चोरबाटो आउनेलाई रोक्न अस्थायी पोस्ट 

अवधेशकुमार झा

राजविराज — कोभिड–१९ को संक्रमण भित्रिन नदिन सशस्त्र प्रहरी बलले भारतीय सीमाक्षेत्रमा थप कडाइ गरेको छ । नाकाहरूमा रोकिए पनि खेतको बाटो आउजाउ भइरहेको सूचना पाएपछि प्रहरीले अस्थायी पोस्ट थपिरहेको छ ।

सशस्त्र प्रहरी उपरीक्षक उद्धव न्यौपानेका अनुसार यसअघि मुख्य नाकाहरूमा सुरक्षाकर्मी राखिएकोमा अब अन्यत्र पनि पोस्ट राखिएका छन् । सशस्त्रले जिल्लाका सातवटै बीओपीमा गरी दुई सय प्रहरी थपेको छ ।


सोमबारवाट जिल्लाका ५५ स्थानमा सशस्त्र प्रहरी खटाइएका छन् । नियमित पोस्टबाहेक १६ स्थानमा पालको ब्लक बनाएर नयाँ पोस्ट बनाइएको छ । ‘मूल बोर्डर मात्र होइन, अन्य चोर बाटोबाट पनि कोही नेपाल नछिरुन् भनेर सम्भावित स्थानहरुमा सशस्त्र प्रहरी बल तैनाथ गरिएको छ,’ न्यौपानेले भने ।


क्वारेन्टाइनमा दैनिक थपिँदै

जिल्लामा बाहिरबाट आएकाहरूलाई राख्न बनाइएका क्वारेन्टाइन स्थलहरूमा दिनहुँजसो संख्या थपिँदै छ । त्यसरी आएकाहरूलाई स्थानीय बासिन्दा, जनप्रतिनिधि र प्रशासनले क्वारेन्टाइन पठाउने गरेका छन् । पहिलो दिन ३३ जना मात्र क्वारेन्टाइनमा रहेकोमा आइतबार साँझसम्म १० महिलासहित २ सय ६४ जना पुगेका छन् । जिल्लामा १८ स्थानमा रहेका क्वारेन्टाइन छन् । ती सबैमा गरी ५ सय ८० जनासम्मलाई राख्न मिल्छ ।

प्रकाशित : चैत्र २४, २०७६ ११:४९
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

२ बजे मन्त्रिपरिषद् बैठक बस्दै, लकडाउन थपिन सक्ने

बिनु सुवेदी

काठमाडौँ — लकडाउनको अवधि बढाउने लगायतका विषयमा छलफल गर्न २ बजे मन्त्रिपरिषद् बैठक बस्ने भएको छ । 

चार बजे बस्ने भनिएको बैठक २ बजेलाई सारिएको हो । सरकारले दोस्रोपटक थपेको लकडाउनको अवधि भोलि २५ गते सकिँदैछ । लकडाउन अवधि थप गर्ने कि नगर्ने भन्नेबारे आजको मन्त्रिपरिषद् बैठकले निर्णय गर्ने एक मन्त्रीले बताए । ‘एक हप्ता थपिन सक्ने सम्भावना छ,’ उनले कान्तिपुरलाई भने, ‘आजै निर्णय हुन्छ ।’

कोभिड १९ रोकथाम तथा नियन्त्रण उच्चस्तरीय समन्वय समितिको आइतबारको बैठकले भने लकडाउन थप्नेबारेमा सरकारलाई औपचारिक सिफारिस गरेको छैन । तर, बैठकपछि समितिका संयोजक उपप्रधान तथा रक्षामन्त्री ईश्वर पोखरेल र अर्थ, सञ्चार तथा सूचना प्रविधि मन्त्री युवराज खतिवडाले साँझ प्रधानमन्त्री केपी शर्मा ओलीसँग लकडाउन लगायतका विषयमा छलफल गरेका थिए ।

सुदूरपश्चिममा थप चारजनामा कोरोना संक्रमण देखिएको र विदेशबाट आएकाबाट स्थानीयमा सरेको समेत भेटिएपछि सुदूरपश्चिममा क्वारेन्टाइनको अवधि थप गरिसकिएको छ । आइतबार सुदूरपश्चिमका मुख्यमन्त्री त्रिलोचन भट्टले क्वारेन्टाइन अवधि २१ दिन पुर्याइएको घोषणा गरेका थिए ।

प्रकाशित : चैत्र २४, २०७६ ११:४८
पूरा पढ्नुहोस्
प्रतिक्रिया
पठाउनुहोस्
×