डेढ करोड रकम ठगी

रमेशचन्द्र अधिकारी

धनकुटा — तेह्रथुमको आठराई गाउँपालिका ७ थोक्लुङका एक दम्पतीले करिब १ करोड ५० लाखभन्दा बढी रकम ठगी गरेको खुलेको छ ।भगवती माविका पूर्वशिक्षक उमाकान्त चौलागाईं र उनकी पत्नी लीलाले स्थानीय ६० जनाभन्दा बढी व्यक्तिबाट ५० हजारदेखि १० लाख रुपैयाँसम्म रकम लिएर गाउँबाट अन्यत्रै गएको जनाइएको छ ।

२०७२ सालमा छोरा जापान पठाउने भन्दै स्थानीयसँग ऋण स्वरूप रकम लिएको पीडित बिरिमाया तामाङले बताइन् । उनीसँग चौलागाईंले ६ लाख रुपैयाँ लिएको तर हालसम्म नतिरेको उनले बताइन् ।

उनीहरूले २ प्रतिशत व्याज दिने भन्दै रकम लिएका थिए । चौलागाईंले छोरालाई जापान पठाउने वहानामा उनकी श्रीमती लीला भट्ट चौलागाईंमार्फत करिब १ करोड ५० लाखभन्दा बढी रकम ऋण संकलन गर्न लगाएको तामाङले बताइन् । अधिकांशले गाउँका शिक्षित व्यक्ति भएकाले विश्वासका भरमा रकम दिएको बताएका छन् । ५ वर्ष बित्न लाग्दा पनि नतिरेपछि आफूहरू ठगिएको स्थानीयले बताए ।

सबैभन्दा बढी रकम स्थानीय अमृत तामाङसँग १० लाख रुपैयाँ लिएको बताइएको छ । विश्वासमा परी सामान्य कागजमा टिपोटका भरमा रकम दिएपछि अप्ठेरोमा परेको उनले बताए । चौलागाईंले तामाङसँग पटक–पटक गरेर डेढ लाखदेखि थप रकम ऋण लिएका थिए । रकम माग्दा आलटाल मात्र गर्छन्, उनले भने, लामो समयसम्म रकम फिर्ता नगरेकाले रकम फर्किने आशा हराएको छ ।

चौलागाईं दम्पतीले आठराई ७ थोक्लुङ मानेडाँडाकी बिरिमाया तामाङको ६ लाख, अमृत तामाङ १० लाख ७१ हजार, ऋषिराम दंगालको ८ लाख ७५ हजार र ३ तोला सुन ५ वर्ष बित्न लाग्दा पनि नदिएको बताए । त्यसैगरी आठराई याङ्गखुवाको रंगलाल ढकालको ८ लाख, सोही वडाका केरेपका वीरबहादुर तामाङको २ लाख ९८ हजार, थोक्लुङ भालुखोपका लक्ष्मी श्रेष्ठको १ लाख, थोक्लुङ ढोडेनीका पुन्य चौलागाईंको १ लाख १४ हजार, सुवास तामाङको १ लाख, फिदिमका शुक्रराज तामाङको १ लाख ८० हजार नगद लिएर हालसम्म फिर्ता गरेका छैनन् । त्यसैगरी आठराई थोक्लुङ्गका श्याम कन्दङ्गवाको २० हजार, थोक्लुङ्ग लामा चौताराका सोम सिवाको १ लाख ५५ हजार, सोम लामीछानेको ६२ हजार नगद लिएको पीडितले बताए ।

थोक्लुङ्ग ढलेबरका हरीप्रसाद अधिकारीको २ लाख ३८ हजार, नरप्रसाद अधिकारीको ६५ हजार, पिप्लेका हेमचन्द्र तिम्सिनाको ६० हजार, फाक्चुवाका नारयण थपलियाको ३ लाख, थोक्लुङ्ग भदौरे डाँडाका ज्ञाननाथ रसाईलीको ८५ हजार, ढोडेनीका श्रीकृष्ण चम्लागााईको १ लाख ३० हजार, पिप्ले मानसिंङ तामाङको ४ लाख, चुहाण्डाडा हिलेका मेघनाथ पराजुलीको ३ लाख २० हजार, थोक्लुङ्ग भिरगाउँका भीम श्रेष्ठको ६ लाख, महानन्द भण्डारीको २ लाख, भालुखोपका नयाँघरे श्रेष्ठको ३ लाख, थोक्लुङ भोर्लेका औतारी लामाको २ लाख ९० हजार, लगायतको गरी १ करोड ५० लाखभन्दा बढी रकम विभिन्न वहनामा लिएको स्थानीयले बताए । सोझा सिधा सर्वसाधारणसँग रकम लिएर गाउँलेलाई समेत थाहै नदिई घर छोडेर भागेको थोक्लुङ ढलेबरका हरिप्रसाद अधिकारीले बताए ।

चौलागाईं पत्नी लीलाले ऋण तिर्न आफूहरू गम्भीर रहेको टेलिफोनमा बताइन् । भरपर्दो आधार नभए पनि जग्गा प्लटिङ गरेर भए पनि तिर्ने उनले दाबी गरिन् । चौलागाईं परिवार हाल आठराईको थोक्लुङबाट ०७३ साल फागुण महिनामा बसाई सरेर मोरङको सुन्दर हरैचा नगरपालिका वडा २ मृगौलिया स्थित करैबना टोलमा बस्दै आएको बताइन् ।

प्रकाशित : श्रावण २६, २०७६ ०९:४३
प्रतिक्रिया
पठाउनुहोस्

सुनकोसी–मरिन डाइभर्सनको डीपीआर अन्तिम चरणमा

कान्तिपुर संवाददाता

रौतहट — राष्ट्रिय गौरवको आयोजना सुनकोसी–मरिन डाइभर्सनको विस्तृत अध्ययन प्रतिवेदन (डीपीआर) अन्तिम चरणमा पुगेको छ । डीपीआर तयार भएपछि आयोजनाको काम कसलाई जिम्मा दिने भन्ने प्रक्रिया अघि बढाइनेछ । 

आयोजना सम्पन्न भएपछि तराई–मधेसमा सिँचाइ सुविधा पर्याप्त हुनेछ । जलविद्युत् उत्पादन गर्नु पनि डाइभर्सनको लक्ष्य हो । तराई/मधेसका रौतहट, सर्लाही, महोत्तरी, बारा र धनुषाका कुल १ लाख २२ हजार हेक्टर खेतीयोग्य क्षेत्रलाई सिँचाइ सुविधा पुर्‍याउने आयोजनाको उद्देश्य रहेको सुनकोसी–मरिन डाइभर्सन आयोजना प्रमुख सुशील आचार्यले बताए । ‘अहिले डाइभर्सनको विस्तृत अध्ययन प्रतिवेदन (डीपीआर) को काम अन्तिम चरणमा पुगेको छ । यसपछि दाता खोज्ने वा सरकारले नै निर्माण गर्ने निष्कर्षमा पुग्छौं,’ उनले भने ।

डीपीआरको काम पनि एक महिनाभित्र सकिने उनले बताए । डीपीआर तयार पार्ने जिम्मा इ–टेक कन्सलटेनलाई दिइएको छ । सुनकोसीको पानी डाइभर्सनपछि मरिना नदीमा मिसाउन कमलामाई २ कुसुमटार फाँटमा खसालिनेछ । त्यसपछि मरिना नदी हुँदै ४२ किलोमिटर दूरीमा रहेको रौतहट/सर्लाहीस्थित बागमती बाँधमा पुर्‍याई सिँचाइको सुविधा बढाउने सरकारको लक्ष्य छ । वाग्मती सिँचाइ आयोजनाबाट रौतहट र सर्लाहीको ४२ हजार हेक्टर जमिनमा मात्र सिँचाइ हुँदै आएको छ ।

आयोजना सम्पन्न भएपछि थप ८० हजार हेक्टर जमिनमा सिँचाइ सुविधा पुग्ने देखिएको छ । डीपीआर तयार भएपछि निर्माण सम्पन्न गर्न करिब ५ वर्ष लाग्नेछ । निर्माणको ठेक्का प्रक्रिया यसै वर्षबाट सुरु हुनेछ । ठेक्का सम्झौता भएको मितिले ५ वर्षभित्र आयोजनाका मुख्य संरचनाको निर्माणको काम सक्नु पर्ने लक्ष्य लिइएको प्रमुख आचार्यले जनाए ।

सुनकोसी नदीबाट सिन्धुलीको मरिन हुँदै रौतहटको चन्द्रपुर नगरपालिका १ पौराईस्थित वाग्मती नदीमा पानी मिसाउन आयोजनाले अध्ययन थालेको थियो । यो सम्पन्न गर्न लगभग ७५ अर्ब बढी रकम लाग्न सक्ने आयोजना प्रमुख आचार्यले जनाए । आचार्यका अनुसार हाइड्रो पावरको डीपीआर भने सम्पन्न भइसकेको छ ।

सुनकोसीबाट १३.१ किलोमिटर टनेल बनाई सिन्धुलीको मरिनमा पानी झारिनेछ । त्यसपछि ४२ किमि नदीबाट वाग्मती दोभानमा मिसाइने छ । यही पानी १० किमि दक्षिण ब्यारेजमा जम्मा भएर शाखा, प्रशाखा नहरमार्फत खेतसम्म पुग्छ ।

प्रकाशित : श्रावण २६, २०७६ ०९:४१
पूरा पढ्नुहोस्
प्रतिक्रिया
पठाउनुहोस्