकवानपुरमा २०७२ को भूकम्पपछिको निजी आवास पुनर्निर्माणमा हालसम्म ५ अर्ब ६१ करोड ७ लाख रुपैयाँ खर्च भएको छ ।


चालू आवमा मात्रै जिल्लामा निजी आवासतर्फ १ अर्ब ३४ करोड १७ लाख ५० हजार रुपैयाँ खर्च भएको छ । जिल्ला आयोजना कार्यान्वयन एकाई अनुदान व्यवस्थापन तथा स्थानीय पूर्वाधार कार्यालयका प्रमुख सोमराज तिमल्सिनाले बिहीबार बसेको जिल्ला सहजीकरण समिति बैठकमा हालसम्म निजी आवासमा उक्त रकम खर्च भएको जानकारी दिएका हुन् ।

यसैगरी शिक्षातर्फ विद्यालय भवन निर्माणका लागि चालू आव ०७५/७६ मा २७ करोड रकम प्राप्त भएकोमध्ये हालसम्म करिब ६० प्रतिशत रकम खर्च भइसकेको छ ।

प्रमुख तिमल्सिनाका अनुसार जिल्लामा कुल ९० हजार ९ सय ९४ भूकम्प प्रभावित परिवारको सर्वेक्षण गरिएकामा हालसम्म निजी आवासतर्फ ३४ हजार २ सय ७८ लाभग्राही पहिचान भएका छन् । जसमध्ये २७ हजार ५ सय ५३ जनासँग अनुदान सम्झौता भएको छ । अझै ६ हजार ५ सय ५६ लाभग्राहीसँग अनुदान सम्झौता हुन बाँकी छ ।

जिल्लामा चैत २० सम्ममा पहिलो किस्ता प्राप्त गर्ने लाभग्राही २६ हजार ८ सय ८०, दोस्रो किस्ता प्राप्त गर्ने १९ हजार ८ सय ३५ तथा तेस्रो किस्ता प्राप्त गर्ने लाभग्राहीको संख्या १३ हजार ९ सय ४० छ ।

यसैगरी, जिल्लामा हालसम्म यो महिनामा पहिचान भएका ६ सय ४३ सहित १२ हजार ६ सय ४३ भूकम्प प्रभावित लाभग्राही प्रवलीकरणका लागि पहिचान भएका छन् ।

जसमध्ये ५ हजार ९ सय १२ सँग अनुदान सम्झौता भएको र ६ हजार १ सय २८ जनासँग सम्झौता हुन बाँकी रहेको छ प्रवलीकरणतर्फ पहिलो किस्ता प्राप्त गर्ने भूकम्प प्रभावित लाभग्राहीको संख्या ५ हजार ५ सय ६६ छ । जिल्लामा दर्ता भएका २३ हजार ९ सय ६१ गुनासोमध्ये सबैको गुनासो फर्स्योट भइसकेको छ । । तिम्लसिनाका अनुसार जिल्लामा हालसम्म १३ लाभग्राहीले अनुदान रकम फिर्ता गरेका छन् ।

बस्ती विकासतर्फ मकवानपुरमा जोखिमयुक्त घरधुरीको संख्या यो महिनामा १ जना थप भएर २५ को पहिचान भएको छ । पहिचान भएकामध्ये हालसम्म २० जनाले अन्यत्र जग्गा खरिद गरी स्थानान्तरण भइसकेका छन् ।

जिल्लामा १ हजार ६ सय २५ भूमिहीन लाभग्राहीले जग्गा खरिदका लागि निवेदन दिएकोमा १ सय ३८ जनालाई जग्गा खरिदका लागि स्वीकृति प्राप्त भएको कार्यालय प्रमुख तिमल्सिनाले बताए । जिल्लामा हालसम्म २६ जोखिमयुक्त घरधुरी पहिचान गरिएको छ ।

११ हजार ६ सय ८५ निजी भवन निर्माण

भूकम्पबाट क्षतिग्रस्त मकवानपुरका करिब ४४ प्रतिशत निजी आवास भवन पुनर्निर्माण गरिएको छ । मकवानपुरमा हालसम्म अनुदान सम्झौता भएका २७ हजार ५ सय ५३ लाभग्राहीमध्ये हालसम्म ११ हजार ६ सय
८५ लाभग्राहीले निजी भवन निर्माण गरिसकेका छन् ।

राष्ट्रिय पुनर्निर्माण प्राधिकरण जिल्ला सहजीकरण समितिको हरेक महिना बैठक बस्ने तथा निजी आवास पुनर्निर्माणमा आइपरेका समस्या समाधानमा सहजीकरण गर्दै स्थानीय तहसँगको समन्वयका कारण पनि अन्य जिल्लाको तुलनामा मकवानपुरमा निजी आवास पुनर्निर्माणको प्रगति राम्रो भएको दाबी गरिएको छ ।

निजी आवास पुनर्निर्माण कार्य यसै आर्थिक वर्षभित्रमा सम्पन्न गर्ने प्राधिकरणको लक्ष्यअनुसार मकवानपुरमा द्रूत गतिमा काम अगाडि बढिरहेको इन्जिनियर रविन पाठकले बताए ।

प्रकाशित : चैत्र २३, २०७५ ०८:०८
प्रतिक्रिया
पठाउनुहोस्

कोसेली बन्यो गुराँसको जुस

कान्तिपुर संवाददाता

रसुवा — लालीगुराँस फुलेर फागुन र चैतमा उच्च पहाडी क्षेत्रको अधिकांश जंगल राताम्मे हुन्छ । धेरैले लालीगुराँस हेर्छन् । फोटो खिच्छन् र आनन्द लिन्छन् । तर त्यही जंगलमा फुलेर खेर जाने गुराँसको फूलबाट यहाँका स्थानीयले राम्रो आम्दानी लिइरहेका छन् ।

वन फुलेका गुराँसलाई धुन्चेका बाबुराम श्रेष्ठले वर्षौंदेखि जुस बनाएर आम्दानीको स्रोत बनाएका छन् । गुराँसको जुस बहुउपयोगी हुने थाहा पाएपछि श्रेष्ठले दर्ता गरी उद्योग सञ्चालन गरिरहेका छन् । उनले हिमालयन फलफूल प्रशोधन केन्द्र भनेर उद्योग खोलेका छन् ।

फूल टिप्न र जुस उत्पादन गर्न उनले वन कार्यालयसँग अनुमति लिएका छन् । लाङटाङ राष्ट्रिय निकुञ्ज क्षेत्रमा भने फूल टिप्न अनुमति छैन । उनले अन्यत्रको जंगलबाट गुराँसको फूल टिपेर ल्याउने गरेका छन् । रसुवा घुम्न आउने सबैजसो पाहुनाले कोसेलीका रूपमा गुराँसको जुस लैजाने गरेको श्रेष्ठले बताए ।

गुराँसको फूलबाट बनेको जुसले जन्डिस, कलेजोसम्बन्धी रोग, घाँटी दुखाइ, मोटोपन घटाउने, मधुमेहका बिरामीलाई फाइदा पुग्ने र रगत सफाइ गर्ने चिकित्सकहरू बताउँछन् । श्रेष्ठले गुराँसको फूलसँगै डालेचुक, चुत्रो र आँपबाट जुस र वाइनसमेत उत्पादन गरिरहेका छन् ।

लालीगुराँस र डालेचुक गरी वार्षिक हजार बोतल जुस उत्पादन तथा बिक्री हुने गरेको छ । आधुनिक उपकरण प्रयोग गरी जुस बनाउने गरिएको छ ।

जुस उत्पादन गर्न घरेलु तथा साना उद्योग विकास समिति रसुवा र हिमाली आयोजनाले आधुनिक उपकरण सहयोग गरेको छ । यो पेसामा श्रेष्ठका परिवारका सबै सदस्य लागेका छन् ।

१ लिटर गुराँसको जुसको मूल्य १ सय ५० रुपैयाँ छ । एक बोतल डालेचुकको जुसलाई ३ सय पर्छ । जुसको मुख्य बजार भनेको रसुवा, नुवाकोट र काठमाडौं हो ।

प्रकाशित : चैत्र २३, २०७५ ०८:०७
पूरा पढ्नुहोस्
प्रतिक्रिया
पठाउनुहोस्