अक्सिजन प्लान्ट सञ्चालनमा- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

अक्सिजन प्लान्ट सञ्चालनमा

कान्तिपुर संवाददाता

सुनसरी — बीपी कोइराला स्वास्थ्य विज्ञान प्रतिष्ठानको चार दिनअघि बिग्रेको अक्सिजन प्लान्ट मर्मतपछि आंशिक रूपमा बुधबारबाट सञ्चालन हुन थालेको छ । प्लान्टबाट अक्सिजन उत्पादन रोकिएपछि आइतबारयता बिरामीलाई बेहोस बनाएर गरिने सबैखाले जटिल शल्यक्रिया बन्द भएको थियो ।

प्लान्टबाट अक्सिजन आपूर्ति नहुँदा प्रतिष्ठानका सबै अप्रेसन थिएटरमा दुई दिनसम्म कुनै शल्यक्रिया भएनन् । आकस्मिक शल्यक्रिया गर्नुपर्ने कतिपयलाई अन्यत्र रिफर गर्नुर् परेको प्रतिष्ठानले जनाएको छ । प्रतिष्ठानका मेट्रोन उपेन्द्र यादवले अक्सिजन उत्पादन सुरु भएपछि बिरामीको शल्यक्रिया गर्न थालिएको बताए ।


प्लान्ट मर्मत गर्न आपूर्तिकर्ता काठमाडौंस्थित डाइग्नोकेन प्रालिले ज्वाइन्ट पार्टनर युनिसी इन्डियाबाट इन्जिनियर बोलाएको थियो । प्लान्टले काम थाले पनि स्पेसिफिकेशन र पूर्वसम्झौता अनुसार उत्पादन भने हुन सकेको छैन । ३ करोड २४ लाख रुपैयाँ लागतको उक्त प्लान्टले १६ सय लिटर प्रतिमिनेट शुद्ध अक्सिजन उत्पादन गर्नुपर्नेमा एउटा अक्सिजन जेनेरेटरमा जियोलाइट काम नलाग्ने भएपछि ८ सय लिटर प्रतिमिनेट मात्र उत्पादन गर्दै आएको प्रतिष्ठान स्रोतले जनाएको छ ।


अक्सिन प्लान्ट हेर्न प्रतिष्ठानले इलेक्ट्रोनिक्स इन्जिनियर राहुल मिश्रलाई जिम्मा दिएको छ । मिश्र प्रतिष्ठानको इलेक्ट्रमेट विभागका हुन् । मेडिकल उपकरणमा पर्ने उक्त अक्सिजन प्लान्ट हेर्ने अधिकार नेपाल मेडिकल इन्जिनियरिङ काउन्सिलको आचारसंहिताअनुसार भने मिश्रलाई छैन । इलेक्ट्रोनिक्स उपकरणको जानकार मिश्र मेडिकल उपकरणमा पर्ने अक्सिजन प्लान्टबारे अनभिज्ञ मानिन्छन् । मेडिकल उपकरण हेर्ने बायोमेडिकल इन्जिनियरलाई भने प्रतिष्ठानले अक्सिजन प्लान्ट हेर्ने जिम्मेवारीबाट हटाएको छ ।


प्रकाशित : माघ २, २०७६ ०९:३७
प्रतिक्रिया
पठाउनुहोस्

स्वास्थ्य संयोजकको भरमा पालिका

कान्तिपुर संवाददाता

काठमाडौँ — भोजपुर साल्पासिलिछो गाउँपालिकामा प्रमुख प्रशासकीय अधिकृतको सरुवा भएपछि स्वास्थ्य संयोजक निमित्त प्रशासकीय प्रमुखका रूपमा काम गरिरहेका छन् । तीन जनामात्र कर्मचारी भएकाले स्थानीयले सहज रुपमा सेवा लिन पाएका छैनन् ।

स्वास्थ्य संयोजक जिम्मेवारीमा रहेका जगन्नाथ साहले प्रशासकीय अधिकृतको काम गरिरहेका छन् । दरबन्दी ३५ जनाको रहे पनि उनीसहित तीन जना कर्मचारीमात्र छन् । स्वास्थ्य संयोजक, सहलेखापाल र वडा सचिव छन् । ६ वटा वडा रहेको गाउँपालिकामा वडा तहका कामका लागि समेत सर्वसाधारण घन्टौं हिँडेर गाउँपालिका धाइरहेका छन् ।

वडा तहमा हुने कामका लागि दिनै माया मारेर गाउँपालिकाको केन्द्र चौकीडाँडा धाउनुपर्ने बाध्यता रहेको खगेन्द्र राईले बताए । ‘वडा कार्यालयमा कर्मचारी नभएपछि सबै कामका लागि चौकीडाँडै पुग्नुपर्छ,’ उनले भने, ‘त्यहाँ पनि जानेबित्तिकै काम हुन गाह्रो छ, एउटै कामका लागि दुई दिनसम्म बस्नुपर्छ ।’

प्रमुख प्रशासकीय अधिकृतको सरुवा भएपछि स्वास्थ्य संयोजकलाई कार्यवाहक प्रमुख बनाइएको गाउँपालिका अध्यक्ष महेश राईले बताए । काम धेरै तर कर्मचारी थोरै भएकाले समस्या परेको उनको भनाइ छ । ६ वडामध्ये एक जना मात्र वडा सचिव छन् ।

प्रकाशित : माघ २, २०७६ ०९:३६
पूरा पढ्नुहोस्
प्रतिक्रिया
पठाउनुहोस्
×