छुर्पीबाटै ५० लाख

कान्तिपुर संवाददाता

तेह्रथुम — लालीगुराँस नगरपालिका ४ फुलेकका ४८ वर्षीय देवेन्द्र पौडेलले छुर्पी बिक्रीबाट वार्षिक ५० लाख आम्दानी गरिरहेका छन् । १४ वर्ष वैदेशिक रोजगारीमा बिताएर गाउँ फर्किएका पौडेलले २ वर्षअघि व्यावसायिक छुर्पी उद्योग सञ्चालनमा ल्याएका हुन् ।

इलामको नाम्सालिङमा गएर पौडेलले दुई वर्षसम्म दूधबाट बन्ने परिकार बनाउन सिकेर आएपछि आफैं व्यवसाय सुरु गरेका हुन् । गाउँले साथीहरूसँग मिलेर ‘नमुना छुर्पी उद्योग’ सञ्चालन गरेको पौडेलले बताए ।

१६ वर्षसम्म गाई–भैंसी पालनको अनुभव बटुलेका पौडेलले आफ्नो उद्योगमा दूधका अन्य परिकार समेत बनाइरहेका छन् । पौडेलले ५० हजार रुपैयाँ लगानी गरेर दूधबाट क्रिम छुट्याउने हाते मेसिन खरिद गरेका छन् । गाउँका किसानले उत्पादन गरेको दूध बिक्री नभएपछि गाउँलेको समेत दूध खरिद गरेर छुर्पी उद्योग सञ्चालन गरेको पौडेलले बताए ।

आफन्त र गाउँकै साहुमहाजनसँग ५ लाख रुपैयाँ ऋण खोजेर उद्योग सुरु गरेका पौडेललको उद्योगमा अहिले १० लाख लगानी पुगेको छ । मासिक ७ क्विन्टलसम्म छुर्पी उत्पादन गरिरहेको उनले बताए ।

पौडेलले उद्योगमा ३ जनालाई रोजगारी दिएका छन् । ४५ हजार रुपैयाँ त कामदारले मात्र लगिरहेका छन् । पौडेलको उद्योगमा गाउँका ६५ घरधूरीका किसानको दैनिक ८ सय लिटर दूध खपत हुने गरेको छ ।

उद्योगले गाईको दूध प्रतिलिटर ३५ र भैंसीको ४५ रुपैयाँमा खरिद गरिरहेको फुलेकका दूध उत्पादक किसान पुखमान पौडेलले बताए । पौडेलले दैनिक ५० लिटर दूध उद्योगलाई बिक्री गर्दै आएका छन् । गाउँमै छुर्पी उद्योग सञ्चालनमा आएपछि दूधको खपत पनि बढेको किसानको भनाइ छ ।

उत्पादित छुर्पीलाई बजारको कुनै समस्या छैन । यहाँ उत्पादन भएको छुर्पी इलाम, भारत, कोरिया, अमेरिका लयातका मुलुकमा निर्यात हुने गरेको छ । छुर्पी खरिदका लागि व्यापारीहरू उद्योगसम्मै आउने गरेका छन् । उद्योगमा मासिक २ लाख रुपैयाँभन्दा बढीको घिउ मात्र उत्पादन भइरहेको छ ।

दुग्धजन्य परिकार बनाउन घरेलु तथा साना उद्योग विकास समितिको कार्यालयले सोही ठाउँमा १५ दिने तालिम समेत सञ्चालन गरेर युवा किसानहरूलाई सहयोग गरिदिएको छ । पछिल्लो समय छुर्पीको माग थप बढेको उनले बताए ।

छुर्पी बिक्रीबाट आएको पैसाले १० जनाको परिवारको शिक्षा दीक्षा पालन पोषण गेर बचत समेत गरिरहेको उद्योगी पौडेलले बताए । उद्योगको विस्तारका लागि थप एक रोपनी जमिनमा भौतिक पूर्वाधार निर्माण गर्ने काम पनि पौडेलले गरिरहेका छन् ।

प्रकाशित : श्रावण ३१, २०७६ १०:२४
प्रतिक्रिया
पठाउनुहोस्

बलिका लागि उक्साउने धामी पक्राउ

कान्तिपुर संवाददाता

धनुषा — धनुषाको मिथिला नगरपालिका–६ ढल्केवरका शम्भु साहका अढाइ वर्षीय छोरा आर्यन साहलाई बलि दिने मुख्य योजनाकारलाई प्रहरीले पक्राउ गरेको छ । 

मिथिला नगरपालिका–८ कुसुमबिछौनाका ५२ वर्षीय जंगवीर महतोलाई पक्राउ गरिएको इलाका प्रहरी कार्यालय ढल्केबरका प्रहरी निरीक्षक अवधकिशोर ओझाले बताए । पक्राउ परेका महतोलाई नियन्त्रणमा राखेर थप अनुसन्धान भइरहेको ओझाले बताए ।

प्रहरीले झारफुक र टुनामुना सिकेको सालोलाई तान्त्रिक सिद्धिका लागि बालकको बलि दिन उक्साएको आरोपमा प्रहरीले पक्राउ गरेको हो । वैशाख २४ गते बालकलाई छिमेकी शत्रुधन महतोले बलि दिएका थिए । लामो समयदेखि फरार जंगवीर महतो राजमार्ग क्षेत्रका चर्चित धामी हुन् । सालो शत्रुघन पक्राउ परेपछि जंगवीर फरार थिए ।

बालकको बलि दिने घटनामा जंगवीरको संलग्नताबारे अनुसन्धानपछि मात्र थाहा हुने प्रहरीले जनाएको छ ।
शत्रुघनलाई बालक बलि दिन जंगवीरले उक्साएको जिल्ला प्रहरी कार्यालय धनुषाले जनाएको छ । सालो पक्राउ परेपछि फरार भिनाजु शंकाको घेरामा परेका थिए । फरार धामी जंगवीरको भजनमण्डली पनि छ ।

उनको मण्डलीमा दुई वर्षअघि शत्रुघन नयाँ सदस्यका रूपमा थपिएका थिए । सालो नै भएपछि जंगवीरले शत्रुघनलाई धामीको काम पनि सिकाए । झारफुक र टुनामुनाको मन्त्र पाएपछि शत्रुघनले सामान्य बिरामी पर्दा छरछिमेकका बच्चाको उपचार गर्न थालेका थिए ।

आर्यनलाई ‘चकलेट दिन्छु’ भनेर लोभ्याएर घर लगेका शत्रुघनले बलि दिएका थिए । घरमा खेल्दै गर्दा अघिल्लो साँझ हराएका बालकलाई आफन्तले अबेर रातिसम्म खोजतलास नभेटिएका बालक वैशाख २४ को बिहान घरनजिकैको बाँसघारीमा भेटिएका थिए ।

बिहान उनकै घरदेखि करिब ७५ मिटरपूर्वको बाँसघारीमा शव भेटिएको थियो । घाँटीको पछाडिको भाग काटिएको अवस्थामा शव फेला परेको थियो । शत्रुघनले नै आफ्नो धामी विद्या सिद्धिका लागि गुरुको बहकाउमा बालकको बलि चढाएको प्रहरीलाई बताएका थिए ।

प्रकाशित : श्रावण ३१, २०७६ १०:२२
पूरा पढ्नुहोस्
प्रतिक्रिया
पठाउनुहोस्