बेतिनीमा पूर्वाधार अभाव  

कटारी नगरपालिका–११ स्थित बेतिनी भन्ज्याङ क्षेत्रबाट हिमाल, पहाड र तराईका सुन्दर दृश्य अवलोकन गर्न सकिन्छ । यति विशेषता हुँदा पनि यहाँ पर्यटकीय चहलपहल हुन सकेको छैन । प्रसिद्ध पर्यटकीय स्थल भेडेटारबराबरकै उचाइ र मौसम भएको यो क्षेत्र सरोकारवालाको बेवास्ताले ओझेल परेको हो । यहाँको आन्तरिक तथा बाह्य पर्यटन प्रवर्द्धन गर्नेतर्फ खासै चासो देखिँदैन ।

मुलुकभर नेपाल भ्रमण वर्ष २०२० का विभिन्न कार्यक्रम र तयारी चलिरहँदा बेतिनीमा पर्यटकलाई व्यवस्थित होटेल र लजसमेत छैन । त्यसैले उल्लेख्य संख्यामा पर्यटक तान्न सक्ने यो क्षेत्र अहिले सुनसान छ । ‘बेतिनी भन्ज्याङलाई पर्यटकीय क्षेत्रका रूपमा विकास गरे प्रशस्त लाभ लिन सकिन्छ,’ स्थानीय नरमान मगरले भने, ‘तर यो क्षेत्रको विकास हुन सकेको छैन ।’ बेतिनी भन्ज्याङ पर्यावरणीय हिसाबले समेत महत्वपूर्ण रहेको स्थानीय मिना राउतको भनाइ छ । ‘तर, यहाँ कसैको नजर परेको छैन, भ्रमण वर्षका लागि विभिन्न कार्यक्रम भइरहँदा बेतिनी पनि एउटा पर्यटकीय स्थल हो भन्ने प्रचारप्रसार हुन सकेको छैन,’ उनले भनिन् । पूर्व क्षेत्रकै पुरानो बजार कटारीदेखि सिद्धिचरण राजमार्ग हुँदै पूर्वको पशुपतिनाथ भनेर चिनिने खोटाङको हलेसी महादेव दर्शन गर्न हजारौं सर्वसाधारण बेतिनीकै बाटो जान्छन् ।

कटारीबाट २२ किमि उत्तर सिद्धिचरण राजमार्गमै पर्ने बेतिनीमा एक छिन नरोकिने र अवलोकन नगर्ने यात्रु कमै हुन्छन् । तर, होटेल, लज र अन्य पूर्वाधार अभावमा चाहेर पनि बास बस्न सक्दैनन् । ‘बेतिनीबाट सगरमाथालगायत हिमाल र नेपाल तथा भारतका तराई क्षेत्रको दृश्यावलोकन गर्न सकिन्छ,’ कटारी नगरपालिका–११ का वडाध्यक्ष दीपक बुढाथोकीले भने, ‘यो भेडेटारजस्तै पूर्वकै महत्त्वपूर्ण पर्यटकीय स्थल हुन्छ भन्ने थाहा पाउँदापाउँदै पूर्वाधार तयार गर्न सकिएको छैन ।’ अहिले नगरपालिकाबाट आएको बजेटले पूर्वाधार तयारी थालिएको उनले बताए ।

पर्यटन मन्त्रालयले हालै सार्वजनिक गरेको नेपालका पर्यटकीय क्षेत्रहरूको सूचीमा बेतिनीको नाम समावेश छैन । हरेक दृष्टिले महत्वपूर्ण भएर पनि सूचीमा नपर्नु यस क्षेत्रकै दुर्भाग्य भएको स्थानीयको गुनासो छ । कटारी नगरपालिकाका प्रमुख ज्ञानेन्द्र श्रेष्ठले बेतिनीलाई पर्यटकीय क्षेत्रको रूपमा विकास गर्न बृहत गुरुयोजना बनाउन लागेको बताउँदै आएका छन् ।