नेकपाको शपथ ग्रहण कार्यक्रममा झडप, ८ जना घाइते- प्रदेश २ - कान्तिपुर समाचार

नेकपाको शपथ ग्रहण कार्यक्रममा झडप, ८ जना घाइते

भूषण यादव

वीरगन्ज — नेपाल कम्युनिष्ट पार्टी (नेकपा) पर्साको विन्दवासनी गाउँपालिकाको शपथ ग्रहण कार्यक्रममा बिहीबार दुई पक्षबीच झड्प भएको छ । झडपमा ८ जना घाइते भएका छन् । घाइतेमध्ये एक जनाको अवस्था गम्भीर रहेको प्रहरीले जनाएको छ ।

विन्दवासनी गाउँपालिका–५ परसौनी भाठामा नेकपाको गाउँपालिका कमिटीको शपथ ग्रहण कार्यक्रममा असन्तुष्ट पक्षले आफूलाई सहभागी नगराएको भन्दै विरोध जनाएका थिए । कार्यक्रमस्थलमा प्रवेश नपाएपछि भएको विवाद लाठी हानाहान भएको थियो । दुबै पक्षबाट ८ जना घाइते भएका छन् । जसमध्ये सामान्य उपचार गराएर ३ जना डिस्चार्ज भएका छन् ।

पर्सा प्रहरीका प्रवक्ता प्रहरी नायव उपरीक्षक मनोजित कुँवरले कार्यक्रमबारे प्रहरीलाई पूर्व जानकारी नगराइएकाले शपत ग्रहण कार्यक्रममा प्रहरी नपुगेको बताए । ‘झडपको खबर पाउनासाथ प्रहरी परिचालन गरिएको छ,’ उनले भने, ‘दुबै पक्ष गरी ८ जना घाइते भएका छन् । जसमध्ये एक जनाको अवस्था गम्भीर छ ।’ उनका अनुसार लाठी प्रहारबाट टाउको फुटेको परसौनीभाठा निवासी मुकेश चौरिसयाको स्वास्थ्य अवस्था गम्भीर बनेको छ । उनको वीरगन्जकै एक निजी अस्पतालमा उपचार भइरहेको छ । दुई जना घाइते उत्तम तिवारी र चिन्टु तिवारीको उपचार नेशनल मेडिकल कलेजमा भइरहेको छ ।

दुई पक्षबीच झडप भए पनि शपथ ग्रहण कार्यक्रम रोकिएन । पार्टी अध्यक्ष प्रभु हजराले दुखदायी घटना घटेको बताए । ‘विन्दवासनीमा बहुत गलत भएको छ,’ उनले भने, ‘दुई विशाल पार्टी मिलेर भएको एकतामा केही नयाँ मान्छे पनि आएका छन् । पार्टीमा अझै सिस्टम बसिसकेको छैन ।’ उनका अनुसार जिल्लामा खासै विवाद थिएन । आफू कार्यक्रमस्थल नपुग्दै झड्प भइसकेको उनले जनाए ।


प्रकाशित : कार्तिक ६, २०७७ १७:३२
प्रतिक्रिया
पठाउनुहोस्

थप अनुसन्धानका लागि २३ किलो सुन राजस्व कार्यालयमा बुझाइयो

भूषण यादव

वीरगन्ज — गत शनिबार प्रहरीले बरामद गरेको २३ किलो सुन र दुई किलो चाँदी थप अनुसन्धानका लागि राजस्व अनुसन्धान कार्यालय पथलैयामा बुझाएको छ ।

वीरगन्ज महानगरपालिका–५ रेशमकोठी स्थित श्री गणेश अपार्टमेन्टको ३०३ नम्बरको फ्ल्याटबाट प्रहरीले कात्तिक १ मा छापामारी २३ किलो दुई सय ७५ ग्राम सुन र २ किलो दुई सय ६२ ग्राम चाँदीको गर गहना बरामद गरेको थियो ।

जिल्ला प्रहरी कार्यालय पर्साका अनुसार थप अनुसन्धान र कानुनी प्रक्रियाका लागि सुन र चाँदी सोमबार राजस्व बुझाइएको हो । भारत रक्सौल कस्टमका क्लियरिङ एजेन्ट अशोक सिन्हाको छोरी वीरगन्ज–२ निवासी निवेदिका सिन्हाको नाममा उक्त फ्ल्याट दर्ता रहेको प्रहरीले जनाएको छ ।

सम्वद्ध स्रोतका अनुसार निवेदिकाको नाममा फ्ल्याट दर्ता भएपनि त्यसको प्रयोग भने अशोक सिन्हा र उनका छोरा भतिजाहरुले गर्दै आएका थिए । प्रहरी उपरिक्षक गंगा पन्तले बरामद भएको सुन र चाँदी थप अनुसन्धानका लागि राजस्व कार्यालय बुझाएको बताइन् । ‘हाम्रो पनि अनुसन्धान जारी नै रहन्छ,’ उनले भनिन्, ‘फ्ल्याट कसको नाममा दर्ता छ भन्ने कुरा बाहेक अन्य कुरा अझै खुलेका छैनन् ।’

प्रहरीले सुन चाँदी व्यवसायी संघ पर्साबाट सुन चाँदी चेकजाँच गर्ने विशेषज्ञ बोलाई परीक्षण गराउँदा बरामद गरिएका सुन र चाँदीको बजार मूल्य १८ करोड ६५ लाख रुपैयाँ बराबर रहेको पाइएको थियो ।

गत शनिबार विशेष सूचनाको आधारमा प्रहरी उपरिक्षक गंगा पन्तको नेतृत्वमा गएको टोलीले गणेश अपार्टमेन्टको ३०३ नम्बरको फ्ल्याटको दराजबाट उक्त सुन र चाँदी बरामद गरेको थियो ।

यो पनि पढ्नुहोस् :

वीरगन्जको रेशमकोठीबाट २३ किलो सुन बरामद

प्रकाशित : कार्तिक ४, २०७७ १६:२९
पूरा पढ्नुहोस्
प्रतिक्रिया
पठाउनुहोस्
×