सडक अनुगमन : स्थानीय तहसँग समन्वय गर्न निर्देशन

कान्तिपुर संवाददाता

ओखलढुंगा — सडक डिभिजन कार्यालयले खनेको सडकले क्षति पुर्‍याउँदा पीडित नगरपालिकामा उजुरी लिएर जान्छन् । नगरपालिकालाई भने सडकको कामबारे जानकारी नै हुँदैन ।

‘नगरक्षेत्रको व्यक्तिको घर सडकले जोखिम हुँदा न ठेकेदार सम्पर्क आउँछन्, न त सडक डिभिजन जवाफदेही हुन्छ,’ सिद्धिचरण नगरपालिकाका मेयर मोहनकुमार श्रेष्ठले भने, ‘संघ र प्रदेशअन्तर्गतका कार्यक्रम सञ्चालन हुँदा स्थानीय तहसँग समन्वय त के जानकारी पनि हुँदैन ।’

जिल्लाको साँघुटार–घोराखोरी–कोषहाट–ओखलढुंगा सडकको स्थलगत अनुगमन र अन्य विकासको अवस्था बुझ्न आएको संघीय संसद्को विकास समितिलाई सिद्धिचरण नगरपालिकाका मेयर श्रेष्ठले गुनासो पोखेका हुन् । बुधबार जिल्ला समन्वय समितिको हलमा आयोजित अन्तर्क्रियामा अन्य स्थानीय तहका प्रमुखको पनि एकै किसिमको गुनासो थियो ।

सरोकारवाला सरकारी निकायका प्रतिनिधिलाई संसद्को विकास समितिका सभापति कल्याणी खड्काले निर्देशन दिइन् । ‘अबदेखि सम्बन्धित संघ र प्रदेश मातहतका सबै कार्यालयले विकासका काम गर्दा अनिवार्य स्थानीय तहसँग समन्वय गर्नु ।’ सभापति खड्काले भनिन्, ‘समस्या आउँदा हामीलाई सम्झिने र स्थानीय तहलाई दोष दिने अनि काम सुरु गर्ने बेला समन्वय नगर्ने ? अब अनिवार्य समन्वय गर्नुस् ।’ उनले अनुगमन गरिएको आयोजनाको सम्बन्धमा समितिले आवश्यक सहयोग मात्र नभएर काम नगर्ने पक्षलाई कारबाहीका लागि सिफारिस गर्ने बताइन् । साँघुटार–घोराखोरी सडक कालोपत्रे गर्ने भनेर बजेट विनियोजन गरेको वर्षौं बित्दासमेत काम नभएपछि विकास समितिको
टोली स्थलगत अनुगमनका लागि आएको थियो ।

अनुगमनसँगै जिल्लाभित्र अवरुद्ध भएका विकासका संरचनाका बारेमा समेत सरोकारवालाले समितिलाई जानकारी गराएको थियो ।

मान्द्रे दोभानस्थित मोलुङ खोलाको पुल, स्वास्थ्य, शिक्षाका भवन जस्ता संरचना निर्माणमा अलपत्र पारेका ठेकेदारलाई कारबाही गर्नुपर्ने स्थानीयले भनाइ थियो । तर सार्वजनिक खरिद ऐनले ठेकेदारलाई संरक्षण गरेको कारण संशोधन हुँदा त्यसलाई ध्यान दिनसमेत सुझाव दिए । भौतिक विकासको काममा जिल्ला ठेकेदारबाट बढी पीडित जिल्लाका रूपमा रहेको समितिका सदस्य तथा सांसद यज्ञराज सुनुवारले बताए ।

समितिका सदस्यद्वय यज्ञराज सुनुवार, बिना थापा र सभापति कल्याणी खड्काको टोलीले तीन दिन लगाएर रामेछापको साँघुटार हुँदै ओखलढुंगाको विभिन्न आयोजना अनुगमन गरेको हो । प्रदेश सांसद मोहनकुमार खड्काले प्रदेश राजधानी विराटनगर जोड्ने द्रुतमार्गको रूपमा रहने उदयपुरको घुर्मी–चतरा सडकखण्डको काम तत्काल सुचारु गर्न समितिले पहल गर्न सुझाव दिए । त्यसैगरी मध्यपहाडी राजमार्गअन्तर्गत पर्ने सिन्धुली खण्डका अलपत्र पुलको काम अघि बढाउनसमेत समितिले पहल गर्नुपर्ने बताए । सभापति खड्काकै टोलीले गत जेठमा सिन्धुली खण्डमा पर्ने सोखु, बादुरा खोलालगायतको पुल अनुगमन गरे पनि कुनै प्रगति हुन सकेको छैन ।

प्रकाशित : कार्तिक २९, २०७६ ११:५९
प्रतिक्रिया
पठाउनुहोस्

नगरपालिका परिसरमै फोहोरको थुप्रो

फोहोर मैला व्यवस्थापन केन्द्र बनाउने टुंगो अझै लागेन
भवानी भट्ट

(कञ्चनपुर) — बिहानै ट्र्याक्टर र टिपरहरू फोहोर संकलनका लागि बजारतिर निस्कन्छन् । एक/डेढ घण्टापछि सबै फोहोर ल्याएर भीमदत्त नगरपालिकाको कार्यालयभित्रै फर्किन्छन् । बजार क्षेत्रबाट संकलन भएको फोहोर मैला कार्यालय परिसरको एउटा कुनामा फालिन्छ । फोहोर मैला व्यवस्थापन केन्द्र डम्पिङ साइट नहुँदा महेन्द्रनगर बजार क्षेत्रको फोहोर यसरी नै फाल्ने गरिएको छ । 

नगरपालिकाले फोहोर फाल्ने गरेको ठाउँको एकातिर रेडक्रससंँगै जोडिएको महाकाली अस्पताल छ भने अर्कोतिर आँखा अस्पताल छ । फोहोरको दुर्गन्ध अस्पतालसम्मै पुगेको हुन्छ । फोहोर भएको आसपास त दुर्गन्धले हिड्नै सकिँदैन । त्यहि फोहोर खाएर बजार क्षेत्रका छाडा चौपायाहरू बिरामीसमेत हुने गरेका छन् । फोहोर मैला व्यवस्थापन केन्द्र निर्माणको कुरा सुरु भएको पनि एक दशक भन्दा बढी भइसक्यो ।

फोहोर मैला व्यवस्थापनका लागि अध्ययन अवलोकन आदीका नाममा अहिलेसम्म कति खर्च भयो कुनै हिसाब–किताब छैन । पछिल्लो एक दशकमा मात्रै ५/६ पटक विभिन्न ठाउँमा विभिन्न टोलीले अवलोकन गरिसकेका छन् । यसबाहेक सेमिनार र गोष्ठीहरू पनि निरन्तर भइरहेकै छन् । तर हालसम्म पनि ठाउँको टुंगो लाग्न सकेको छैन । नगरपालिकाले विभिन्न ठाउँमा सम्भाव्यता अध्ययन पनि गरेको छ । तर सुरुमा स्थानीय सहमत भएपनि अन्तिममा आएर विरोध गर्ने भएका कारण फोहोर मैला व्यवस्थापन केन्द्र निर्माणमा निकै समस्या भइरहेको छ ।

‘अहिले विभिन्न ठाउँबाट खाल्डाखुल्डी पुर्न माग आएको छ, बजारको फोहोर त्यहि खाल्डामा व्यवस्थापन गरिरहेका छौं,’ फोहोर मैला व्यवस्थापन शाखामा कार्यरत भीमदत्त नगरपालिकाका योजना अधिकृत पुष्पराज भट्टले भने, ‘त्यहि भएर फोहोर व्यवस्थापनमा सहज भएको छ ।’ उनका अनुसार खाल्डा खुल्डी भर्न नगरपालिकामा थुप्रै निवेदन आएका छन् । यसले नगरपालिका परिसरमा थुप्रिने फोहोर घटाएको छ ।

महेन्द्रनगर बजार क्षेत्रमा मात्रै दैनिक १० टनका हाराहारीमा फोहोर संकलन हुने गरेको छ । नगरपालिकाले २ ट्र्याक्टर, १ टिपर र ३ इलेक्ट्रोनिक रिक्साहरू फोहोर संकलनका लागि प्रयोग गरिरहेको छ । फोहोर संकलनमा ३५ कर्मचारी परिचालन भएको योजना अधिकृत भट्टले बताए । तर फोहोर व्यवस्थापनको ठाउँ अभावले नगर क्षेत्र दुर्गन्धित हुने अवस्था आएको छ ।

केही वर्षअघि सम्म बजार क्षेत्रबाट संकलन गरेको फोहोर थुपार्न मात्रै ठाँउको खोजी भइरहे पनि अहिले भने फोहोर मैला व्यवस्थापन केन्द्र निर्माणको तयारी भईरहेको हो । एसियाली विकास बैंकको क्षेत्रिय सहरी विकास आयोजनाअन्तर्गत भीमदत्त नगरपालिकामा पुर्वाधार निर्माणका लागि ३ करोड बढी बजेट आएको छ । उक्त योजनाको पहिलो शर्त्त फोहोर मैला व्यवस्थापन केन्द्र नै छ । आयोजना अन्तरगत अहिले साढे १३ किमि कालोपत्रे सडक निर्माणका लागि भीमदत्त नगरपालिकाले टेन्डर आह्वानको सूचना प्रकाशित गरिसकेको छ । फोहोर मैला व्यवस्थापन केन्द्रका लागि पनि उपयुक्त ठाउँ छनोट गरी आवश्यक प्रक्रिया अघि बढाउन भीमदत्त नगरपालिका ११ का अध्यक्ष प्रेम जैशीको संयोजकत्वमा कार्यदलसमेत गठन गरेको छ ।

‘अब कार्यदलले उपयुक्त स्थान छनोट गरेर प्राविधिक रुपमा समेत अध्ययन गरेपश्चात काम अगाडी बढाइनेछ’ नगरपालिकाको प्राविधिक शाखाका प्रमुख इन्जिनियर हिमालयसिंह ऐरले भने, ‘विगतमा हामीले हेरेकै ठाउँलाई नै प्राथमिकतामा राखिनेछ ।’

यसअघि नगरपालिकाले वडा ९ को मटेना क्षेत्रका सामुदायिक वनमा फोहोर मैला व्यवस्थापन केन्द्र बनाउने तयारी गरेको थियो । तर उक्त क्षेत्रका स्थानीयको विरोधपछि काम अगाडी बढ्न सकेन । बिहिबार सर्वदलिय वैठक बसेर कार्यदलले छनौट गरेको स्थानमा काम अघि बढाउन सबैले सहयोग गर्न सहमति समेत भएको ऐरले जानकारी दिए ।

प्रकाशित : कार्तिक २९, २०७६ ११:५५
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT