रौतहटमा थप २४ जनामा कोरोना
रौतहट — रौतहटमा थप २४ जनामा कोरोना संक्रमण पुष्टि भएको छ । गौर नगरपालिकाका ८ जना कर्मचारीसहित १७ जनामा संक्रमण दखिएको छ । त्यस्तै परोहा नगरपालिकामा ४ जना, देबाही गोनाही, चन्द्रपुर र गढीमाई नगरपालिकामा एक/एक जनामा कोरोना संक्रमण पुष्टि भएको स्वास्थ्य कार्यालय गौरका फोकल पर्सन हरेन्द्र गुप्ताले बताए ।
‘संक्रमितको सम्पर्कमा रहेकाहरुको खोजी सुरु भइसकेको छ,’उनले भने, ‘चाँडै सबैको पहिचान गरी स्वाब संकलन गर्छौं ।’
पछिल्लो समय थपिएका संक्रमितलाई घरमै छाडिएको छ । जिल्लामा सञ्चालनमा रहेको आइसोलेसन खाली रहेपनि संक्रमितलाई समुदायमै छोड्दा झनै खतरा बढ्न सक्ने भन्दै स्थानीयले विरोध गरेका छन् । सरकारले तोकेको स्वास्थ्य सुरक्षा अपनाइ लक्षण नदेखिएका संक्रमितहरुलाई होम आइसोलेसनमा राख्न सक्ने भने पछि जिल्लामा संक्रमतिहरु घरमै बस्न थालेका हुन् ।
पछिल्लो ६ दिनमा रौतहटमा ८६ जनामा संक्रमण पुष्टि भएको छ । जिल्लामा हालसम्म १ हजार ४ सय १५ जनामा कोरोना संक्रमण पुष्टि भइसकेको छ । संक्रमतिमध्ये १ हजार ३ सय २७ जना निको भएर घर फर्किसकेका छन् । बाहिरबाट आएर क्वारेन्टाइन बस्नेको संख्या १ सय ५९ जना रहेको जिल्ला प्रशासन कार्यालयका सुब्बा रामनरेश साहले बताए ।
प्रकाशित : श्रावण ३०, २०७७ १४:४४