बारामा कोरोना पुष्टि भएकाहरु भारतबाट आएका

लक्ष्मी साह

बारा — जिल्लाको सिम्रौनगढ नगरपालिकाअन्तर्गत कंकाली माविमा रहेको क्‍वारेन्टाइनका ६ जनामा शुक्रबार कोरोना संक्रमण देखिएको छ । यो सँगै जिल्लामा संक्रमितको संख्या ११ पुगेको छ ।  

जेठ ७ गते क्‍वारेन्टाइनका १ सय ३० जनामध्ये ५० जनाको स्बाब संकलन गरी जाँचका लागि हेटौंडास्थित कीटजन्य अनुसन्धान तथा तालीम केन्द्रमा पठाइएपछि ६ जनामा कोरोना पोजेटिभ देखएको प्रमुख जिल्ला अधिकारी रूद्रप्रसाद पण्डितले बताए । पीसीआर जाँचमा पोजेटिभ देखिएका ती ६ जना भारतबाटै आई क्‍वारेन्टाइनमा थिए । उनीहरु महाराष्ट्र, हरियाणा र दिल्लीबाट आएका हुन् ।

सिम्रौनगढ नगरपालिका ७ का ३८, ४५ र ३४ वर्षीय, वडा ११ भगवानपुर रामनगर टोलका २२ वर्षीय, वडा २ का २५ वर्षीय र वडा १ का २७ वर्षीय पुरुष संक्रमित भएका हुन् । पीसीआर जाँचका लागि आवश्यक पर्ने पिभीटी किट अभावमा सिम्रौनगढ लगायत जिल्लाका धरै ठाउँका क्‍वारेन्टाइनमा भएकालाई परीक्षणका लागि स्बाब लिन समस्या भइरहेको जनस्वास्थ्य कार्यालयका प्राविधिक शंकर गुप्ताले बताए । उनले संक्रमितलाई कलैयास्थित अस्पतालको आइसोलेसनमा ल्याउने तयारी भइरहेको बताए ।

प्रकाशित : जेष्ठ ९, २०७७ २२:२६
ADVERTISEMENT
प्रतिक्रिया
पठाउनुहोस्
ADVERTISEMENT

सुदूरपश्चिमका नाकामा सम्हाल्नै गाह्रो, शुक्रबार आएका करिब १५ सयलाई परीक्षणबिनै गाउँ पठाइँदै

कैलालीको गौरीफन्टा नाकाबाट एक सातामा ५ हजारभन्दा बढी भित्रिए
मोहन बुढाऐर

धनगढी — भारतका विभिन्न सहरबाट सुदूरपश्चिमको गौरीफन्टा सीमा नाकामा दिनहुँ हजारभन्दा बढी संख्यामा नेपालीहरू आइपुग्न थालेका छन् । एक सातामा करिब ५ हजार जना भित्रिसकेका छन् । शुक्रबार मात्रै १५ सयभन्दा बढी नेपाली सीमामा आइपुगेका छन् ।


यसरी भित्रिएकालाई नाकामा परीक्षण गरिएको छैन । आरडीटी किट अभाव भएको भन्दै प्रदेश सरकारले नाकामा गरिँदै आएको परीक्षण रोकेको छ । भारतबाट भित्रिएकालाई सम्बन्धित स्थानीय तहको क्वारेन्टाइनमा बस्ने सर्तमा मात्रै स्थानीय प्रशासनले नेपाल प्रवेश गर्न दिइरहेको छ । पर्याप्त मात्रामा किट नभएकाले सीमा नाकामा परीक्षण गर्न रोकेको सुदूरपश्चिम प्रदेश स्वास्थ्य निर्देशनालयका प्रमुख डा. गुणराज अवस्थीले बताए । ‘स्थानीय तह र जिल्लामा पनि आरडीटी किट पठाएका छौं,’ उनले भने, ‘स्थानीय तहको क्वारेन्टाइनमा बस्न जाने भएकाले उतै उनीहरूको कोरोना परीक्षण गरिनेछ ।’

बुधबार र बिहीबार भित्रिएका २ हजार ४ सय ९८ जनामध्ये ७ सय ७० जनाको मात्रै आरडीटी परीक्षण गरिएको सेती अस्पतालले जनाएको छ । तीमध्ये १२ जनामा कोरोना पोजिटिभ देखिएपछि उनीहरूलाई अस्पतालको आइसोलेसन वार्डमा राखिएको छ । बाँकीलाई स्थानीय प्रशासनले परीक्षणबिनै सम्बन्धित जिल्ला पठाएको छ ।

यसअघि जेठ २ र ३ गते आएका ९ सय ५० जनालाई आरडीटी टेस्ट गरी सम्बन्धित जिल्ला पठाइएको थियो । जिल्ला प्रशासन कार्यालय कैलालीका सूचना अधिकारी शिवराज जोशीले बुधबारदेखि सीमा नाकामा भारतबाट आउने भीड सम्हाल्नै गाह्रो भएको बताए । ‘बिहीबार घर पठाउन नसकिएका ६ सय जना नाकामै थिए,’ उनले भने, ‘शुक्रबार दिउँसो फेरि १५ सय जनाभन्दा बढी आइपुगेका छन् ।’

जोशीले जेठ २ देखि ९ गतेसम्ममा नाकामा आइपुगेका ५ हजार ४ सय जनाभन्दा बढी नेपाल भित्रिएको जानकारी दिए । ‘उनीहरूलाई सम्बन्धित जिल्ला पठाउने, क्वारेन्टाइनमा राख्ने र स्वास्थ्य जाँच गर्ने काम चुनौतीपूर्ण छ,’ उनले भने, ‘तर पनि सीमामा आइपुगेकालाई प्रदेश र स्थानीय सरकारको समन्वयमा व्यवस्थित र सुरक्षित रूपमा भित्र्याउने काम गरिरहेका छौं ।’

सूचना अधिकारी जोशीका अनुसार सीमामा आइपुगेकालाई लिन प्रदेश र स्थानीय सरकारले बसको व्यवस्था गरेका छन् । ‘यहाँ आइपुगेकालाई व्यक्तिगत विवरण लिएर सम्बन्धित जिल्लामा पठाइरहेका छौं,’ उनले भने ।

प्रकाशित : जेष्ठ ९, २०७७ २२:१८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×