राधाकृष्ण भव्य रथयात्रा

कान्तिपुर संवाददाता

मोरङ — विराटनगरमा शनिबार भव्य रूपमा राधाकृष्णको रथयात्रा निकालिएको छ । श्रीकृष्ण जन्माष्टमीको भोलिपल्ट रथयात्रा निकाल्ने चलन छ । राधाकृष्ण आरुढ खटलाई नगर परिक्रमा गराउने चलन १९८८ सालदेखि सुरु भएको हो ।

विराटनगरमा शनिबार निकालिएको रथयात्राको डोरी तान्दै भक्तजन

खटयात्राबाट सुरु भएको भगवान राधाकृष्णलाई नगर परिक्रममा गराउने चलन २०२५ सालदेखि रथयात्रामा परिणत भएको हो । यो रथयात्राको ८९ औं शृङ्खला हो । रथयात्रामा सहभागी हुन प्रदेश १ र २ का साथै छिमेकी भारतको विहारबाट समेत उल्लेख्य मात्रामा भक्तजन आएका थिए । रथयात्रामा हेलिकप्टरबाट पुष्पवृष्टि गरिएको थियो ।

कृष्णजन्माष्टमीको भोलिपल्ट झापाको विर्तामोड नगरपालिका ३ विर्ताबजारमा दधिकाध खेलमा नरिवलका लागि प्रतिस्पर्धा गर्दै युवकहरू । तस्बिर : अर्जुन राजवंशी/कान्तिपुर
कृष्ण जन्मेको खुसियालीमा 'दधिकाद’
झापा– आदिवासीहरू ‘दधिकाद’ खेल खेलेर श्रीकृष्ण जन्माअष्टमी पर्व हर्षोल्लाससाथ मनाएका छन् । भगवान् श्रीकृष्णको ‘जन्म’
भएको खुसियालीमा दधिकाद खेल्ने चलन छ । शनिबार जिल्लाका विभिन्न स्थानमा दधिकाद खेलको आयोजना गरिएको थियो । दधिकाद राजवंशी, ताजपुरिया, माझीलगायतका जातिले परापूर्वकालदेखि खेल्दै आएको खेल हो । यस खेललाई ‘बहादुर’ खेलका रूपमा समेत लिने गरिन्छ । मुलुकभर शुक्रबार श्रीकृष्ण जन्माष्टमी पर्व मनाइएको थियो ।

‘तीथिअनुसार शुक्रबार राति भगवान् श्रीकृष्णको जन्म भएको हो । भगवानको जन्म भएको खुसियालीमा भोलिपल्ट दधिकाद खेल आयोजना गरिएको हो’ बिर्ताबजारका नेभालाल राजवंशीले भने, ‘द्वापर युगामा ग्वालाहरूले कृष्ण जन्मिएको खुसीयाली दही पोखेर उत्सव गरेको सम्झनामा यो खेल मनाउने परम्परा बसेको हो ।’

प्रकाशित : भाद्र ८, २०७६ १०:०८
प्रतिक्रिया
पठाउनुहोस्

सातै सचिव हेरफेर

कान्तिपुर संवाददाता

विराटनगर — प्रदेश १ मा रहेका सातवटै मन्त्रालयका सचिवहरूको सरुवा भएको छ । सचिवहरूलाई संघीय सरकारका मन्त्रालयमा सुरुवा गरिएको हो । अब वरिष्ठ सहसचिवहरूले मन्त्रालयको सचिवको जिम्मेवारीमा आउने भएका छन् ।

प्रदेशमा सरुवा भएका सबै ५ वर्षभन्दा बढी समयदेखि सहसचिवका रूपमा कार्यरत सिनियर व्यक्तिहरू रहेको प्रमुख सचिव सुरेश अघिकारीले जनाए । कनिष्ट सहसचिवहरूलाई प्रदेश मन्त्रालयमा पठाउने र छिटोछिटो सरुवा गर्ने गर्दा प्रदेश सरकारको काम नै प्रभावित भइरहेको थियो । अब भने सिनियर सचिवहरू आएको र एक वर्ष हाराहारी उनीहरू प्रदेशमै बस्ने भएकाले काममा सहज हुने उनले बताए ।

निमित्त सचिवको भरमा चलिरहेको आन्तरिक मामिला तथा कानुन मन्त्रालयमा हरिप्रसाद मैनालीलाई जिम्मेवारी दिइएको छ । गोपाल पराजुलीले राजिनामा गरेपछि मन्त्रालयको सचिवको जिम्मेवारी मुख्यमन्त्री कार्यालयका कानुनसचिव भरतमणि रिजालले निर्वाह गर्दै आएका थिए ।

आर्थिक मामिला तथा योजना मन्त्रालयको सचिवको जिम्मेवारी संघीय सरकार अन्तर्गत सार्वजनिक वित्त व्यवस्थापन तालिम केन्द्रको प्रमुखमा कार्यरत दामोदर रेग्मीलाई दिइएको छ । मन्त्रालयका सचिव जीवन सिटौलाको अर्थमै सरुवा भएको छ । अनियमितता विवादमा मुछिएका पूर्वाधार विकास मन्त्रालयका सचिव मनोज घिमिरेको साउन दोस्रो साता सरुवा भएपछि मन्त्रालय कामुसचिव राजेश घिमिरेले चलाइरहेका थिए । मन्त्रालयको सचिवमा ऊर्जा मन्त्रालयमा कार्यरत सुशीलचन्द्र तिवारीलाई जिम्मेवारी दिइएको छ ।

भूमि व्यवस्था, कृषि तथा सहकारी मन्त्रालयमा कृषि तथा पशुपन्छी विकास मन्त्रालयका पशुपन्छी तथा मत्स्य विकास महाशाखाका प्रमुख डा विमलकुमार निर्मललाई सचिवको रूपमा सरुवा गरिएको छ । मन्त्रालयका सचिव हस्तबहादुर विष्टको कृषि मन्त्रालययमै सरुवा भएको छ । त्यस्तै सामाजिक विकास मन्त्रालयका सचिव हरिप्रसाद दाहाल संघीय मन्त्रालयमा तानिएका छन् ।

मन्त्रालयको सचिवमा महिला तथा ज्येष्ठ नागरिक मन्त्रालयका सिनियर सहसचिव वीरबहादुर राईलाई ल्याइएको छ । उद्योग, पर्यटन, वन तथा वातावरण मन्त्रालयका सचिव बद्री ढुंगानाको संघीय मन्त्रालयमा सरुवा भएको छ । उनको स्थानमा वनस्पति विभागका महानिर्देशक सन्जिवकुमार राईलाई पठाइएको छ । दुई जना सचिवको दरबन्दी रहेको मुख्यमन्त्री तथा मन्त्रिपरिषदको कार्यालयमा मुकुन्द घिमिरेलाई तानिएको छ ।

संघीय मन्त्रिपरिषदको बैठकमा वरिष्ठ सहसचिवलाई प्रदेशका मन्त्रालयमा सरुवा गर्ने निर्णय गरिएको थियो । सोही निर्णयअनुसार संघीय सरकारले सातवटै प्रदेशमा ५६ जना सिनियर सहसचिव सरुवा गरेको हो ।

संघीय सरकारको महत्त्वपूर्ण निकायमा कार्यरत रहेका प्रशासन सेवामा २७, वन, कृषि, इन्जिनियरिङ र कानुनतर्फका ७–७ जना गरी ५६ जना सिनियर सहसचिवलाई प्रदेशका मन्त्रालयमा सचिवका रूपमा पठाइएको हो । ६ महिनाभित्र बढुवा हुने र ६ महिनाभित्रै अवकास हुने बाहेकका सिनियर सचिवलाई एक वर्षका लागि संघीय सरकारले प्रदेशमा पठाएको हो ।

प्रकाशित : भाद्र ८, २०७६ १०:०४
पूरा पढ्नुहोस्
प्रतिक्रिया
पठाउनुहोस्