सातै सचिव हेरफेर

कान्तिपुर संवाददाता

विराटनगर — प्रदेश १ मा रहेका सातवटै मन्त्रालयका सचिवहरूको सरुवा भएको छ । सचिवहरूलाई संघीय सरकारका मन्त्रालयमा सुरुवा गरिएको हो । अब वरिष्ठ सहसचिवहरूले मन्त्रालयको सचिवको जिम्मेवारीमा आउने भएका छन् ।

प्रदेशमा सरुवा भएका सबै ५ वर्षभन्दा बढी समयदेखि सहसचिवका रूपमा कार्यरत सिनियर व्यक्तिहरू रहेको प्रमुख सचिव सुरेश अघिकारीले जनाए । कनिष्ट सहसचिवहरूलाई प्रदेश मन्त्रालयमा पठाउने र छिटोछिटो सरुवा गर्ने गर्दा प्रदेश सरकारको काम नै प्रभावित भइरहेको थियो । अब भने सिनियर सचिवहरू आएको र एक वर्ष हाराहारी उनीहरू प्रदेशमै बस्ने भएकाले काममा सहज हुने उनले बताए ।

निमित्त सचिवको भरमा चलिरहेको आन्तरिक मामिला तथा कानुन मन्त्रालयमा हरिप्रसाद मैनालीलाई जिम्मेवारी दिइएको छ । गोपाल पराजुलीले राजिनामा गरेपछि मन्त्रालयको सचिवको जिम्मेवारी मुख्यमन्त्री कार्यालयका कानुनसचिव भरतमणि रिजालले निर्वाह गर्दै आएका थिए ।

आर्थिक मामिला तथा योजना मन्त्रालयको सचिवको जिम्मेवारी संघीय सरकार अन्तर्गत सार्वजनिक वित्त व्यवस्थापन तालिम केन्द्रको प्रमुखमा कार्यरत दामोदर रेग्मीलाई दिइएको छ । मन्त्रालयका सचिव जीवन सिटौलाको अर्थमै सरुवा भएको छ । अनियमितता विवादमा मुछिएका पूर्वाधार विकास मन्त्रालयका सचिव मनोज घिमिरेको साउन दोस्रो साता सरुवा भएपछि मन्त्रालय कामुसचिव राजेश घिमिरेले चलाइरहेका थिए । मन्त्रालयको सचिवमा ऊर्जा मन्त्रालयमा कार्यरत सुशीलचन्द्र तिवारीलाई जिम्मेवारी दिइएको छ ।

भूमि व्यवस्था, कृषि तथा सहकारी मन्त्रालयमा कृषि तथा पशुपन्छी विकास मन्त्रालयका पशुपन्छी तथा मत्स्य विकास महाशाखाका प्रमुख डा विमलकुमार निर्मललाई सचिवको रूपमा सरुवा गरिएको छ । मन्त्रालयका सचिव हस्तबहादुर विष्टको कृषि मन्त्रालययमै सरुवा भएको छ । त्यस्तै सामाजिक विकास मन्त्रालयका सचिव हरिप्रसाद दाहाल संघीय मन्त्रालयमा तानिएका छन् ।

मन्त्रालयको सचिवमा महिला तथा ज्येष्ठ नागरिक मन्त्रालयका सिनियर सहसचिव वीरबहादुर राईलाई ल्याइएको छ । उद्योग, पर्यटन, वन तथा वातावरण मन्त्रालयका सचिव बद्री ढुंगानाको संघीय मन्त्रालयमा सरुवा भएको छ । उनको स्थानमा वनस्पति विभागका महानिर्देशक सन्जिवकुमार राईलाई पठाइएको छ । दुई जना सचिवको दरबन्दी रहेको मुख्यमन्त्री तथा मन्त्रिपरिषदको कार्यालयमा मुकुन्द घिमिरेलाई तानिएको छ ।

संघीय मन्त्रिपरिषदको बैठकमा वरिष्ठ सहसचिवलाई प्रदेशका मन्त्रालयमा सरुवा गर्ने निर्णय गरिएको थियो । सोही निर्णयअनुसार संघीय सरकारले सातवटै प्रदेशमा ५६ जना सिनियर सहसचिव सरुवा गरेको हो ।

संघीय सरकारको महत्त्वपूर्ण निकायमा कार्यरत रहेका प्रशासन सेवामा २७, वन, कृषि, इन्जिनियरिङ र कानुनतर्फका ७–७ जना गरी ५६ जना सिनियर सहसचिवलाई प्रदेशका मन्त्रालयमा सचिवका रूपमा पठाइएको हो । ६ महिनाभित्र बढुवा हुने र ६ महिनाभित्रै अवकास हुने बाहेकका सिनियर सचिवलाई एक वर्षका लागि संघीय सरकारले प्रदेशमा पठाएको हो ।

प्रकाशित : भाद्र ८, २०७६ १०:०४
प्रतिक्रिया
पठाउनुहोस्

बसले तान्यो विद्यार्थी

प्रदीप मेन्याङ्बो

सुनसरी — स्कुलबाट ८ किमि टाढाका विद्यार्थी पनि आउन थालेपछि धरान १२ चतरालाइनको सामुदायिक पब्लिक माविले बस सेवा सुरु गरेको छ । दुई वर्षयता टाढाका विद्यार्थी पनि आउन थालेपछि उनीहरूकै मागअनुसार दुईवटा बस सञ्चालनमा ल्याएको प्रधानध्यापक इन्द्रमोहन झाले बताए । 

उनले भने, ‘सेउती र सर्दु पारीबाट पनि विद्यार्थी आउन थाले । उनीहरूले टेम्पो भाडामात्र दैनिक २ सय रुपैयाँ तिरेको गुनासो गरे । विद्यार्थी र अभिभावकका तर्फबाट बस सञ्चालन गर्न माग आयो । विद्यार्थीको सुविधाका लागि ३५ सिटको बस २६ लाख रुपैयाँमा खरिद गर्‍यौं । अर्को बस भने भाडामा लिएका छौं ।’

बस किन्न विद्यालयका पूर्वविद्यार्थी र विभिन्न दाताहरूले सहयोग गरेको प्रअ झाले बताए । सामुदायिक स्कुलले विद्यार्थीका लागि बस सेवा सञ्चालन गर्ने आँट गरेकोमा अभिभावकहरू र विद्यालय व्यवस्थापन समितिले पनि साथ दिएका छन् ।

दुवै बसले धरान नगर क्षेत्रमा पर्ने धरान–६ को पानबारी र धरान १७ का पटनालीसम्मका विद्यार्थीलाई ओसार्न थालेका छन् । सवारी भाडाका रूपमा मासिक १५ सयदेखि ६ हजार रुपैयाँ तिरेर पढ्न आउनेका लागि स्कुल बसले राहत दिएको उनले बताए ।

उनका अनुसार दूरीअनुसार हाललाई दिउँसो १० सम्म पढ्ने विद्यार्थीका लागि मासिक ५ सय रुपैयाँ र बिहानको समयमा ११ र १२ पढ्नेहरूका लागि दूरीअनुसार मासिक ७ सय र ८ सय रुपैयाँ कायम गरिएको छ । विद्यार्थीहरूले विद्यालयले आफूहरूजस्ता टाढाबाट टेम्पोमा दैनिक ओहोर–दोहोर गर्दा २ सय रुपैयाँ खर्च गरेर आउनेहरूका लागि बस सस्तो भाडा तिर्ने गरी सञ्चालन गरेकोमा खुसी व्यक्त गरे ।

पब्लिकमा व्यवस्थापनमा कक्षा १२ अध्ययरत छिमेकी नगरपालिका बराहक्षेत्र नगरपालिका–१ बगुवाका निता तामाङ, भावना राई, शशिकला राई, धरान–१७ पटनाली (साविक विष्णुपदुका गाविस) का एलिना राई, अधिक्षा पोखरेल, तेजबहादुर विष्ट जस्ता दुई सय विद्यार्थी दैनिक ८ किमिको दूरीबाट आउने गरेका छन् । निताले भनिन्, ‘प्लस टु पढदा लाग्ने खर्चभन्दा टेम्पो भाडा बढी लाग्थ्यो । त्यो रकम जोगिएको छ । स्कुलकै बसमा आउने जाने गर्दा सार्वजनिक सवारी साधन पर्खिरहनु पनि परेन । सुरक्षित रूपमा घर पनि पुगिने भयो ।’

स्कुलकै बसले घरबाट ल्याउने र पढाइसकेपछि घरमा पुर्‍याउने भएकाले विद्यार्थीहरू जतासुकै बरालिनबाट पनि केही हदसम्म जोगिने, घरमा छिट्टै पुगेर अभिभावकलाई घरको काममा सहयोग गर्न सक्ने र आफ्नो होमवर्क पनि बेलैमा गर्नसक्ने भएकाले पनि बस सेवा सञ्चालन गरेको झाले बताए ।

प्रकाशित : भाद्र ८, २०७६ १०:०४
पूरा पढ्नुहोस्
प्रतिक्रिया
पठाउनुहोस्