अधिकांश कैदीमा छालाको रोग

कान्तिपुर संवाददाता

विराटनगर — क्षमताभन्दा चार गुणा बढी कैदी राखिएको विराटनगरस्थित मोरङ कारागारका अधिकांश बन्दी अस्वस्थ छन् । धेरैजसोलाई छालाको रोग र डेढ सयभन्दा बढीलाई आँखाको समस्या देखिएको छ । २ सय ५० जना अटाउने क्षमताको कारागारमा ८ सय ३१ पुरुष, ८८ महिला र ७ बालबालिका गरी ९ सय २६ कैदी छन् ।

ZenTravel

हालै विराटनगर महानगरपालिका कार्यालयद्वारा कारागारमा आयोजित शिविरमा परीक्षण गरिएका ३ सय ९६ कैदीमध्ये ३ सय ५० मा छाला रोग देखिएको जेलर सुभाषकुमार लामिछानेले बताए । जीउ चिलाउने समस्याले निदाउन समेत नसकेको कैदीहरूले पीडा पोखे ।

Meroghar

‘आलोपालो अस्पताल लगेर जचाउँछन्, कारागारभित्र पनि कहिलेकाँही स्वास्थ्य शिविर हुन्छ,’ कैदी अभिषेक साहले भने, ‘औषधीले निको त हुन्छ,फेरि भइहाल्छ ।’ क्षमताभन्दा बढी कैदीका कारण अस्वस्थकर वातावरण सृजना भएकाले कारागारभित्र निरन्तर स्वास्थ्य शिविर सञ्चालन हुनुपर्ने नाइके सूर्यविक्रम नेपालले सुझाव दिए । कैदीलाई उपचारका लागि नजिकैको कोसी अञ्चल अस्पताल लगिन्छ ।

कारागारभित्रका ९० प्रतिशत कैदीमा दाद र लुतो जस्तो सर्ने रोग रहेको कोसी अञ्चल अस्पतालका छाला तथा यौन रोग विशेषज्ञ डा.असीत घिमिरेले बताए । उनका अनुसार बाँकी कैदीमा शरीरमा आन्तरिक कारणले हुने चिलाउने समस्या छ । छालाको रोगको उपचारमा दुई सातादेखि दुई महिनासम्म लाग्ने उनले बताए ।

‘सर्ने रोग भएकोले बन्दीको पालैपालो उपचार गराएर समस्या समाधान हुन्न,’डा.घिमिरेले भने,‘सबै कैदीको एकै पटक वा सामूहिक उपचार नगरिएसम्म छाला रोगबाट उनीहरू मूक्त हुँदैनन् ।’ अस्पतालमा सातापिच्छै उपचारका लागि ल्याइने औषत १५ जनामध्ये अधिकांश छालाका रोगी भएको उनले बताए । कारागारको एउटा बेडमा ४ जना सुत्छन् । उनीहरूले एउटै तोलिया, साबुन प्रयोग गर्ने हुनाले सहजै छाला रोग सर्ने गरेको डा.घिमिरेले बताए ।

कारागारले कोसी अस्पताल र जिल्ला प्रशासन कार्यालयलाई पत्र लेखेर सबै बन्दीको एक साथ उपचार सुरु गराउनकालागि पहल गर्नुपर्ने उनले सुझाव दिए । ‘एक वर्ष अघि पनि कारागारमा शिविर गर्दा यहि समस्या देखिएको थियो,’ डा.घिमिरेले भने, ‘त्यति बेला पनि सामूहिक उपचार गर्नुपर्ने सुझाव दिएको थिएँ ।’ कारागारसँग प्रशस्त बजेट नभएकोले कैदीलाई स्वास्थ्य जाँच पछि औषधी र चस्मासमेत उपलब्ध गराइ दिने अनुरोधकासाथ सरोकारवाला निकायलाई पत्र पठाउने जेलर लामिछानेले बताए ।

प्रकाशित : मंसिर २४, २०७६ ११:३४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

‘अब सौर्य ऊर्जामा खर्च नगरिने’

कान्तिपुर संवाददाता

विराटनगर — चालु आर्थिक वर्षमा सौर्य बत्ती जडानका लागि झण्डै डेढ करोड बजेट विनियोजन गरेको विराटनगर महानगरपालिकाले अब सौर्य बत्तीमा लगानी नगर्ने भएको छ । पर्याप्त विद्युत् उत्पादन भइरहेकाले लोडसेडिङको सम्भावना नरहेको भन्दै महानगरपालिकाले सौर्य बत्तीमा बजेट खर्च नगर्ने निर्णय गरेको हो । 

महानगरपालिकाले वैकल्पिक ऊर्जाअन्तर्गत चालु आवमा नगरका विभिन्न वार्डहरूमा सोलार बत्ती जडान गर्न उक्त रकम विनियोजन गरेको थियो । डेढ करोड रुपैयाँ बजेट विनियोजन गरेको थियो । सोलार बत्तीका लागि विनियोजित उक्त रकम अन्य योजनामा खर्च गर्ने महानगरपालिकाले जनाएको छ ।

नगर परिषद्को बैठकले सौर्य बत्ति जडानमा बजेट खर्च नगर्ने निर्णय गरेको प्रमुख प्रशासकीय अधिकृत एकदेव अधिकारीले जानकारी दिए । उनका अनुसार बिजुली पर्याप्त भएको अवस्थामा सोलारमा खर्च गर्नु उपयुक्त नहुने भएकोले खर्च कटौति गरिएको हो ।

विराटनगर महानगरपालिकाले पुष्पलाल चोक पानीटंकी खण्डमा जडान गरेको सौर्य बत्ति प्रभावकारी नभएको गुनासो सर्वसाधारणबाट बढी आइरहेको छ । धुलोले सोलार प्यानल छोपिँदा राम्ररी बत्ति नबल्ने समस्या छ । पछिल्लो समय जलविद्युत् खपत बढाउनु पर्ने अवस्था आएको सन्दर्भमा सौर्य उर्जामा लगानी गर्न नहुने निष्कर्षमा महानगरपालिका पुगेको पूर्वाधार विकास समितिका संयोजक तथा वडा नम्बर ४ का अध्यक्ष देवेन्द्रराज पोखरेलले बताए ।

सौर्य बत्तीका लागि विभिन्न वार्डहरूले नगरसभाबाट योजना पारित गरेर बजेट विनियोजन गरेका थिए । महानगरपालिका वडा ९ ले एक करोड १ लाख ५० हजार रुपियाँ सौर्य बत्ती तथा सहर सौन्दर्यताकालागि विनियोजन गरेको थियो । तर योजना अघि बढाउने तयारी भइरहेको बेला कार्यपालिका बैठकले सौर्य उर्जामा लागानी नगर्ने निर्णय गरेपछि उक्त रकम नगर सौन्दर्यकरणमा खर्च गर्ने योजना बनाइरहेको जनाएको छ ।

वडा १० ले पनि सौर्य बत्तीका लागि भन्दै २५ लाख रुपैयाँ बजेट विनियोजन गरेको थियो । त्यस्तै वडा १३ र ५ ले १०–१० लाख रुपैयाँका दरले सौर्य उर्जामा बजेट विनियोजन गरेको थियो । सबै वडाले अब सौर्यऊर्जाका लागि विनियोजन गरेको बजेट अब विद्युतिकरणलगायत अन्य योजनामा खर्च गर्नुपर्ने छ । आगामी पुसमा बजेट संशोधनमार्फत योजना परिवर्तनहुने सम्बन्धित वडाध्यक्षहरूले जानकारी दिए ।

प्रकाशित : मंसिर २४, २०७६ ११:३२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×