धनकुटा — यस वर्षको सरस्वतीप्रसाद–दुर्गादेवी रिजाल स्मृति शिक्षा संस्कृत पुरस्कारबाट धनकुटाको मूलघाटस्थित विश्रान्तिधाम संस्कृत गुरुकुल पुरस्कृत भएको छ ।

सरस्वतीप्रसाद–दुर्गादेवी रिजाल स्मृति प्रतिष्ठान सुनसरीले गुरुकुललाई दुई लाख राशिको नगद पुरस्कारबाट मंगलबार सम्मान गरेको हो । प्रतिष्ठानको चौथो स्थापना दिवसको अवसर पारेर धनकुटा नगरपालिका-९ मूलघाटमा रहेको गुरुकुललाई सम्मान गरिएको हो । 

पुरस्कार धनकुटा नगरपालिकाका प्रमुख चिन्तन तामाङले विशेष कार्यक्रमका बीच हस्तान्तरण गरे । प्राज्ञ विवश पोखरेल, लोचन रिजाल र राजु केसीको पुरस्कार छनोट समितिले उक्त संस्थालाई पुरस्कार दिन चयन गरेको थियो । 

यसअघि प्रतिष्ठानले पण्डित पुरुषोत्तम भट्टराई, वियोग सापकोटा, वैरागी काइँला, प्रेमप्रसाद न्यौपाने, प्राडा दयाराम श्रेष्ठ, रविन्द्र पुरीसमेतलाई विभिन्न पुरस्कार प्रदान गरिसकेको प्रतिष्ठानका अध्यक्ष शान्ता रिजालले जानकारी दिइन् । सामाजिक संस्थालाई भने यस वर्ष पहिलोपटक सम्मान गरिएको हो ।