भीटीएम नहुँदा संक्रमितको सम्पर्कमा रहेका २ सय ५० को परीक्षण रोकियो

उदयपुरमा भीटीएम सकिएको ६ दिन बिते पनि सरकारले नपठाउँदा परीक्षण रोकिएको छ
डिल्लीराम खतिवडा

उदयपुर — कोभिड–१९ का बिरामी दैनिक बढिरहेका बेला कोरोना परीक्षण किटको अभाव भएको छ । जसका कारण संक्रमणको उच्च जोखिममा रहेका क्षेत्रमा परीक्षण गर्न नसकिएको जिल्ला स्वास्थ्य कार्यालयहरूले जनाएका छन् ।



प्रदेश १ मा पहिलोपटक कोरोना संक्रमण देखिएको उदयपुरमा पीसीआर परीक्षणका लागि किट अभाव भएको छ । ६ दिनयता भीटीएमको मौज्दात शून्यमा झरेको छ । भीटीएम नहुँदा तत्काल परीक्षण नगरी नहुने २ सय ५० भन्दा बढी व्यक्तिको परीक्षण रोकिएको छ । ती व्यक्ति संक्रमित सञ्चारकर्मीको सम्पर्कमा रहेका जिल्ला स्वास्थ्य कार्यालयका प्रमुख मोहनप्रसाद सुवेदीले बताए । नमुना स्वाब संकलन गर्ने जनशक्ति पर्याप्त भए पनि भीटीएम नहुँदा स्वाब संकलन रोकिएको उनको भनाइ छ ।

उदयपुरको त्रियुगा नगरपालिका–३ भुल्के र आसपासका क्षेत्रमा पनि परीक्षण रोकिएको छ । ‘दुई दिनयता स्वास्थ्य कार्यालयमा भीटीएम शून्य छ,’ उनले भने, ‘३ गतेदेखि भीटीएम सकियो । यसबारे माथिल्लो निकायलाई जानकारी गराएका छौं । अहिलेसम्म प्राप्त भएको छैन ।’

पछिल्लोपटक कोरोना संक्रमित सञ्चारकर्मीको कन्ट्याक्ट ट्रेसिङका आधारमा ३८ जनाको नमुना संकलन गरिएसँगै भीटीएम सकिएको हो । प्रदेश सरकारले पठाएको ५ थान भीटीएम काम नलाग्ने भएपछि स्वाब संकलन रोकिएको प्रमुख सुवेदीको भनाइ छ ।

सुरुमा वैशाख ५ गते भुल्केस्थित नुरी मस्जिद र क्रमश: आसपासको बस्तीमा देखिएका ३२ र भुल्केबाहिर गाईघाट बजारमा बस्ने सञ्चाकर्मी गरी जम्मा ३३ जनामा संक्रमण पुष्टि भइसकेको छ । त्यसमध्ये २३ जना कोभिड १९ उपचार केन्द्र विरानगरमा उपचार गरी फर्किसकेका छन् ।

परीक्षणले तीव्रता नपाउँदा जोखिम बढेको भन्दै स्थानीय चिन्तित छन् । एउटा बस्ती र समुदायबाट अर्को बस्ती र समुदायमा कोरोना संक्रमण फैलँदासमेत स्वाब परीक्षणको दायरलाई फराकिलो बनाउन नसक्नु सरकारको कमजोरी रहेको कांग्रेस नेता वसन्त बस्नेतले बताए ।

संक्रमित व्यक्तिको ट्राभल हिस्ट्री हेर्दा मास्क सिलाएर वितरण गर्ने, गाउँघर घुमेर चुरी बेच्ने, छाता र कुकर मर्मत गर्नेसम्मका छन् । तत्काल परीक्षण गर्नुपर्ने करिब ५ हजार छन् । तर स्वास्थ्य कार्यलायले अहिलेसम्म ५ सय ५२ महिला र ९ सय ८९ पुरुष गरी सहित १ हजार ५ सय ४१ जनाको पीसीआर परीक्षण गरिएको जनाएको छ ।

प्रकाशित : जेष्ठ ९, २०७७ १४:२८
ADVERTISEMENT
प्रतिक्रिया
पठाउनुहोस्
ADVERTISEMENT

क्वारेन्टाइनमा बस्नेलाई दैनिक १ सय ७८ रुपैयाँ

हरि गौतम

रुकुम पश्चिम — चौरजहारी नगरपालिकाले क्वारेन्टाइनमा बस्नेलाई खाना खर्चबापत दैनिक एक सय ७८ रुपैयाँ दिने निर्णय गरेको छ । यसअघि क्वारेन्टाइनमा बसेकालाई नगरपालिका आफैले खाने व्यवस्था गरेकामा अब नगद दिने निर्णय गरेको हो ।

नगरपालिकाका अनुसार भारत तथा अन्य ठाउँबाट आउनेलाई १४ वटै वडाका क्वारेन्टाइनमा राखिनेछ । ‘क्वारेन्टाइनमा बस्नेलाई नगद रकम दिइनेछ,’ नगरपालिकाका निमित्त प्रमुख प्रशासकीय अधिकृत रामबहादुर केसीले भने, ‘तर उनीहरुले चाहेको खण्डमा खाद्यान्न किनेर उपलब्ध गराउनेछौं ।’ उनका अनुसार पकाएर खानको लागि हरेक क्वारेन्टाइनमा पकाउने भाँडाको व्यवस्था गरिएको छ । आफूले खाने थाल, कचौरा, गिलास र ओढ्ने– ओछ्याउने कपडा सम्बन्धित व्यक्तिले ल्याउनुपर्ने नियम बनाइएको उनले जानकारी दिए । नगरपालिकाले संघीय सरकारकै मापदण्डअनुसार काम अघि बढाएको उनको भनाइ छ ।

क्वारेन्टाइनमा नगरपालिकाले मास्क, स्यानीटाइजर, साबुन, खानेपानीका लागि ड्रम, फिल्टर र शौचालय सफाइका सामग्री प्रदान गरेको छ । दाउराको समस्या हुने वडामा ग्याँस र चुलाको व्यवस्था पनि गरिने नगरप्रमुख विशाल शर्माले बताए । ‘वडामा गठित क्वारेन्टाइन व्यवस्थापन समितिले यसको सहजीकरण गर्नेछ,’ उनले भने, ‘अब बिहान र दिउँसोको नास्ता तथा साँझ–बिहानको खानाको व्यवस्था क्वारेन्टाइनमा बस्नेले आफै गर्नेछन् ।’ संघ र प्रदेशले बजेट विनियोजन गर्न असजिलो मान्ने र मापदण्ड अमिल्दो बनाएकाले समस्या भएको उनले गुनासो गरे ।

चौरजहारी नगरपालिकाबाट ३ हजार २ सय ४४ जना भारतका विभिन्न ठाउँमा मजदुरी गर्न गएका छन् । उनीहरु घर फर्कन सुरु गरेको र शुक्रबार मात्र ३४ जना भित्रिएको नगरपालिकाले जनाएको छ । उनीहरुलाई सम्बन्धित वडामा पठाइएको छ । ‘क्वारेन्टाइनमा पनि १४ दिन बसेपछि मात्रै कारोना भाइरस संक्रमण भएनभएकोबारे पीसीआरमार्फत परीक्षण गरिनेछ,’ नगरप्रमुख शर्माले भने, ‘भारतमा रहेकामध्ये झन्डै ५० प्रतिशत स्थानीय बासिन्दा घर फर्कने हाम्रो अनुमान छ ।’ उनका अनुसार कोरोना संक्रमितको उपचारका लागि चौरजहारीमै ३९ बेडको आइसोलेसन वार्ड पनि तयारी अवस्थामा राखिएको छ ।

प्रकाशित : जेष्ठ ९, २०७७ १४:२७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×