सुनसरी–मोरङ औद्योगिक क्षेत्रका उद्योगको उत्पादन घट्यो- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

सुनसरी–मोरङ औद्योगिक क्षेत्रका उद्योगको उत्पादन घट्यो

विनोद भण्डारी

विराटनगर — लकडाउन हटेको तीन महिना बित्दा पनि सुनसरी मोरङ–औद्योगिक करिडोरका उद्योगले उत्पादन बढाउन सकेका छैनन् । माग नै नआएको भन्दै उद्योगहरूले क्षमताको ४० प्रतिशत मात्र उत्पादन गर्दै आएका छन् ।

आरती स्ट्रिप्स उद्योगले जस्तापाता वार्षिक १ लाख १० हजार टन, रंगीन पाता वार्षिक ६० हजार टन र कालोपाइप वार्षिक ५० हजार टन उत्पादन गर्थ्यो । अहिले तीनवटै उत्पादन बढीमा ४० प्रतिशत मात्र भएको उद्योगका प्रशासन प्रमुख दिवस नेपालले बताए ।

उद्योगले सामान्य अवस्थामा फलामे पाइप दैनिक ६ हजार ५ सय टन उत्पादन गर्दै आएको थियो । नेपालले भने, ‘त्यसको उत्पादन अहिले ठप्प गरेर पुरानो उत्पादन बिक्री गर्दै छ । बजारमा माग नै छैन । माग भएर बजार पुगेका सामानको पनि रकम फिर्ता आउँदैन ।’

सामान्य अवस्थामा दैनिक ७५ टन धागो उत्पादन गर्दै आएको सुनसरी, खनारको रिलायन्स स्पिनिङ उद्योगको पनि उत्पादन आधा घटेको छ । कोरोनाका कारण आवश्यकताअनुसार मजदुरसमेत पाइँदैनन् । अहिले करिडोरका खाद्यान्न, मास्क र सेनिटाइजर उद्योगले मात्र पूर्ण क्षमतामा सामान उत्पादन गर्दै आएको र अन्य उद्योगको उत्पादन ५० प्रतिशतभन्दा बढीले घटेको उद्योग संगठन मोरङका अध्यक्ष भीम घिमिरेको भनाइ छ । ‘खाद्यान्न, सेनिटाइजर र मास्कबाहेकका सामानको बजारमा माग नै छैन,’ उनले भने, ‘त्यसैले अन्य उद्योगका सञ्चालकले औद्योगिक कच्चा पदार्थ आयात र उत्पादन दुवै घटाए ।’

लकडाउन हटे पनि औद्योगिक क्षेत्रको अवस्था सुधार हुन नसकेको मोरङ व्यापार संघका अध्यक्ष प्रकाश मुन्दडाको बुझाइ छ । उनका अनुसार बजारमा उपभोग्य वस्तुको माग नै नहुँदा लगानी गर्ने वातावरण छैन । ‘अहिले माग र आपूर्तिबीचको सम्बन्ध नै बिग्रिएको छ,’ मुन्दडाले भने, ‘बजारमा सामानको माग नबढेसम्म उद्योगले उत्पादन बढाउने अवस्था नै छैन ।’

उद्योग पूर्ण क्षमतामा नचल्दा विराटनगर भन्सारको राजस्व असुली पनि प्रभावित भएको छ । औद्योगिक कच्चा पदार्थको आयात आधा घटेको छ । ‘यो भन्सारको राजस्व औद्योगिक कच्चा पदार्थ आयातमा निर्भर छ,’ भन्सार प्रमुख शिव भण्डारीले भने, ‘कच्चा पदार्थ आयात नै घटेपछि राजस्व असुली प्रभावित हुने नै भयो ।’

भन्सारले असोजमा ४ अर्ब ५९ करोड ५० लाख रुपैयाँ राजस्व असुली गर्ने लक्ष्य राखेकोमा ७० दशमलव २५ प्रतिशत अर्थात ३ अर्ब २२ करोड ८२ लाख मात्र असुली गरेको छ । सामान्य अवस्थामा यो भन्सारले दैनिक सरदर १५ करोड रुपैयाँ राजस्व संकलन गर्दै आएको थियो ।

प्रकाशित : कार्तिक २६, २०७७ १४:२७
प्रतिक्रिया
पठाउनुहोस्

क्याप्टेन कर्नर : कोरोनाले जागिर गुमाएका मलेसियाली पाइलटको खाजा पसल

रोयटर्स

क्‍वाला लम्पुर — प्रत्येक बिहान मलेसियाली पाइलट एज्रिन मोहम्मद जावावी सेतो पोसाक लगाउँछन् । अनि काममा जानुअघि कयाप्टेनले लगाउने ह्याट पनि लगाउँछन् । तर उनी पाइलटको पोसाक लगाएर एयरपोर्ट भने जाँदैनन् ।

दुई दशकदेखि उनको दिनचर्या यही भए पनि कोरोना महामारीका कारण भने उनको दिनचर्या र काम फेरिएको छ ।

खाजा पसल खोल्नुअघि पाइलटको पोसाकसहित तयार हुँदै एज्निन तस्बिर : रोयटर्स

अचेल भने पाइलट एज्रिनले राजधानी क्वाला लुम्पुरको छेउमा एउटा सानो फास्ट फुड स्टल सञ्चालन गरेका छन् । ४४ वर्षीय एज्रिन कोरोना महामारीका कारण वायु सेवा कम्पनीले उडान बन्द गरेपछि कामविहीन हुने हजारौं कर्मचारीमध्ये एक हुन् ।

‘पहिलेको कम्पनीले मलाई कामबाट हटाएकाले मैले केही कमाउनै पर्छ,’ यसअघि मालिन्दो एयरमा कार्यरत उनले भने । मालिन्दो एयरले कोरोना महामारीका कारण उडान संख्यामा कटौती गर्दै सयौं कर्मचारी निकालेको छ ।

तस्बिर : रोयटर्स

नियमित रुपमा आम्दानी नहुने भएपछि चार सन्तानका बुवा एज्रिनले सानो खाजा घर खोल्ने निर्णय गरेका हुन् । उनको स्टलमा विशेषगरी मलेसियाली परिकारहरु पाइन्छ । करी नुडल, लाक्सा(पिरो सुपसहितको चाउचाउ) र रोजाक(विभिन्न फलफूल मिसाएर बनाइने परिकार) उनको स्टलमा पाइन्छ ।

खाजा तयार गर्दै पाइलट एज्रिन तस्बिर : रोयटर्स

पाइलटको पोसाकसहित स्टलमा बसेको एज्रिनको फोटो उनकी श्रीमतीले सामाजिक सञ्जालमा पोस्ट गरेपछि उनी अहिले निकै लोकप्रिय भइरहेका छन् । उनको फोटो यतिबेला सामाजिक सञ्जालमा भाइरल भइरहेको छ । ‘क्याप्टेन कर्नर’ नाम दिइएको उनको स्टलमा पछिल्लो समय ग्राहकको भीड लाग्ने गरेको छ ।

कोरोना महामारीका कारण जागिर गुमाएका पाइलट एज्रिन तस्बिर : रोयटर्स

कोरोना महामारीका कारण विश्वभर लाखौं व्यक्तिले आफ्नो जागिर गुमाएका छन् । केहीले भने पाइलट एज्रिनले झैं वैकल्पिक उपाय खोजिरहेका छन् ।

प्रकाशित : कार्तिक २६, २०७७ १४:०३
पूरा पढ्नुहोस्
प्रतिक्रिया
पठाउनुहोस्
×