प्रहरी छल्न राति नै सीमा कटाइन्छ

ओमप्रकाश ठाकुर

(सर्लाही) — प्रशासनको उपस्थिति कमजोर रहेको जिल्लाको उत्तरी चुरे क्षेत्रमा गाँजाखेती फस्टाउँदै गएको छ । गाँजा पाक्ने बेला प्रहरीले फाँड्ने प्रयास गरे पनि प्रभावकारी देखिएको छैन । थोरै संख्यामा रहेका प्रहरी एकातिर गाँजा फाँड्दै गर्दा अर्कातिर स्थानीयले घरमा भित्र्याइसकेका हुन्छन् ।

ZenTravel

मकवानपुरमा भइरहेको गाँजा खेती सिन्धुली हुँदै सर्लाहीसम्म फैलिएको हो । चुरे आसपासको जमिन स्थानीयलाई गाँजा रोप्न सहज बनेको छ । खुला सीमाका कारण भारत लैजान सजिलो हुने भएकाले कतिपयले भारतीयकै लगानीमा खेती गरेका छन् । गाँजा स्याहार्न भारतीय व्यापारीले प्राविधिक टोली नै खटाउने गरेको स्थानीयले बताए । लालबन्दी नगरपालिका–१४, नारायणखोलामा गाँजा फँडानी गर्न तीन दिनदेखि सशस्त्र प्रहरीको विशेष टोली नै खटिएका छन् । प्रहरी नायब उपरीक्षकको कमान्डमा ३० जनाको टोलीले नारायणखोलास्थित मोटर दोभानआसपास क्षेत्रमा ५ बिघाभन्दा बढी गाँजा फँडानी गरिसकेको जनाइएको छ । सानो टोलीलाई सबै गाँजा फँडानी गर्न मुस्किल परिरहँदा नेपाल प्रहरीको पत्थरकोट चौकीका प्रहरी भने मूकदर्शक बनेका देखिन्छन् ।

प्रहरी खटिएपछि स्थानीयले पाकेका गाँजा रातिराति घर भित्र्याउन थालेका छन् । कतिपयले जंगल तथा झाडीमा लुकाएर राखेका छन् । मंगलबार प्रहरीले झाडीमा ठूलो परिमाणमा गाँजा फेला पारेको थियो । कसैले गाँजाका बोट राति नै काटेर सीमा कटाउने गरेका छन् ।

सशस्त्र प्रहरी उपरीक्षक विनोदराज श्रेष्ठले कम जनशक्ति भए पनि गाँजा खेती निर्मूल पार्न हरसम्भव प्रयास गरिरहेको जानकारी दिए । मोटरदोभान आसपास लगाइएको गाँजा नष्ट गरेर मात्रै टोली फर्किने उनले बताए । ‘कम जनशक्तिका कारण चुरेमा जताततै लगाइएको गाँजा नियन्त्रण गर्न चुनौती छ, त्यही भएर प्रहरी नायब उपरीक्षकको कमान्डमा ३० जनाको टोली खटाएको छु,’ उनले भने, ‘यस क्षेत्रको गाँजा नियन्त्रणका लागि अभियान नै चाल्न जरुरी छ ।’

केही दिनअघि प्रमुख जिल्ला अधिकारी मोहनबहादुर जिसीसमेत गाँजा फँडानीका लागि नारायणखोला पुगेका थिए । त्यस क्षेत्रमा पाखो बारीमा गोडमेल गरी व्यापारिक प्रयोजनले गाँजा खेती गरिएको पाइएको थियो । त्यसयता नेपाल प्रहरीको सक्रियता केही कम देखिए पनि सशस्त्रले एक्लै प्रयास गरिरहेको छ । प्रहरी उपरीक्षक विश्वमणि पोखरेलले अन्य ठाउँको सूचना संकलन गर्ने र गाँजा रहे/नरहेको भन्नेबारे यकिन विवरण संकलनमा जोड दिइएको बताए ।

सम्पूर्ण विवरण आएपछि एकैचोटि सम्पूर्ण जनशक्ति लगाएर गाँजा फँडानी अभियान चलाउने उनले सुनाए । सर्लाहीको चुरेक्षेत्र गाँजाको ‘हब’ बन्दै गएको स्थानीय एक राजनीतिक अगुवाले बताए । पाखो बारीमा अन्य बालीभन्दा गाँजा खेतीले राम्रो आम्दानी हुन थालेपछि स्थानीय आकर्षित भएको उनको भनाइ छ । उनले गाँजा खेतीविरुद्ध सशक्त अभियान नचलाएसम्म नियन्त्रण हुन नसक्ने जिकिर गरे । ‘गाँजाको ब्याड बनाउने बेलामै नियन्त्रण गर्नुपर्छ, त्यस बेला सुरक्षा निकायले मतलब गर्दैन,’ उनले भने, ‘पाक्न थालेको गाँजा फँडानी गर्नुको कुनै अर्थ छैन ।’ यस क्षेत्रमा अहिलेसम्म झन्डै दस बिघाभन्दा बढीमा लगाइएको गाँजा नष्ट गरिसकिएको छ ।

प्रकाशित : माघ ९, २०७६ १०:२८
प्रतिक्रिया
पठाउनुहोस्

बर्दिवासमा फस्टाउँदै होटल

बीपी राजमार्ग, जनकपुर–जलेश्वर राजमार्गको ‘ट्रान्जिट प्वाइन्ट’ भएकाले यात्रु तथा पर्यटकको आराम गर्ने थलोको रुपमा विकास
सुनिता बराल

(महोत्तरी) — पूर्व–पश्चिम राजमार्गसँग जोडिएको बर्दिवास व्यापारिक केन्द्र बन्न थालेको छ । सिन्धुलीलगायत पहाडी र तराईका जिल्लाको संगमस्थल भएकाले यहाँ व्यापारिक गतिविधि बढेको हो । बर्दिवासमा ठूल्ठूला घर, व्यापारिक भवन, होटल तथा रिसोर्ट बन्नुका साथै सरकारी र बैंक तथा वित्तीय संस्थाका कार्यालय स्थापना हुन थालेका छन् । 

तराईका बासिन्दालाई गर्मी र पहाडकालाई जाडो छल्न बर्दिवास उपयुक्त गन्तव्य भएको छ । बीपी राजमार्ग, जनकपुर–जलेश्वर राजमार्गको ट्रान्जिट प्वाइन्ट पनि बर्दिवास बनेको छ । भारतको जयनगर, जटही, जमुनी, सितामढी भिट्टामोड लगायत विभिन्न नाका हुँदै पूर्व तथा पश्चिम नेपाल प्रवेश गर्ने भारतीय र नेपाली आगन्तुकका निम्ति बर्दिवास सुरक्षित गन्तव्यस्थल बन्दै गएको बर्दिवास उद्योग वाणिज्य संघका उपाध्यक्ष कृष्ण गौतमले बताए । होटल तथा सपिङ कम्प्लेक्सका कारण पनि आगन्तुकको रोजाइमा बर्दिवास पर्न थालेको उनको भनाइ छ ।

प्राकृतिक रुपमा सुन्दर, सरसफाइ र सुविधायुक्त होटल, लज र जुनसुकै बेला सवारीसाधन पाइने भएकाले यात्रु तथा पर्यटकका लागि बर्दिवास आकर्षणको केन्द्र बन्दै गएको हो । ‘बर्दिबासमा सस्तो र महँगो दुवैखाले आवास पाइने भएकोले जुनसुकै स्तरका ग्राहकले पनि बस्न पाउँछन्,’ गौतमले भने । उनका अनुसार बर्दिवास नगरपालिका क्षेत्रमा करिब ११ सयभन्दा बढी होटल दर्ता भई सञ्चालित छन् ।

बर्दिबासमा सबैभन्दा पहिला २०३५ सालमा सानो घरबाट सुरु भएको ‘गौतम होटल’ अहिले तारे स्तरको बनेको छ । तीनतारे होटलको मापदण्ड पूरा गरिसकेकोले सम्बन्धित निकायमा गुणस्तर कायम गर्न कानुनी प्रक्रियामा रहेको होटल सञ्चालक हीरा गौतमले बताए । प्रदेश २ मा भ्रमण गर्ने स्वदेशी तथा विदेशी पर्यटकका लागि गौतम होटल, विनायक, मिथिला, गौरीशंकरलगायत बर्दिवासका होटल रोजाइमा पर्ने गरेका छन् ।

नेपाल भ्रमण वर्ष २०२० सुरु भएपछि बर्दिवासका अधिकांश होटल भरिभराउ छन् । भ्रमण वर्ष सुरु भएको २१ दिनमै दुई सय जनाभन्दा बढी विदेशी पाहुना गौतम होटलमा बसिसकेको सञ्चालक गौतमले बताए । उनले २० वर्षअघि डेढ लाख रुपैयाँ ऋण लिएर सुरु गरेको होटलको पुँजी एक अर्ब पुगेको बताए । बर्दिवासमा रहेको होटल विनायक तीन वर्षअघि करिब ३० करोड रुपैयाँ लगानीमा खुलेको हो । करिब २० करोड रुपैयाँ लगानीमा होटल रिसोना रमिथिला होटल लगायतअन्य सुविधायुक्त होटल पनि खुलेका छन् । प्रदेशको राजधानी जनकपुर भएपछि प्रदेशस्तरीय कार्यक्रमहरू समेत बर्दिवासमै सञ्चालन हुन थालेका छन् । व्यवसाय फस्टाएपछि होटल स्थापनाका लागि व्यवसायीहरू उत्साहित छन् ।

होटल तथा पर्यटन व्यवसायी संघ महोत्तरीले बर्दिवास बजार क्षेत्रमा मात्रै सञ्चालित करिब २ सय होटललाई ४ तहमा विभाजन गरेको छ । लगानीको आधारमा १५ देखि ५० करोडसम्म लगानीका ५ वटा होटललाई क श्रेणी, १५ करोडसम्म लगानीमा बनेका होटल सिसमहल, नमोबुद्ध, पन्चधुरा, विश्वमित्र, जनता होटल, खड्ग होटल लगायत १५ वटालाई ख श्रेणी र अन्य होटललाई ग श्रेणीमा वर्गीकरण गरिएको संघका अध्यक्ष दीपेन्द्र पराजुलीले बताए । उनले यहाँका होटल व्यवसायीले पाहुनालाई राम्रो सेवा दिएकाले बर्दिबास रोजाइमा पर्ने गरेको बताए । होटल व्यवसाय रोजगारीको स्रोत पनि भएकोले सेवा विस्तार गर्दै प्रभावकारी बनाउन जरुरी रहेको प्रदेश २ की सांसद शारदादेवी थापाले बताइन् । सुविधासम्पन्न होटलहरू थपिँदै जानु बर्दिवासको समृद्धि र विकास मान्न सकिने बर्दिवास नगरपालिकाका मेयर विदुर कार्कीले बताए ।

प्रकाशित : माघ ९, २०७६ १०:२५
पूरा पढ्नुहोस्
प्रतिक्रिया
पठाउनुहोस्
×