धादिङ — जिल्ला अदालतले फरार अभियुक्त ठहर गरेका व्यक्ति २ दशकदेखि प्रमुख जिल्ला अधिकारीको चालक पदमा कार्यरत रहेको खुलेको छ । प्रजिअका चालक विक्रम प्रधान नगरकोटी फरार अभियुक्त रहेको ठहर गर्दै अदालतमा पेस गर्न ताकेता पत्र लेखिएको छ ।

जिल्ला प्रशासन कार्यालयमा नियुक्ति लिनुअघि उनी ट्रक चालक थिए । २०५२ तिर काठमाडौं बागबजारमा बटुवालाई ठक्कर दिएर मृत्यु भएको घटना पछि जिल्ला अदालत काठमाडौंले २०५३ चैत २१ गते २ महिना २ दिनको कैद सजाय सुनाएको थियो । घटनापछि फरार तत्कालिन नौबिसे ७ का नगरकोटी २०५३ मै जिल्ला प्रशाासन कार्यालयमा हलुका सवारी चालक पदमा नियुक्ती लिई ६ महिनामै स्थायी भएका थिए । अदालतको फैसला कार्यान्वयन गराउने आफनो जिम्मेवारी रहेको वताउँदै प्रजिअ भगीरथ पाण्डेले नगरकोटीलाई काठमाण्डौं अदालतमा पेश गर्न मंगलवारै प्रकृया अगाडी बढाएको वताए ।

धादिड जिल्ला अदालतले धुनीबेंसी नगरपालिकालाई खरिदार रामचन्द्र मगरलाई पनि तत्काल पेस गर्न ताकेता पत्र लेखेको छ । अशोक मगरको जाहेरीले २०५४ असार १९ गते तत्कालीन जिवनपुरका ४ वडा अध्यक्षलाई कुटपिट गरी हत्या गरेको आरोपमा खरिदार रामचन्द्रलाई २०५६ असोज १९ गते ५ महिना ११ दिन कैद सजाय फैसला सुनाएको थियो । घटनाताका रामचन्द्र तत्कालीन जीवनपुर गाउँपालिकामा कार्यालय सहयोगी पदमा कार्यरत थिए । उक्त घटनामा संलग्न अन्य १० जना अझै फरार छन् । धुनीबेंसी नगरपालिका प्रमुख बालकृष्ण आचार्यले अदालतको फैसला कार्यान्वयन गराउन आफूले सहयोग गर्ने बताए ।

जिल्लामा करिब १२ सय मुद्दाका अभियुक्तसँग १ हजार ३ सय ८० वर्ष १० महिना १४ दिन कैद असुलउपर गर्नु पर्नेमा २ सय ५३ वर्ष ५ महिना ९ दिन कैद असुलउपर गरिसकेको र ३ करोड ६६ लाख ७५ हजार २ सय ९३ रुपैयाँ असुलउपर गर्नु पर्नेमा चालु आवमा करिब ३६ लाख असुल भइसकेको छ ।