किनमेल सीमापारि

कान्तिपुर संवाददाता

काँकडभिट्टा — सीमावर्ती भारतीय बजार पानीट्यांकीमा यतिबेला चहलपहल बढेको छ । पर्वका बेला किनमेल गर्ने ग्राहकको बाक्लो भीडले भारतीय बजार व्यस्त हुँदा वारिका नेपाली व्यवसायी भने फुर्सदिला देखिन्छन् । 

चाडपर्वका बेला नेपाली उपभोक्ता सीमापारिकै बजार पुग्छन् । उपभोग्य वस्तुको मूल्य अन्तरले ग्राहक उता तानिएका हुन् । ‘यता सस्तो पाइन्छ त्यही भएर आएको दमककी गृहिणी सीमा शंकरले भनिन्, ‘दुई चार पैसा भए पनि सस्तो हुँदा फाइदा हुन्छ ।’

‘नेपाली उपभोक्ताका कारण बजारमा खुट्टा राख्ने ठाउँ छैन’, स्थानीय व्यवसायी मुकेश राजवंशीले भने, ‘यो भीड अझै केही दिन जारी रहने छ ।’ भारतकापानीट्यांकी, नक्सलबारी, वागडोग्रा र सिलिगुडीसम्मै नेपालीको भीड देखिन्छ । पानीट्यांकी नेपालको पूर्वी भेगका सर्वसाधारणको मुख्य किनमेल गन्तव्य हो । नक्सलबारी झापाको उत्तरी गाउँ बाहुनडाँगीका साथै इलामको सलकपुरका बासिन्दाको मुख्य बजार हो ।

प्रहरीका अनुसार दैनिक ५ हजारभन्दा बढी उपभोक्ता किनमेलका लागि मेची तरिरहेका छन् । ५ हजार नेपालीले दैनिक न्यूनतम ५० लाख रुपैयाँ भन्दा बढी रकम भारतीय बजारमा खर्चिरहेका छन् । मेची उद्योग वाणिज्य संघका सदस्य सन्दीप ओलीले नेपाली उपभोक्तालाई स्थानीय बजारमै आकर्षित गर्न नसक्नु व्यवसायीको कमजोरी रहेको स्वीकार्छन् । ‘पारिभन्दा सस्तोमा सामान उपलब्ध गराउन सक्दा उपभोक्ता पारि तरेर जानुपर्ने थिएन,’ उनले भने, ‘यसो गर्दा हाम्रो पैसा बिदेसिने थिएन ।’

कुनै समय ‘हङकङ बजार’ को उपमा पाएको झापाकै चर्चित धुलाबारी बजारमा पनि खासै चमक छैन । पहिले यो बजारका मुख्य ग्राहक भारतीय थिए । अहिले भारतीय त परको कुरा नेपाली ग्राहक पाउन पनि सिला खोज्नु पर्ने स्थिति छ ।

प्रकाशित : आश्विन १८, २०७६ १०:५४
ADVERTISEMENT
प्रतिक्रिया
पठाउनुहोस्
ADVERTISEMENT

एनआरएनए स्पोर्ट्स एकेडेमी स्थापना

कान्तिपुर संवाददाता

काठमाडौं — गैरआवासीय नेपाली संघ नेपाल एनआरएनएले स्पोर्ट्स एकेडेमी गठन गरेको छ  । शुक्रबार एनआरएनएका अध्यक्ष भवन भट्ट र अन्तर्राष्ट्रिय समन्वय परिषद् आईसीसीका युवा संयोजक सुदन थापाले संयुक्त रूपमा एकेडेमीको लोगो सार्वजनिक गरे  ।

लोगोमा एनआरएनको ६ क्षेत्रको प्रतिनिधित्व हुने गरी ६ ओलम्पिक रिंग राखिएको छ ।

कार्यक्रममा अध्यक्ष भट्टले विश्वभर रहेका गैरआवासीय नेपाली खेलाडी, प्रशिक्षक प्राविधिक र खेल विज्ञहरूको ज्ञान सीपलाई नेपाली खेलकुदको विकासमा उपयोग गर्ने र एनआरएनको खेल प्रतिभालाई खेलकुदको मूलधारमा ल्याउनका निम्ति स्पोर्ट्स एकेडेमीको गठन गरेको जानकारी दिए ।

आईसीसी युवा परिषद्का संयोजक सुदन थापाले स्पोर्ट्स एकेडेमीले एनआरएनएको पहिलो र दोस्रो पुस्ताका खेलाडीहरूलाई अभियानमा जोड्ने बताए । ‘एकेडेमीले एकातिर विश्वभरका गैरआवासीय खेलाडीहरूलाई एकजुट पार्नेछ । अर्कोतर्फ नेपाली खेलकुदमा भौतिक पूर्वाधार निर्माणदेखि खेलाडीहरूलाई अन्तर्राष्ट्रिय पदक दिलाउने अभियानसम्ममा सघाउनेछ,’ उनले थपे ।

थापाले आठौं राष्ट्रिय खेलकुद प्रतियोगितामार्फत एनआरएनएले एउटा विभागीय टोलीको हैसियत प्राप्त गरिसकेकोले त्यो अभियानलाई व्यवस्थित पार्न पनि एकेडेमीले भूमिका बताए । पत्रकार सम्मेलनमा जनाइए अनुसार विश्वका ८३ मुलुकमा रहेका गैरआवासीय नेपालीहरूमा ३० देखि ४० हजार सम्मको खेलकुद क्षेत्रमा प्रत्यक्ष संलग्नता छ । खेलकुदका विभिन्न गतिविधिहरू समय समयमा भएपनि त्यो व्यवस्थित भने हुन सकेको छैन ।

पत्रकार सम्मेलनमा एनआरएनएले तत्काल चार विभिन्न खेलकुद कार्यक्रमहरू सञ्चालन गर्ने जानकारी पनि दिएको छ । जस अनुसार अक्टोवर ११ मा एनआरएनए हेरिटेज वाकाथन हुनेछ । एनआरएनए स्पोर्ट्स एकेडेमीका निम्ति दौडको नारा दिइएको उक्त वाकाथन स्वयम्भूदेखि सुरु भएर पशुपतिमा टुंगिने र त्यसमा २ सय बढी खेलाडीहरूले भाग लिने अपेक्षा गरिएको छ ।

अक्टोबर १३ मा एनआरएन गल्फ च्याम्पियनसिप, अक्टोबर १४ मा चौथो एनआरएन फुटसल प्रतियोगिता र सोही दिन एनआरएनए स्पोर्ट्स मिट हुनेछ ।

प्रकाशित : आश्विन १८, २०७६ १०:३४
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT