पाँचथरका हिलिहाङ र फालेलुङमा कोभिड अस्पताल- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

पाँचथरका हिलिहाङ र फालेलुङमा कोभिड अस्पताल

आनन्द गौतम

ताप्लेजुङ — पाँचथरका फालेलुङ र हिलिहाङ गाउँपालिकामा कोभिड अस्थायी अस्पताल सञ्चालनमा ल्याइएका छन् ।

पाँचथरको प्राङबुङमा सञ्चालित कोभिड अस्पताल । 

हिलिहाङ गाउँपालिकामा मंगलबार र फालेलुङ गाउँपालिकामा बिहीबारदेखि अस्पताल सञ्चालन गरिएका हुन् । हिलिहाङले एक जना एमबीबीएस डाक्टर र दुई जना स्टाफ नर्स नियुक्त गरेर अस्पताल चलाएको स्वास्थ्य शाखा प्रमुख चन्द्र घिमिरेले जानकारी दिए ।

फालेलुङमा दुई जना स्टाफ नर्स नियुक्त गरिएको छ । डाक्टरको माग गरिए पनि दरखास्त नपरेको प्रमुख प्रशासकीय अधिकृत विनोद चौहानले बताए । दुवै गाउँपालिकाले एक/एक जना कार्यालय सहयोगी यिनै अस्पतालका लागि नियुक्त गरेका छन् । फालेलुङले एमबीबीएस डाक्टरका लागि पुन: दरखास्त आह्वान गरिने जनाएको छ । संघीय स्वास्थ मन्त्रालयबाट प्राप्त १० लाख रुपैयाँसहित स्थानीय तहको लगानीमा अस्थायी अस्पताल सञ्चालनमा ल्याइएको पालिकाहरूले जानकारी दिएका छन् ।

यी अस्पताल तत्काललाई तीन महिनाका लागि सञ्चालन हुने र आवश्यकताअनुसार थप गरिने गाउँपालिकाले जनाएका छन । फालेलुङको अस्पताल प्राङवुङ इलाका स्वास्थ्य चौकी र हिलिहाङको गोपेटार प्राथमिक स्वास्थ्य केन्द्रमा सञ्चालन गरिएको हो ।

प्रकाशित : आश्विन ३०, २०७७ १२:५६
प्रतिक्रिया
पठाउनुहोस्

कर्मचारी संक्रमित भएकाले लोकसेवाका परीक्षा प्रभावित हुन सक्ने

तीनवटा शाखा बन्द, करिब २० जना कर्मचारी क्वारेन्टाइनमा
कृष्ण ज्ञवाली

काठमाडौँ — लोकसेवा आयोगले आगामी मंसिर र पुसमा लिने भनिएको परीक्षा प्रभावित हुन सक्ने देखिएको छ । कर्मचारीहरूलाई कोरोना संक्रमण देखिएपछि आयोगका तीन महत्त्वपूर्ण शाखा बन्द गराइएका छन् ।

ती शाखाका कर्मचारी दसैंअघि काममा फर्किन सक्ने सम्भावना नरहेकाले परीक्षा प्रभावित हुन सक्ने आयोगस्रोतले जनायो ।

विज्ञापन प्रकाशन, प्राविधिक र अप्राविधिकतर्फको लिखित नतिजा प्रकाशन शाखाहरू बन्द गरिएको छ । ‘केही कर्मचारीलाई संक्रमण देखिएपछि सँगै काम गर्ने कर्मचारी क्वारेन्टाइनमा रहनुभएको छ । यी तीन शाखा दसैंअघि खुल्ने सम्भावना छैन,’ स्रोतले भन्यो, ‘कन्ट्याक्ट ट्रेसिङमा परेका कर्मचारीहरूमा समेत संक्रमण देखिए परीक्षाको तयारी अझै प्रभावित हुन सक्छ ।’ अब हुने भनिएका परीक्षा प्रभावित भए हालै आयोगले निकालेको विज्ञापन पनि प्रभावित भई परीक्षा तालिका पछाडि धकेलिनेछ ।

सहकर्मीलाई संक्रमण देखिएपछि शुक्रबारसम्म केन्द्रिय कार्यालयका करिब २० जनाभन्दा बढी कर्मचारी क्वारेन्टाइनमा बसेका छन् । सामान्य प्रशासन मन्त्रालयबाट रिक्त दरबन्दीबारे पत्राचारमा खटिने कर्मचारीलाई सुरुमा संक्रमण देखिएको थियो । अहिले चार जनामा संक्रमण देखिएको आयोगस्रोतले बतायो । आयोगले केही दिनमै उपसचिवको नतिजा निकाल्ने तयारी गरेकोमा त्यो पनि पछाडि सर्ने भएको छ ।

लोकसेवा आयोगले गत चैतमा लकडाउनपछि रोकिएका परीक्षा फेरि सुरु गर्ने तयारी गरेको थियो । लोकसेवाले गत १९ र २२ गते सूचना निकालेर प्राविधिक अधिकृतको परीक्षा तालिका सार्वजनिक गरेको थियो ।

त्यसै गरी आयोगले नासु र खरिदारको परीक्षा तालिका पनि प्रकाशित गरेको थियो ।

त्यही परीक्षालाई दृष्टिगत गरी लोकसेवाले संक्रमितहरू परीक्षामा सहभागी हुन नपाउने भनी मापदण्ड सार्वजनिक गरेको थियो । मापदण्डका कारण संक्रमितप्रति विभेद हुने भनी दर्ता भएको निवेदनमाथि सुनुवाइपछि सर्वोच्च अदालतले विभेदकारी प्रावधान कार्यान्वयन नगर्न आदेश दियो । त्यो आदेशपछि समेत परीक्षा तालिका प्रभावित हुने स्रोतले बतायो । ‘संक्रमित परीक्षामा सहभागी नहुँदा एउटा ढंगको तयारी गरे पुग्ने थियो,’ स्रोतले भन्यो, ‘संक्रमितले समेत परीक्षा दिन पाउने भएपछि त्यही अनुसारको तयारी चाहिन्छ, जुन निकै कठिन काम हो ।’ आगामी सोमबार बस्ने आयोगको नियमित छलफलमा यसबारे निर्णय हुनेछ ।

प्रकाशित : आश्विन ३०, २०७७ १२:३९
पूरा पढ्नुहोस्
प्रतिक्रिया
पठाउनुहोस्
×