बालिका हत्या प्रकरण : छानबिन समिति जनकपुरमा- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

बालिका हत्या प्रकरण : छानबिन समिति जनकपुरमा

सुनिता बराल

महोत्तरी — महोत्तरीको बर्दिवास १४ की ६ वर्षीया बालिका गुलाबसा खातुनको हत्या र बुद्धिराज न्यौपाने (सञ्‍जय) को मृत्यु घटना छानबिन गर्न गठित समिति जनकपुर आइपुगेको छ ।

बलात्कारपछि हत्या भएकी बालिकाको न्यायको माग्दै भएको प्रदर्शनमा प्रहरी गोली लागी उपचारका क्रममा न्यौपानेको ज्यान गएको घटना छानबिन गर्न समिति प्रदेश २ मा आइपुगेको हो । मंसिर ११ गते गृह मन्त्रालयले उपसचिवको संयोजकत्वमा घटनाको सत्यतथ्य छानबिन गर्न समिति बनाएको थियो । छानबिन समिति मंगलबार जनकपुर आइपुगेको र बुधबार महोत्तरीको घटनास्थलमा पुग्ने महोत्तरीका प्रमुख जिल्ला अधिकारी कृष्णबहादुर कटुवालले जानकारी दिए ।

प्रदेश प्रहरीका एसपीसहित अनुसन्धानका उपअनुसन्धान निर्देशक र मन्त्रालयका उपसचिवबीच घटनाका विषयमा जनकपुरमा छलफल भएको कटुवालले जानकारी दिए ।

दुई प्रहरी जिल्ला तानिए

प्रहरी पनि बालिका हत्या प्रकरणमा जोडिएको आरोप स्थानीयले लगाएपछि बर्दिवासका दुई प्रहरी जिल्ला तानिएका छन् । ईलाका प्रहरी कार्यालयका प्रहरी हल्दार फूलगेन मण्डल र वीरेन्द्र सिंहलाई घटना अनुसन्धानकै क्रममा जिल्ला पुर्‍याइएको ईलाका प्रहरी कार्यालय बर्दिवासका डिएसपी राजन चापागाईंले जानकारी दिए ।

हत्या प्रकरणमा पक्राउ परेका अरुणकुमार साहसँग दुई प्रहरीको मिलेमतो रहेको स्थानीयको आरोपपछि उनीहरु जिल्ला तानिएका हुन् । अहिले जिल्लामै उनीहरुमाथि अनुसन्धान भइरहेको र थप अनुसन्धान गर्न आवश्यक परेमा प्रदेश र केन्द्रले माथि तान्न सक्ने चापागाईंले बताए ।

प्रकाशित : मंसिर १६, २०७७ १८:४५
प्रतिक्रिया
पठाउनुहोस्

बैठकको कार्यसूचीलाई लिएर नेकपा सचिवालयमा तनाव

बैठकमा दाहालप्रति ओलीको आक्रोश, 'जे मन लाग्यो त्यही बोल्न पाइन्छ ?'
बबिता शर्मा

काठमाडौँ — बैठकको कार्यसूचीलाई लिएर नेकपा सचिवालय बैठकमा अध्यक्षद्वय केपी शर्मा ओली र पुष्पकमल दाहालबीच चर्काचर्की परेको छ । मंगलबार प्रधानमन्त्रीको सरकारी निवास बालुवाटारमा बसेको बैठकको सुरुमै प्रधानमन्त्री एवं पार्टी अध्यक्ष ओलीले आजका एजेन्डा के हुन् ? भन्ने प्रश्न गरेका थिए । 

सचिवालयका एक सदस्यका अनुसार ओलीले आफूतिर लक्षित गरी प्रश्न गरेको बुझाईमा रहेका कार्यकारी अध्यक्ष दाहालले पार्टी गम्भीर मोडमा रहेको, त्यसका लागि दुई प्रस्ताव अगाडि आएको र तिनै विषय बैठकका कार्यसूची हुने बताएका थिए । ती सदस्यकाअनुसार दाहालको भनाई थियो, 'पार्टी गम्भीर मोडमा छ । समाधानका लागि हामी दुवैले प्रस्ताव पेस गरेका छौं । त्यसमै छलफल गर्ने त हो नि, कार्यसूची त्यही हो ।’

दाहालको यस्तो भनाईपछि ओलीले आरोपपत्रमा छलफल हुन नसक्ने अडान राखेका थिए । सचिवालयका ती सदस्यकाअनुसार ओलीले आक्रोशितरुपमा भनाई राखेका थिए, 'लाञ्छनापत्रमाथि छलफल हुनै सक्दैन । त्यसले पार्टीको साख गिराएको छ । बेइज्जत गरेको छ । त्यसमा मेरो उछितो काडिएको छ । त्यसमाथि छलफल हुनै सक्दैन । त्यो कसरी एजेण्डा हुन सक्छ?’ ओलीले दाहालको प्रस्तावलाई अस्वीकार गर्नुपर्ने आफ्नो लिखित प्रस्तावमै राखेका छन् ।

ती सदस्यका अनुसार यसबाहेक ओलीले बैठकमा भनेका थिए, 'पार्टी एकता गर्ने हो भने निराधार लाञ्छनापत्र फिर्ता लिएर माफी माग्नु पर्छ । बुकलेट छापेकोमा पनि माफी माग्नु पर्छ । बहुमत अल्पमत गरेर जान सकिन्नँ । त्यो महाधिवेशन पछाडि मात्रै लागू हुन सक्छ ।’

त्यसपछि फेरि बोलेका दाहालले ओलीले बैठक र अन्य नेताहरुलाई उत्तेजित पार्ने कोसिस गरेको तर आफूहरु शान्त भएर बैठकमा छलफल गर्ने बताएका थिए । सचिवालयका अर्का एक नेताका अनुसार दाहालको भनाई थियो, ‘कमरेड केपीले उत्तेजित पार्ने कुरा बोल्नु भयो । हामी उत्तेजित हुन्छौं भन्ने ठान्नु भएको होला, हामी उत्तेजित हुँदैनौं, हामी गम्भीर छौं । पार्टी एकताको रक्षा गर्ने र अहिलेको छलफललाई सकारात्मक दिशातिर लैजाने र सही निष्कर्ष निकाल्ने कुरामा गम्भीर छौं । अब छलफल गरौं ।’

ती सदस्यका अनुसार दाहाल बोल्दाबोल्दै ओली आक्रोशित हुँदै बीचमा बोलेका थिए, ‘जे मन लाग्यो त्यही बोल्न पाइन्छ ?’ त्यसपछि अरु नेताहरू पनि ओली र दाहालबीचको भनाभनमा प्रवेश गरेका थिए । केहीबेर बैठकको वातवरण नै तनावपूर्ण बनेको थियो ।

ओलीले दाहाललाई बोल्न रोकेपछि सचिवालयका अन्य सदस्यले प्रतिवाद गरेका थिए । सुरुमा प्रवक्ता नारायणकाजी श्रेष्ठले प्रतिवाद गरेको सचिवालयका ती सदस्यले बताए । 'तपाईंले बोलको हामी सबैले सुन्यौं । अर्को अध्यक्षले बोलेको सुन्न पर्दैन ? सबैलाई बोल्ने अधिकार छ । बोल्नै नदिने ? यो हुँदैन ।’

ती सदस्यका अनुसार त्यसपछि वरिष्ठ नेता माधवकुमार नेपालले प्रतिवाद गरेका थिए । ‘के हो यो ? बोल्न नदिने कुरा हुुन्छ ? सबैले कुरा राख्न पाउनु पर्छ,’ नेपालले भनेका थिए । त्यसपछि अर्का वरिष्ठ नेता झलनाथ खनाल, उपाध्यक्ष वामदेव गौतमले पनि सबैले बोल्न पाउनुपर्छ भन्दै प्रतिवाद गरेका थिए ।

त्यसपछि फेरि अध्यक्ष दाहालले बोल्न सुरु गरेको ती सदस्यले बताए । उनकाअनुसार दाहालले भनेका थिए, ‘बोल्न नदिनेमात्रै कुरा होइन, उहाँले यो प्रस्ताव यहाँ छलफल हुनै सक्दैन भन्नु भएको छ । साथीहरुको धारणा के हो राख्नु पर्‍यो ।’

त्यसपछि नेता नेपालले भनेका थिए, ‘किन नसक्नु ? सकिन्छ । यसैमा छलफल गरौं ।’ गौतमले दाहालको प्रस्तावमाथि छलफल सुरु भइसकेको बताएका थिए ।

‘कमरेड केपीले त्यसको छलफलमा भाग लिइसक्नु भएको छ । छलफल गर्न पाईदैन भन्ने कहाँ को कुरा हो ? छलफल गरौं,’ गौतमले भनेका थिए ।

ती सदस्यका अनुसार ईश्वर पोखरेलले एजेण्डाकै विषयमा बैठकमा भनेका थिए, ‘प्रस्तावमाथि छलफल हुनै पाउँदैन भन्ने भएन कम्युनिष्ट पार्टीमा । तर, यसरी प्रस्ताव प्रस्तुत नगरेको भए हुन्थ्यो । अब आरोप-प्रत्यारोप नगरिकन दुवै अध्यक्षहरु प्रस्तुत हुनुपर्छ ।’ अर्का सदस्य रामबहादुर थापाले प्रस्तावमाथि छलफल भइनैसकेको धारणा राखेका थिए ।

तर, महासचिव विष्णु पौडेलले भने दाहालको प्रस्ताव छलफल गर्ने कि नगर्ने भन्ने विवादमा बीचमा रहेर बोलेका थिए । ती सदस्यका अनुसार पौडेलले भनेका थिए, ‘छलफल गर्नी कि नगर्नी भन्नेबारे म केही भन्दिनँ ।’ त्यसपछि बल्ल बैठकमा औपचारिक रूपमा छलफल सुरु भएको थियो ।

प्रकाशित : मंसिर १६, २०७७ १८:३८
पूरा पढ्नुहोस्
प्रतिक्रिया
पठाउनुहोस्
×