सैनिक सरकारको दमनविरुद्ध म्यानमार दूतावासअगाडि अनेरास्ववियु क्रान्तिकारीको प्रदर्शन

तस्बिर : बिजु महर्जन

काठमाडौँ — नेकपा माओवादी केन्द्रको भ्रातृ संगठन अनेरास्ववियु क्रान्तिकारीले म्यानमारमा सैनिक सरकारको दमनविरुद्ध नेपालस्थित दूतावास अगाडि प्रदर्शन गरेको छ ।

म्यानमार सेनाले ‘कु’ मार्फत सत्ता हत्याउँदै सर्वसाधारणमाथि दिनहुँ अत्याचार र दमन गरिरहेको भन्दै अनेरास्ववियु क्रान्तिकारीले भैँसेपाटीस्थित म्यानमार दूतावास अगाडि विरोध प्रदर्शन गरेको हो । म्यान्‍मारमा प्रजातन्त्रको पुनर्वहाली र नरसंहार रोक्न माग गर्दै प्रदर्शन र ज्ञापनपत्र बुझाइएको अनेरास्ववियू क्रान्तिकारीका उपाध्यक्ष सुरेन्द्र बस्नेतले बताए ।

पछिल्ला दिनमा म्यानमारमा सेनाले प्रदर्शनकारीमाथि बर्बर दमन गरिरहेको छ । गत शनिबार मात्रै सेनाको गोली लागेर कम्तीमा ११४ जना मारिएका थिए । फेब्रुअरी १ मा सेनाले शासन हातमा लिएपछि अहिलेसम्म ५०० जनाको मृत्यु भइसकेको छ भने सयौं घाइते भएका छन् ।


प्रकाशित : चैत्र १८, २०७७ १२:२७
प्रतिक्रिया
पठाउनुहोस्

‘महामारीविरुद्ध संघर्ष गर्न विश्वव्यापी सन्धि गरौं’

एजेन्सी

लन्डन/ब्रसेल्स — बेलायत, फ्रान्स, जर्मनीलगायत विश्वका २० भन्दा बढी मुलुकका नेताहरूले भविष्यमा हुने विश्वव्यापी महामारीहरूविरुद्ध लड्न तयारीका लागि अन्तर्राष्ट्रिय सन्धि गर्न आह्वान गरेका छन् ।

बेलायती प्रधानमन्त्री बोरिस जोन्सन, फ्रान्सका राष्ट्रपति इम्यानुएल म्याक्रों, जर्मन चान्सलर एंगेला मेर्कललगायतका नेताहरूले कोरोना भाइरसले दोस्रो विश्वयुद्धपछि विश्वका सामु सबैभन्दा ठूलो चुनौती खडा गरेको भन्दै यस्ता समस्यासँग जुध्न सन्धि गर्नुपर्ने बताएका हुन् ।

कोरोना जस्तै प्रकृतिको अर्को विश्वव्यापी महामारी भविष्यमा पनि हुन सक्ने भन्दै यसका लागि अहिले नै तयारी थाल्नुपर्ने ती नेताहरूको भनाइ छ । हालको महामारीले संसारका सबै मानिस सुरक्षित नभएसम्म कोही पनि सुरक्षित रहँदैनन् भन्ने पाठ सिकाएको पनि उनीहरूले उल्लेख गरेका छन् ।

विश्वका प्रमुख शक्ति मानिने मुलुकहरूका २४ जना नेताहरूले आ–आफ्ना देशका केही चर्चित पत्रपत्रिका तथा अन्य सञ्चार माध्यमहरूमा सम्प्रेषित लेखमा देशहरूबीच आपसी सहयोगको सहज वातावरण तयार पार्न दोस्रो विश्वयुद्धको समाप्तिपछि भएको जस्तै प्रकारको सन्धि आवश्यक भएको तर्क गरेका हुन् ।

अब संसारका देशहरू ‘भविष्यमा हुने महामारीको सटीक अनुमान गर्न, रोकथाम गर्न, पत्ता लगाउन, समीक्षा गर्न र त्यसप्रति प्रभावकारी ढंगले उच्चस्तरको संयोजित प्रतिक्रिया जनाउन सक्ने’ अवस्थामा रहनुपर्ने उनीहरूको भनाइ छ । एउटा नयाँ सन्धिले सम्भावित महामारीबारे जनतालाई सावधान गराउन अझ प्रभावकारी प्रणालीहरूको स्थापना गर्न सघाउने उनीहरूको दाबी छ ।

सन्धिले महामारीसँगै सम्बन्धित तथ्यांकहरूको आदानप्रदान, खोपहरू तथा सुरक्षात्मक पोसाक र उपकरणहरूको वितरण व्यवस्थित हुने विश्वास उनीहरूको छ । बेलायत र युरोपेली संघबीच खोप आपूर्तिका विषयमा असहमति भएको केही समयपछि नेताहरूको संयुक्त लेख प्रकाशमा आएको हो । ईयूले आफ्नो सीमाभित्र उत्पादित खोपहरूको निर्यातमा कडा नियन्त्रण लागू गरेपछि त्यस्तो विवाद उत्पन्न भएको बताइएको छ ।

प्रकाशित : चैत्र १८, २०७७ १२:०५
पूरा पढ्नुहोस्
प्रतिक्रिया
पठाउनुहोस्
×