विश्राम लिनु वेश

मानिसको जीवनमा आरोह–अवरोह आइरहन्छन् । कठिन मोडहरू आइरहन्छन् । त्यो बेला सही निर्णय लिनसके मात्र उसको पहिचान पछिसम्म रहन्छ । इतिहासले सम्झन्छ । हो, त्यस्तै कठिन निर्णय लिने घडी अहिले प्रधानमन्त्री ओली समक्ष आइपुगेको छ । यो बेला उहाँले पद र प्रतिष्ठा हेर्ने कि आफ्नो स्वास्थ्य स्थिति ? उहाँले आफ्नो बुँताले भ्याएसम्म देश र जनताको लागि धेरै गर्नुभयो । कति सपना देख्नुभयो, कति सपना जनतालाई देखाउनुभयो । यद्यपि कामको परिणाम सतहमा आउन सकेन । तथापि गोरेटो कोर्ने काम प्रधानमन्त्री ओलीले गर्नुभएको छ । स्थायी सरकार मानिएको कर्मचारी वर्गले प्रधानमन्त्रीकै ‘स्पिरिट’ मा काम गर्नसकेको भए विकास र समृद्धिका डोबहरू देखिसकिन्थ्यो । तर कर्मचारी प्रशासनले राम्ररी काम नगर्दा देशको २१ वटा गौरवका आयोजनाहरूमध्ये ९५ प्रतिशतको काम सन्तोषजनक हुन सकेनन् । तामाकोशी, मेलम्चीजस्ता योजनाहरू पूरा भएनन् । राज्यसंयन्त्र कमजोर बन्दा सिन्डिकेटधारी, मेडिकल माफिया, निर्माण व्यवसायीहरूले राज्यको अस्तित्वमै प्रश्न उठाए । निश्चय नै ओली यी सबै विकृति/विसंगति हटाउन चाहनुहुन्थ्यो, तर अब उहाँलाई स्वास्थ्यले साथ दिइरहेको छैन । अब उहाँले आफ्नो पालामा थाती रहेका काम आफूपछिको पुस्ताले गर्ने विश्वास गरी पदबाट विश्राम लिनु उचित हुन्छ ।
– गोपाल देवकोटा, जोरपाटी, काठमाडौं