पुल्चोकबाट धमाःफल्चा पुर्‍याइयो मत्स्येन्द्रनाथ रथ [तस्बिरहरु]

प्रशान्त माली, तस्बिर : इलिट जोशी, तस्बिर : अंगद ढकाल

ललितपुर — रातो मत्स्येन्द्रनाथ रथयात्राबारे सरकार गम्भीर नभएको भन्दै पाटनबासीले बिहीबार पुल्चोकमा भेला भएर विरोध प्रदर्शन गरेका छन् । उनीहरूले आफैं रथ तानेर पुल्चोकबाट धमाःफल्चा पाटीसम्म पुर्‍याएका छन् ।

उपत्यकाका तीनै जिल्ला प्रशासनले यतिखेर कोरोना संक्रमण नियन्त्रणका लागि निषेधाज्ञा जारी गर्दै भिडभाड र भेला गर्न रोक लगाइरहेका छन् । तर, मत्स्येन्द्रनाथ जात्राको सरोकार सांस्कृतिक बाजागाजा गर्नुसँग मात्र नभएर रथ ६/६ महिना बुङ्मती र पाटनमा राख्ने परम्परा रहेको स्थानीय बताउँछन् । सरकारले अहिले बुङ्मती पुर्‍याउन चासो नदिएको उनीहरूको आरोप छ ।

मत्स्येन्द्रनाथलाई सूर्य दक्षिणायन (साउनदेखि) हुँदा बुङ्मती र उत्तरायण (माघदेखि) हुँदा पाटन मत्स्येन्द्रबहालस्थित मन्दिरमा राख्नुपर्ने परम्परा छ । यो भक्तपुरका तत्कालीन राजा नरेन्द्रदेव मल्ल र कान्तिपुरका तान्त्रिक बन्धुदत्त आचाजुको पालादेखि चल्दै आएको परम्परा हो ।

‘यात्राका लागि लाखौं रुपैया खर्चेर रथ निर्माण गरियो । अहिले अनिर्णयको बन्दी बनाएर मत्स्येन्द्रनाथलाई बिचल्लीमा छोडियो,’ स्थानीय पृथविन्दु महर्जन भन्छन् ।

मत्स्येन्द्रनाथका ज्योतिषी कीर्तिमदन जोशीका अनुसार असोज २ गतेबाट एकमहिने मलमास भएकाले रथयात्रा गर्न मिल्दैन । मलमास सकिएको चार दिनपछि दसैं सुरु हुन्छ । दसैंमा बुङ्मतीमा मत्स्येन्द्रनाथको विशेष पूजा गर्नुपर्छ । 

मत्स्येन्द्रनाथलाई साउन १० गते नागपञ्चमीमा पुल्चोकमा रथारोहण गरिएको थियो । परम्पराअनुसार रथारोहणको भोलिपल्ट रथ तान्नुपर्छ ।

प्रकाशित : भाद्र १८, २०७७ १३:४६
प्रतिक्रिया
पठाउनुहोस्

'अत्यावश्यकबाहेकका पसल तथा व्यवसाय सञ्चालनमा रोक लगाउनुपर्छ'

कान्तिपुर संवाददाता

काठमाडौँ — जिल्ला प्रशासन कार्यालय काठमाडौंले भदौ १७ गते जारी गरेको निषेधाज्ञाको सञ्चालन गर्न पाउने सेवाअन्तर्गत बुँदा नम्बर ३ मा उल्लेख गरिएकाे व्यवस्थाप्रति उपत्यका नगरपालिका फोरमले गम्भीर ध्यानाकर्षण भएको जनाएको छ ।

काठमाडाैंकाे न्युराेडस्थित कपडा पसल । तस्बिर : इलिट जाेशी

उक्त बुँदामा ‘उपत्यकाभित्र विकास निर्माणसँग सम्बन्धित पसल/व्यवसाय साथै तीनकाे ढुवानीका लागि प्रयोग हुने सवारी साधन सरकारले तोकेको स्वास्थ्य मापदण्ड पालना गरेर दिउँसो २ बजेदेखि बेलुका ९ बजेसम्म सञ्चालन गर्न सकिने’ उल्लेख छ ।

यसले निषेधाज्ञाको अर्थ र उपादेयता नरहने तथ्यलाई ध्यानमा राख्दै यसमा सुधार गर्नु पर्ने फोरमको माग छ । बिहीबार फोरमका उपाध्यक्ष एवं ललितपुर महानगरका मेयर चिरीबाबु महर्जन र सचिव एवं मध्यपुर थिमीका मेयर मदनसुन्दर श्रेष्ठको हस्ताक्षरमा जारी विज्ञप्तिमा भनिएको छ, ‘अत्यावश्यकीय वस्तु र सेवालाई बिहान ११ बजेसम्म मात्र खोल्न सकिनेसम्मलाई कायम राख्दै अन्य समयमा पसल/व्यवसाय सञ्चालनमा रोक लगाउने गरी अबिलम्ब निषेधाज्ञा आदेश सुधार गर्न सम्बन्धित निकायको ध्यानाकर्षण गराइन्छ ।’


यसअघिको निषेधाज्ञालाई अलि खुकुलो बनाएर भदौ १७ गते उपत्यकाका ३ वटै जिल्ला प्रशासन कार्यालयले निषेधाज्ञा आदेश जारी गरेका थिए । आदेशमा निषेध गरिएका सेवालाई १३ बुँदामा र सञ्चालन गर्न पाउने सेवालाई १६ बुँदामा उल्लेख गरिएको छ । यो आदेश भदौ २४ गते राती १२ बजेसम्मका लागि हो । भदौ ३ गते सुरु भएको आदेश १७ गते राति १२ बजेसम्म जारी थियो ।

कोरोना भाइरस संक्रमण नियन्त्रणमा आइनसकेको उल्लेख गर्दै जिल्ला प्रशासनले नेपाल सरकार मन्त्री परिषद्को निर्णय, स्थानीय प्रशासन ऐन २०२८, संक्रामक रोग ऐन २०२० ले दिएको अधिकार प्रयोग गरेर निषेध आदेश जारी गरेको हो । १७ गते थपिएको आदेश २४ गते राति १२ बजेसम्मका लागि हो ।

विषय परिस्थितिलाई ध्यानमा राख्दै उपत्यकाका स्थानीय तहबाट प्रवाह हुँदै आएका सेवामध्ये अत्यावश्यकबाहेकका अन्य सेवा भदौ २४ गतेसम्म बन्द रहने कुरा उल्लेख छ ।

प्रकाशित : भाद्र १८, २०७७ १३:३४
पूरा पढ्नुहोस्
प्रतिक्रिया
पठाउनुहोस्
×