लकडाउन अवज्ञा गर्नेलाई सडकमा उभ्याएर दुई घण्टा प्रशिक्षण

एलिसा श्रेष्ठ

भोजपुर — जिल्लामा लकडाउन अवज्ञा गर्दै हिँड्नेलाई चोकचोकमा दुई घण्टा उभ्याइ कोरोनासम्बन्धी प्रशिक्षण दिन थालिएको छ । बिनाकाम बजारमा हिँड्नेलाई प्रहरीले नियन्त्रणमा लिई तीन मिटरको दूरीमा राखी दुई घण्टा उभाई कोरोना संक्रमणसम्बन्धी प्रशिक्षण दिने गरेको छ ।



भोजपुरको चारभञ्ज्याङमा, च्याङविनि चोक र प्रहरी कार्यालयमा गरी दिउँसो दुई बजेसम्म ३० जनालाई नियन्त्रणमा लिई दुई घण्टा उभ्याएर कारबाही गरेको जिल्ला प्रहरी कार्यालय भोजपुरका प्रहरी निरीक्षक पाण्डव राजवंशीले बताए ।

आज लकडाउन उल्लंघन गर्ने पौवादुङ्मा गाउँपालिकाका अध्यक्ष किरण राई लगायत कृषि ज्ञान केन्द्रका कर्मचारीसमेत प्रहरीको कारबाहीमा परेका छन् । यसअघि पनि प्रहरीले विभिन्न ठाउँमा गरी ७७ जनालाई कारबाही गरिसकेको छ ।

प्रकाशित : वैशाख ३, २०७७ १६:४८
प्रतिक्रिया
पठाउनुहोस्

१० जना क्‍वारेन्टाइनमा

एलिसा श्रेष्ठ

भोजपुर — वैदेशिक रोजगारीबाट घर फर्किएका र अलपत्र कामदारहरुलाई क्‍वारेन्टाइनमा राखिएको छ । कोरोना भाइरस संक्रमणको त्रासका कारण साल्पासिलिछो गाउँपालिकाको कुलुङस्थित ९ जना र रामप्रसाद राई गाउँपालिकामा १ जनालाई क्‍वारेन्टाइनमा राखिएको हो । 

लकडाउनपछि खाँदबारीबाट भोजपुर छिरेका निर्माणाधीन अरुण तेस्रो जलविद्युत् आयोजनामा काम गर्दै आएका ९ जनालाई संक्रमणबाट बचाउन क्‍वारेन्टाइनमा राखिएको साल्पासिलिछो गाउँपालिका अध्यक्ष महेश राईले बताए । ती मजदुरहरुलाई खानबस्न छुट्टै व्यवस्था मिलाइएको छ । दुबईबाट घर आएका रामप्रसादराई गाउँपालिकाका एक जनालाई पनि क्‍वारेन्टाइनमा राखिएको छ । उनको अवस्था सामान्य छ ।

त्यसैगरी रामप्रसादराई गाउँपालिकाले लकडाउनको समयमा मदिरा बिक्री वितरणमा कडाइ गरेको छ । गाउँपालिका अध्यक्ष बिजय राईले मदिराको बिक्री वितरण र सेवन बन्द गराउन प्रहरी, जनप्रतिनिधि र कर्मचारी परिचालन गर्ने निर्णयसहित सूचना जारी गरिएको बताए ।

संक्रमण जोखिम बढेकाले गाउँपालिका प्रवेश गर्ने सबै नाकाहरू बन्द गर्ने र जरुरी काम परे गाउँपालिकाको पास अनिवार्य गराइएको उपाध्यक्ष सम्झना राईले बताइन् ।

प्रकाशित : चैत्र २१, २०७६ २१:१५
पूरा पढ्नुहोस्
प्रतिक्रिया
पठाउनुहोस्
×