विराटचोक–घिनाघाट सडक ४ लेनको बन्दै

कान्तिपुर संवाददाता

(मोरङ) — विराटचोक–घिनाघाट सडक चार लेनको बन्ने भएको छ । प्रदेश सरकारले गौरवको आयोजनाअन्तर्गत सडकलाई नमुना बनाउन लागेको हो । 

प्रदेश १ का मुख्यमन्त्री शेरधन राईले सडकको सोमबार ग्रामथान गाउँपालिकास्थित नेताचोकमा शिलान्यास गरे । ‘यो प्रदेशकै नमुना सडकको रूपमा निर्माण हुन लागेको छ,’ उनले भने, ‘सुशासनसहितको यो सडक बन्द, हडताल निषेधित रहन्छ ।’

यो सडक निर्माण भएपछि विराटनगर–इटहरीको सवारी चाप घट्नुका साथै पूर्वबाट विराटनगर आउन छोटो बाटोसमेत हुने उनको भनाइ थियो । निर्माण कम्पनीलाई गुणस्तरहीन काम गर्ने छुट नहुने र २४ सै घण्टा निगरानी गर्ने प्रतिबद्धता जनाए ।

प्रदेश सरकार मातहतका पूर्वाधार विकास कार्यालय मोरङले विराटचोक–घिनाघाट २२.७ किलोमिटर सडकलाई तीन खण्डमा विभाजन गरेर ठेक्का लगाएको छ । विराटचोकदेखि १० किलोमिटर नेताचोकसम्म र नेताचोकदेखि मिलनचोकसम्म अर्को १० किलोमिटर गरी
२० किलोमिटरको २ खण्ड ठेक्का लगाएको हो ।

यसअघि सडक डिभिजन कार्यालय विराटनगरले बर्सेनि ६ महिना लगाएर सडकको निर्माण गर्ने र ३ महिना नबित्दै भत्किने गरेको थियो । सडक गत आर्थिक वर्षमा प्रदेश सरकार मातहत संघीय सरकारले हस्तान्तरण गरेको हो ।

पूर्वाधार विकास कार्यालय प्रमुख सुशील श्रेष्ठले ठेक्का गरिएको दुवै सडक खण्ड श्रेष्ठ/रमन/एपेक्स जेभी काठमाडौंले ठेक्का लिएको बताए । १ अर्ब ६० करोड रुपैयाँ लागतमा ठेक्का आह्वान गरिएको थियो ।

प्रकाशित : भाद्र २५, २०७६ १२:४०
प्रतिक्रिया
पठाउनुहोस्

मेडिकल कलेजविरुद्धको आन्दोलनमा लागेका चन्दका छोरा पक्राउ

रमेशकुमार पौडेल

चितवन — प्रहरीले चितवन मेडिकल कलेजविरुद्ध आन्दोलनको अगुवाइ गरेका प्रकाश चन्दलाई बुधबार बिहान भरतपुरबाट गिरफ्तार गरेको छ । प्रकाश प्रतिबन्धित नेपाल कम्युनिष्ट पार्टीका नेता नेत्रविक्रम चन्दका छोरा हुन् ।

प्रकाशको अगुवाईमा नौ दिनदेखि चितवन मेडिकल कलेजको शिक्षण अस्पताल गेट अगाडि दिनहुँ प्रदर्शन हुँदै आएको छ ।

विद्यार्थीहरुले माग राखेर विरोध प्रदर्शन गर्दै आए पनि बुधबार अस्पताल प्रशासन भित्रै छिर्ने तयारी गरेका कारण उनीहरुलाई नियन्त्रणमा लिनु परेको चितवन जिल्ला प्रहरी कार्यालयका प्रहरी उपरीक्षक (एसपी) दानबहादुर मल्लले बताए । प्रकाश चन्दसहित १५ जना विद्यार्थीलाई नियन्त्रणमा लिइएको उनले जानकारी दिए । विद्यार्थी पक्राउ परे पनि अस्पताल मुल गेट अगाडिको धर्ना र प्रदर्शन जारी नै रहेको छ ।

नाराबाजी गर्दै रहेका विद्यार्थीले प्रकाशलाई धर्नास्थलभन्दा केही परबाट प्रहरीले नियन्त्रणमा लिएको बताए । यसै गरी पक्राउ पर्नेमा विद्यार्थी महिला पनि रहेको तर उनीहरुलाई समाउने बेलामा महिला प्रहरीहरु कोही पनि नरहेको उनीहरुले जानकारी दिए । विद्यार्थीले सरकारले निर्धारण गरेको शुल्क मात्रै लिनुपर्ने र बढी लिएको सबै शुल्क फिर्ता गर्नुपर्ने लगायतका मागहरु राखेका छन् ।

मेडिकल कलेजको प्रशासनले बुधबार नै प्रेस विज्ञप्ती निकालेर विद्यार्थीले राखेका धेरै मागहरु सरकार र सरकारका अन्य निकायहरुसँग सम्बन्धित रहेको बताएको छ । अस्पताल र कलेज प्रशासनसँग सम्बन्धित मागहरु वार्ता र छलफलबाट पुरा गर्न अस्प्ताल प्रशासन तयार रहेको विज्ञप्तीमा उल्लेख छ । तर आन्दोलन गरेर अस्पतालको सेवा प्रवाहमा बाधा हाल्ने, सञ्चालकहरुलाई धम्की दिने जस्ता गैर जिम्मेवार र गैरकानुनी काम भएको अस्पताल प्रशासनले जारी गरेको विज्ञप्तीमा जनाइएको छ ।

प्रकाशित : भाद्र २५, २०७६ १२:३७
पूरा पढ्नुहोस्
प्रतिक्रिया
पठाउनुहोस्