धनकुटामा थप पाँच जनालाई कोरोना संक्रमण देखिएको छ । विपी कोइराला स्वास्थ्य विज्ञान प्रतिष्ठान धरानमा मंगलबार गरिएको परिक्षणमा तीन स्वास्थ्यकर्मी, एक स्वास्थ्यकर्मीका श्रीमान् र एक प्रहरी गरी ५ जनामा संक्रमण पुष्टी भएको हो । उनीहरुको उमेर २८ देखि ३७ वर्षसम्मको छ ।
एम्बुलेन्स अभाव भएपछि धनकुटाका बिरामीले सास्ती खेप्नुपरेको छ । यसअघि ११ वटा एम्बुलेन्स तयारी अवस्थामा राखिएको भनिए पनि सोमबार एम्बुलेन्स चालकले बिरामी बोक्न नमानेको बिरामीका आफन्तले गुनासो गरेका छन् ।
जिल्ला अस्पताल धनकुटामा एक स्वास्थ्यकर्मीमा कोरोना संक्रमण पुष्टि भएपछि सोमबार एक सय जनाको स्वाब संकलन गरी परीक्षणका लागि बीपी कोइराला स्वास्थ्य विज्ञान प्रतिष्ठान धरान पठाइएको छ।
धनकुटामा आइतबार कोरोना भाइरस संक्रमण पुष्टि भएकी ३४ वर्षीया युवती पेसाले स्वास्थ्यकर्मी हुन् । उनी जिल्ला अस्पतालमा कार्यरत छिन् । स्वास्थ्यकर्मी भएकाले नियमित ड्युटीमा संलग्न रहँदै आएको संक्रमित युवतीको भनाइ छ । उनी विगत तीन महिनादेखि जिल्ला बाहिर नगएको बुझिएको छ ।
धनकुटाको सम्पूर्ण नाकामा पैदल यात्रुलाई समेत आवतजावतमा रोक लगाइएको छ । सीमावर्ती भोजपुर र उदयपुरमा कोभिड १९ संक्रमित फेला परेपछि जिल्लाका सम्पूर्ण नाका बन्द गरी नियमित अनुगमन तीव्र पारिएको प्रशासनले जनाएको छ । अत्यावश्यक कामको ठहर गरेबाहेक कसैलाई पनि जिल्ला भित्रिन र बाहिरिन कडाइ गरिएको जिल्ला प्रशासन कार्यालयका सूचना अधिकारी जयराम श्रेष्ठले जानकारी दिए ।
कोरोना भाइरसको उच्च जोखिममा रहेका क्षेत्रबाट भोजपुर जिल्लाका विभिन्न स्थानमा पुगेका ६८ जना व्यक्तिको स्वास्थ्य परीक्षण हुन सकेको छैन । यसबाट जोखिम बढ्न सक्ने स्थानीयको गुनासो छ ।
लकडाउनका कारण समस्यामा परेका विपन्न तथा ज्यालामजदुरी गर्ने ७ हजार ६ सय ९१ परिवारलाई धनकुटाका स्थानीय तहले राहत वितरण गरेको छ। हालसम्म ७ पालिकामध्ये ६ वटाले राहत वितरण गरिसकेका छन्।
