न्यायिक समितिबाट न्याय नपाएको गुनासो- प्रदेश १ - कान्तिपुर समाचार

न्यायिक समितिबाट न्याय नपाएको गुनासो

विनु तिम्सिना

विराटनगर — विराटनगर महानगरपालिका–५ की पुजा खतिवडा दाहालले न्यायिक समितिले आफ्नो मुद्दाको सुनुवाइ नगरिदिंदा न्याय नपाएको बताएकी छन् । छिमेकीले रोनक अग्रवालले घर र पर्खाल भत्काइदिएर पीडित बनेकी दाहालले न्यायिक समितिले मुद्दाको सुनुवाइ नगरिदिएको गुनासो गरेकी हुन । 

गत साउनमा अग्रवालले घर निर्माणको क्रममा आफ्नो घरको कम्पाउण्ड पर्खाल र त्यससंगै जोडिएको एक पाखे टहरो भत्काइदिएको गुनासो उनले गरिन् ।


अग्रवालले घरको ‘जग’ खन्न डोजर चलाउँदा आफ्नो जस्ताले छाएको तीन कोठाको एकपाखे घर र पर्खाल पूर्णरुपमा भत्किएपनि आफुले क्षतिपुर्ति नपाएको गुनासो दाहालको छ ।


घर र पर्खाल भत्कीएपछि ठेकेदार आलोक झा, टोल संगठनका सचिब दिपक सुवेदीको रोहबरमा अग्रवालले मंसिर १ गतेसम्म क्षतिपूर्तिबापत ४ लाख ५० हजार रुपैयाँ दिने मौखिक सहमति गरेका थिए । तर, अहिलेसम्म क्षतिपूर्ति नपाएको दाहालले बताइन ।


सहमति अनुरुप अग्रवालले क्षतिपूिर्त रकम नदिएपछि मंसिर ८ गते महानगरपालिको न्यायिक समितिमा उजुरी दर्ता गराएको तर, अहिलेसम्म छलफलका लागि खवर नआएको दाहालको गुनासो छ । ‘मंसिर ८ गते निवेदन दिएकी थिए । तर, अहिलेसम्म न्यायिक समितिकी संयोजक महानगरपालिकाकी उपप्रमुख इन्दीरा कार्कीले छलफलमा बोलाउनु भएको छैन,’ उनले भनिन ।

न्यायिक समितिबाट न्याय नपाएपछि वडा प्रहरी कार्यालय विराटनगर क मा पुनः उजुरी दिएको तर, त्यहाँबाट पनि न्याय नपाएको गुनासो उनको छ ।


अहिले उजुरी फिर्ता लिन विभिन्न समुहले दाबाव दिन थालेको दाहालले बताइन । ज्यान मार्ने धम्की आएको भन्दै उनले मंसिर ८ गते जिल्ला प्रशासन कार्यालयमा सुरक्षाको माग गरेर निवेदन दिएकी छन् ।


पर्खाल भत्काइदिएका अग्रवालले भने घर निर्माणको क्रममा दाहालको पर्खाल भत्किएको स्वीकारे । आँफुले पर्खाल र भत्किएको एक पाखे घर नयाँ बनाइदिने भन्दाभन्दै उनी मुद्दा प्रक्रियामा गएको अग्रवालले बताए ।


विराटनगर महानगरपालिकाकी उपप्रमुख तथा न्यायिक समितिको संयोजक कार्कीले मुद्दाको विषयमा छलफल भइरहेको बताइन् ।

प्रकाशित : पुस १६, २०७६ १६:४१
प्रतिक्रिया
पठाउनुहोस्

वनभोजमा व्यस्त चितवनका हात्ती (फोटो फिचर)

रमेशकुमार पौडेल

चितवन — सौराहामा चलिरहेको हात्ती महोत्सवमा बुधबार हात्तीहरुको ठुलो जमघट थियो । अरु बेला पर्यटकलाई बोकेर जंगल डुल्ने हात्तीहरु केही फुर्सदिला बने । अगाडी उनीहरुलाई मन पर्ने खान्की थियो । केही बेरपछि सबै हात्तीले त्यसलाई मिठो मान्दै खाए । महोत्सव आयोजकहरु यसलाई हात्ती वनभोज अर्थात पिकनिक भन्दै आएका छन् ।

हात्ती महोत्सव आयोजना हुन थालेको १६ वर्ष भयो । महोत्सवका बेला हात्तीका लागि पिकनिक राख्न थालेको पाँच वर्ष भएको छ । हात्तीलाई उखु, बन्दा निकै मनपर्छ । त्यसै गरी भेलीमा पकाएको भात हात्तीका लागि स्वादिष्ट खान्की हो । जसलाई हात्तीको खिर नै भनिन्छ । वनभोजमा यस्तै परिकारहरु थिए ।

‘चामलमा भेली र बिरे नुन राखेर पकाएको खान्की हात्तीले खुबै रुचाउँछ । पशु चिकित्सकसँग परामर्श गरेका थियौं यस्तो खान्की स्वादिलो मात्रै हैन हात्तीलाई पोषिलो र पचाउन सजिलो पनि हुँदो रहेछ’ हात्ती पिकनिकका संयोजक गोकर्ण गिरीले भने । हात्तीको स्वभाव र खानपान सर्वसाधरणले पनि थाहा पाउन यस्तो सार्वजनिक कार्यक्रम उपयुक्त भएको उनको भनाइ छ ।

एउटा हात्तीले दिनमा सरदर ५० देखि ६० किलो खानेकुरा खान्छ । अरु बेला हात्ती चर्नुका साथै हात्ती सञ्चालकहरुले पराल र घाँसमा बेरेर दिएको धान, भेली र चनाको पोको अर्थात् कुची खाने गर्दछन् । समय समयमा भेलीमा पकाएको भात पनि खान्छन् । सौराहामा पर्यटक बोक्ने ६५ निजी हात्ती छन् । त्यो बाहेक चितवन निकुञ्जको र राष्ट्रिय प्रकृति संरक्षण कोषकोसमेत गरेर सवा सय हात्ती सौराहामा छन् । हात्ती पिकनिकमा ८५ हात्ती सहभागि भए ।

प्रकाशित : पुस १६, २०७६ १६:१७
पूरा पढ्नुहोस्
प्रतिक्रिया
पठाउनुहोस्
×