रैथाने कुखुरा–परेवा व्यवसायमा युवा

कान्तिपुर संवाददाता

सिरहा — सिरहा–२२ हकपाराका रामदत ठाकुर रैथाने प्रजातिका कुखुरा र परेवा पाल्छन् । यसबाट राम्रो आम्दानी पनि गरिरहेका छन् ।

ZenTravel

Meroghar

खाडी मुलुक कतारमा १७ वर्ष बिताएका उनले त्यहाँ रहदा स्थानीय प्रजातिकै पक्षी फर्ममा काम गरेका थिए । त्यसैमा रस बसेकाले स्वदेश फर्केपछि वर्षदिनअघि मनीष पोल्ट्री फर्म खोलेका हुन् । विदेशमा आर्जन गरेको पैसा फर्ममा खर्चेका छन् । भाडामा जग्गा लिएका छन् । ५ लाख रुपैयाँ लगानी रहेको फर्ममा अहिले ४ सयभन्दा बढी कुखुरा छन् । रैथाने सेतो, कालो, रातो, फुस्रोलगायत कुखुराले उनको फर्म रंगीचंगी बनेको छ । फर्मभरि परेवा पनि छन् । परेवालाई छानामा टिनका बाकस बनाएर राखेका छन् । दिनभर कुखुरा र परेवाकै हेरचाहमा सक्रिय उनी भन्छन्, ‘फरक यत्ति हो, उता कतारी प्रजातिका कुखुरा स्याहार्थें, यता स्वदेशी ।’

जताततै ब्रोइलर कुखुराको पालनले रैथाने जात पाउन गाह्रो भएपछि संरक्षण र व्यवसायमा नयाँपन दिन पनि यो व्यवसाय थालेको उनी बताउँछन् । गाउँघरबाट लोप हुन लागेको रैथाने कुखुराको चल्ला नपाएपछि सुरुमा काठमाडौंबाट ल्याए । अहिले आफ्नै फर्ममा चल्लासमेत उत्पादन गर्छन । ‘दुईपटकसम्म बाहिरबाटै चल्ला ल्याएँ,’ ठाकुरले भने, ‘अहिले फर्मबाटै उत्पादन गर्छु ।’ उनले चल्ला उत्पादन गर्न घरेलु प्रविधिबाटै ‘इन्कुभेटर’ मेसिन बनाएका छन् । त्यसमा सय थान अण्डा राख्छन् । तीन हप्तापछि चल्ला उत्पादन हुन्छ । ‘अण्डामा कुखुरा बस्दा कसरी चल्ला बन्छ भनेर खोजबिन गरें,’ उनले भने, ‘काठको बाकसमा तापक्रम मिलाएर अण्डा राखी चल्ला उत्पादन गर्छु ।’

घरेलु प्रविधिबाट उत्पादित चल्ला बजारबाट मगाएको भन्दा सस्तो पर्ने उनी सुनाउँछन् । उत्पादित चल्ला स्थानीय बजारमा बिक्री गर्छन् । भन्छन्, ‘माग धान्न सकेको छुइनँ ।’ कुखुरा र परेवा फार्मलाई अझै ठूलो बनाउने योजनामा छन् उनी । घरका सबै सदस्यले फर्ममै रोजगारी पाएका छन् । स्थानीय जातका परेवा, कुखुरा र अण्डा उनी गाउँघरका हाटबजारमा बिक्री गर्छन् । पारखीहरू उनको फर्ममै पनि पुग्छन् । विदेशमा गएर पसिना बगाउनु साटो गाउँमै रोजगारी गर्नु राम्रो रहेको उनी बताउँछन् । ‘विदेशमा कडा परिश्रम गर्नुपर्छ, मजदुरीमा काम गर्नेको त्यति बचत पनि हुँदैन,’ उनले भने, ‘आफ्नै गाउँघरमा कृषि व्यवसाय थाले त्यति कमाइ गर्न सकिन्छ ।’ स्वदेशमै रोजगारी गर्नेलाई सरकारले प्रोत्साहन गर्नुपर्ने उनको भनाइ छ ।

यो एक वर्षमा कुखुरा र परेवा नै उनका साथी बनेका छन् । तिनको आवाजमा अनगिन्ती विविधता अनुभूति गर्छन् ठाकुर । भन्छन्, ‘आवाजको बाहिरी दुनियाँसँग बेखबर भइसकें, भाले बासेको र परेवाको मायालु कुहुरमुहुर आवाज जीवनको अभिन्न ध्वनि बनेको छ ।’

प्रकाशित : पुस २९, २०७६ १०:१५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

अख्तियारको वार्षिक प्रतिवेदन : भ्रष्टाचारका उजुरी प्रदेश २ मा धेरै

देशभरका उजुरी २४ हजार ८५  
तीमध्ये प्रदेश २ का २२ प्रतिशत 
सबैभन्दा धेरै घुस लेनदेनका 
कान्तिपुर संवाददाता

(जनकपुर) — अख्तियार दुरुपयोग अनुसन्धान आयोगले प्रदेश २ का प्रमुख तिलक परियारलाई सोमबार वार्षिक प्रतिवेदन बुझाएको छ । आयोगको बर्दिवास कार्यालयका प्रमुख नारायणप्रसाद सापकोटाले प्रतिवेदनमा प्रदेश सरकार र स्थानीय तहले सुशासन कायम र भ्रष्टाचार न्यूनीकरणका लागि अपनाउनुपर्ने उपाय उल्लेख गरिएको भन्दै लागू गराउन प्रदेशप्रमुखसित आग्रह गरे । 

आयोगका अनुसार भ्रष्टाचारका सबैभन्दा बढी उजुरी प्रदेश २ कै छन् । कुल उजुरीमध्ये प्रदेश २ का २२ प्रतिशत रहेको प्रतिवेदनमा औंल्याइएको छ । देशभरिबाट २४ हजार ८५ उजुरी परेकोमा बर्दिबास कार्यालयमा मात्र २ हजार ९४ वटा रहेको सापकोटाले बताए । तीमध्ये ७ सय ९२ वटा फर्छ्योट भएका छन् । १ हजार ३ सय ९ वटाको छानबिन गर्न बाँकी छ । घुससम्बन्धी उजुरी धेरै परेका छन् । यो आँकडामा बारा, पर्सा र सप्तरीको उजुरी जोडिएको छैन । बारा र पर्सालाई आयोगको हेटौंडा कार्यालय र सप्तरीलाई इटहरी कार्यालयले हेर्छ ।

आयोगका अनुसार बर्दिबास कार्यालयमा ४२ प्रतिशत घुस, २५ प्रतिशत झूटा शैक्षिक प्रमाणपत्र, ११ प्रतिशत सार्वजनिक सम्पत्तिको हानिनोक्सानी, ४ प्रतिशत गैरकानुनी सम्पत्ति आर्जन, ९ प्रतिशत गैरकानुनी लाभ वा हानि पुर्‍याएको, ३ प्रतिशत राजस्व चुहावट र ६ प्रतिशत विविध शीर्षकका उजुरी छन् । वाग्मती प्रदेशमा उजुरीको संख्या २१ प्रतिशत छ ।

भ्रष्टाचारले मुलुक खोक्रो बन्ने भएकाले यसलाई नियन्त्रण गर्न सरकार, राजनीतिक दल र कर्मचारी सबैले भूमिका निर्वाह गर्नुपर्ने प्रदेशप्रमुख परियारले बताए । ‘सबै क्षेत्रमा कमबेसी भ्रष्टाचार र अनियमितता छ । चेतनाको कमीले हाम्रो जस्तो अविकसित र पिछडिएको देशमा यसलाई जरैबाट उन्मूलन गर्न समय लाग्छ,’ उनले भने, ‘घुसबापत नगदै लिनु मात्र भ्रष्टाचार होइन । कार्यालयमा ढिलो पुग्नु, काम चोर्नु र आलटाल गर्नु पनि अनियमितताको पाटो नै हो ।’

प्रदेशप्रमुख परियारले आयोगको प्रतिवेदनबारे मुख्यमन्त्रीसित पनि छलफल गरेर प्रदेश २ मा सुशासन र छिटो–छरितो कार्य सम्पादनका लागि पहल गर्ने आश्वासन दिए । प्रतिवेदन हस्तान्तरण कार्यक्रममा प्रदेशका प्रमुख सचिव रामकृष्ण सुवेदीले आफ्नो कार्यकालमा प्रदेशलाई भ्रष्टाचारमुक्त र सुशासन कायम गर्न कुनै कसर बाँकी नराख्ने बताए । ‘म आफैं अख्तियारमा दुई वर्ष काम गरें, सुशासन मेरो प्राथमिकतामा पर्छ,’ उनले भने, ‘सबै कार्यालयमा अख्तियारको मान्छे राखिदिनू । मेरो पछाडि लगाए नि हुन्छ । घुस खाने र भ्रष्टाचार गर्ने कर्मचारीलाई म छाड्दिनँ ।’

परियारले प्रदेश सरकार मातहत रहेको यातायात कार्यालय पनि घुसको अड्डा बनेकाले त्यसलाई सुधार गर्न आफूले पहल सुरु गरिसकेको बताए । ‘प्रदेशको सुशासनसम्बन्धी विधेयक पनि प्रदेशसभामा प्रस्तुत भइसकेको छ,’ प्रमुख सचिव सुवेदीले भने, ‘त्यो विधेयक पनि कोसेढुंगा साबित हुन्छ । हामी सबै मिलेर प्रदेश २ लाई सुशासनमा १ नम्बर बनाउनेछौं ।’

प्रकाशित : पुस २९, २०७६ १०:१४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×