ट्यांकी चुहियो, १३ सय परिवारले पानी पाएनन् 

एलिसा श्रेष्ठ

भोजपुर — दुई महिनादेखि ट्यांकीबाट पानी खेर गइरहेको छ । तर, व्यवस्थापनमा उपभोक्ता समितिको ध्यान गएको छैन । सिलिचुङ खानेपानी उपभोक्ता समितिले भोजपुर नगरपालिका ९, काफलेको घेंगरस्थित खानेपानीको ट्यांकीबाट खेर गइरहेको पानी जोगाउन चासो दिएको छैन ।

सदरमुकामलगायत आसपासका करिब १ हजार ३ सय ८५ घरमा वितरण गर्दै आएको उक्त खानेपानीको दुरुपयोग भएकोमा स्थानीय आक्रोसित बनेका छन् । भोजपुर नगरपालिका १२, टक्सारका अधिकांश बस्तीमा खानेपानी संकट भइरहेका बेला उपभोक्ता समितिले चुहावट भएको खानेपानी ट्याङ्कीको मर्मतसम्भारमा बेवास्ता गरेको गरेको स्थानीयको आरोप छ ।

प्रतिसेकेन्ड करिब डेढ लिटरको गतिले खेर गइरेहेको उक्त खानेपानी करिब साढे ३ सय घरधुरीलाई पुग्ने स्थानीय हेरालु कमला पोखरेलले बताइन् । सदरमुकामदेखि धापखर्क जाने मुलबाटोमै पर्ने उक्त ट्यांकीबाट खेर गइरहेको पानीमा दिनहुँ समितिका पदाधिकारी आउजाउ गर्ने गरे पनि जोगाउन चासो नदेखाएको स्थानीय सम्झना कार्कीले बताइन् ।

‘पानी खेर गइरहेको देखेको २ महिनाभन्दा धेरै भइसक्यो’ उनले भनिन्, ‘दिनहुँ त्यही बाटो भएर समितिका पदाधिकारी हिँड्छन् तर अझैसम्म मर्मत गर्ने सुरसार छैन ।’ ट्यांकी वरपर फोहोर, रूखका जराहरू पलाएको, लेउ लागेको, झाडी उम्रिएको छ ।

समितिले ट्याङ्की मर्मत गर्ने कर्मचारीको अभावमा खानेपानीको व्यवस्थापन गर्न समस्या भएको जनाएको छ । पर्याप्त कर्मचारी नहुँदा समस्या भएको समितिका सचिव विनम श्रेष्ठले बताए । ०७२ सालको महाभूकम्पले खानेपानीको मूल मुहान रहेको भोजपुर नगरपालिका ५, बोखिमको भुल्के, डढुवा, तीनधारे र जोरसाँघुका मुहानका सतह क्रमिक घट्न थालेपछि खानेपानी आपूर्तिमा समस्या बढ्दै गएको छ ।

गत वर्ष नै वित्तीय सम्झौताअघि टेम्के मैयुङ गाउँपालिका १, तिम्मामा पर्ने तिनभंगालेबाट खानेपानी ल्याउन तेस्रो साना सहरी खानेपानी तथा सरसफाई आयोजना अन्तर्गत एसियाली विकास बैंकको समेत सहयोगमा ७० करोड ९१ लाख ९९ हजार १ सय ९४ रुपौयाँ लागतमा आयोजना सञ्चालन गर्न लागिएको थियो ।

भोजपुर नगर खानेपानी तथा सरसफाई आयोजनासँग नगरपालिका र सिलिचुङ खानेपानी तथा सरसफाई मूल उपभोक्ता समितिबीच ६८ करोड ५२ लाख ६० हजार १ सय ९४ लागतको वित्तीय सम्झौता भएको थियो ।

प्रकाशित : भाद्र २०, २०७६ १०:२१
प्रतिक्रिया
पठाउनुहोस्

मृतकका परिवारलाई प्रवासीको सहयोग 

एलिसा श्रेष्ठ

काठमाडौँ — पहिरोमा मृत्यु भएकाका परिवारलाई भोजपुर हातेमालो सेवा समाज यूएईले आर्थिक सहयोग गरेको छ ।

सामाजले भोजपुरको टेम्केमैयुङ गाउँपालिकाका मृतक जनक विकको परिवारलाई २५ हजार ९ सय ७९, रामप्रसाद राई गाउँपालिका–७ बासीखोराका जगतबहादुर राईको परिवारलाई २५ हजार ९ सय ७९ र साही गाउँपालिका–५ मानेभञ्याङमा ज्यान गुमाएकाका परिवारलाई ५२ हजार ७ सय ७५ सहयोग गरेको हो । आर्थिक सहयोग रामप्रसाद राई गाउँपालिकाका मृतकका परिवारलाई गाउँपालिका अध्यक्ष विजय राई र टेम्केमैयुङ गाउँपालिकामा अध्यक्ष ध्रुवराज राईले हस्तान्तरण गरेका समाजका केन्द्रीय अध्यक्ष भीम थापाले जानकारी दिए ।

साउदीबाट सुदिप बस्नेतले पठाएको १५ हजार ४ सय ५५ रुपैयाँ सहयोग गरिएको समाजका वरिष्ठ उपाध्यक्ष छिरिङ शेर्पाले बताए ।

समाजले रकम संकलन गर्न ३ जनाको संयोजकत्वमा समिति गठन गरेको थियो । गत असारको अरिवल वर्षात्‌‌ले रामप्रसाद राई गाउँपालिकामा ४ जना र टेम्केमैयुङ गाउँपालिकामा १ जनाको मृत्यु भएको थियो ।

प्रकाशित : भाद्र १५, २०७६ १३:०८
पूरा पढ्नुहोस्
प्रतिक्रिया
पठाउनुहोस्