सबैलाई समान व्यवहार राम्रो- सम्पादकलाई चिठी - कान्तिपुर समाचार
कान्तिपुर वेबसाईट
AdvertisementAdvertisement

सबैलाई समान व्यवहार राम्रो

कान्तिपुर संवाददाता

मिडियाले उच्च आदरार्थी शब्द ‘तपाईं’, ‘हजुर’ प्रयोग नगरेको भन्दै प्रधानमन्त्री केपी शर्मा ओलीले पत्रकारहरूले मर्यादापालन नगरेको टिप्पणी गर्नु राम्रो होइन  । ‘सानालाई तिमी र ठूलालाई तपाईं’ भन्ने नेपाली समाजको प्रचलन भएको जिकिर गरिरहँदा लाग्छ, प्रधानमन्त्रीले आफूलाई सम्मान नपुगेको आकांक्षा पो गरेका हुन् कि ? सञ्चार माध्यम सबैका लागि बराबर हो  ।

सञ्चर माध्यमले सबैलाई समान आदरार्थी शब्द प्रयोग गर्दैमा प्रधानमन्त्री आक्रोश बन्नु राम्रो भएन । यतिका वर्षसम्म मिडियाले प्रयोग गरिरहेका शब्दप्रति एक्कासि प्रधानमन्त्री ओलीले किन आलोचना गरे ? स्वतन्त्र मिडियाप्रति विवादास्पद कुरामा नअलमलिएर देश र जनताको विकासको लागि अगाडि बढ्नुहोस्, प्रधानमन्त्रीज्यू ।
अंग्रेजीको ‘यु’ लाई सिको गरेर नेपाली मिडियाले ‘तिमी’ शब्द प्रयोग गरेको पक्कै होइन होला । प्रधानमन्त्री ओलीले भनेजस्तो कला, साहित्य र भाषाको जगेर्ना गर्ने उद्देश्य त नेपाली सञ्चार माध्यमले सधैं लिइरहेकै हुन्छन् ।
– नवीन देवकोटा, पञ्चदेवल विनायक–२, अछाम

धेरै पटक धेरै ठाउँमा उपस्थित हुँदा वा बोल्दा प्रधानमन्त्री ओलीले नेपाली भाषाको स्तर खस्किएको गुनासो गरेको सुनिन्छ । मेरो उहाँलाई प्रश्न छ– सम्पन्न र गहन इतिहास बोकेको हाम्रो गौरव नेपाली भाषा यसरी खस्कँदै जानुका कारण उहाँले खोज्नुभएको छ ? आज हरेक विद्यालयमा तोते बोली पनि फुटाउन नभ्याएका नानीहरूलाई विदेशी सभ्यता अनि भाषा सिकाउने र डाक्टर, इञ्जिनियर बनाउने नाममा अंग्रेजी घोकाउने शिक्षा लाद्न थालेका कारण नेपाली भाषा बिग्रिएको हो । प्रधानमन्त्री ओलीले यो कुरा बेलैमा बुझ्न र अनावश्यक अंग्रेजी भाषाप्रतिको मोहलाई भंग गर्ने वातावरण बनाउँदै आफ्नै भाषा विकासको कार्यक्रम ल्याउन आवश्यक छ । अन्यथा उनले चिन्ता गरेर मात्र हुन्न । विद्यालयहरूमा यही किसिमको पठन–पाठन शैली चल्दै जाने हो भने आम नेपालीले सजिलैसँग आफ्नो भाषामा बोल्न नजान्ने अनि भाषा नै लोप हुने दिन नआउला भन्न सकिन्न । आमा, बा/बाबा, काका, काकी, दिदी, बहिनी, मामाहरू सकिएर ममी, ड्याडी, अंकल, आन्टी, ब्रदर, सिस्टरहरू उदाउन थालेको परिवेशमा नेपाली भाषाको क्षयीकरण द्रुतगतिमा भइरहेको छ ।
– कृष्ण कुम्पुरे, आदमटार, धादिङ

प्रकाशित : कार्तिक १, २०७६ ११:४१
प्रतिक्रिया
पठाउनुहोस्

समस्या समाधानमा विलम्ब

कान्तिपुर संवाददाता

मंगलबार प्रकाशित भूमि अधिकारकर्मी जगत देउजाको लेखले गुठी र मोही समस्याबारे राम्ररी केलाएको छ  । गुठीको सवाल लामो समयदेखि समस्याको रूपमा रहिआएको छ  ।

गुठीको कारण हजारौं किसान समस्यामा छन् । उनीहरू भूमिहीन सरह छन्, प्रमाणविहीन छन् । यद्यपि हजारौंको घरघडेरी र जीविकासमेत त्यही जग्गाबाटै चलिरहेको छ । गुठी पनि विभिन्न प्रकारका छन्, जसको ठाउँ, परिवेश र भूगोल अनुसार फरक–फरक समस्या भएकाले गहिराइमा पुगेर सरकारले समाधानको पहल गर्नुपर्छ । यसअघि सरकारले ल्याएको विधेयक फिर्ता भयो । त्यो विधेयकले किसानको समस्याचाहिँ समाधान हुन्छ भन्ने आशा गरिएको थियो । लेखकले भनेजस्तै विधयेक फिर्ता भएको पनि धेरै भइसक्यो, यो विषय त्यसै सेलाउँदै गएको छ । धर्म, संस्कृतिलाई पनि जगेर्ना गर्ने, परम्परालाई पनि मर्न नदिने र किसानको छोराछोरीको पेट पनि भोको हुन नदिने र सबैलाई न्याय हुनेगरी सबै तहमा छलफल गरी पुनः गुठी समस्या समाधान गर्नेगरी सरकार अघि बढ्नु आवश्यक छ । यस विषयमा अझ बढी सरोकारवालाहरूको ध्यान जानु आवश्यक छ । यो समस्यालाई पालेर राख्ने होइन, समाधान गर्नेतर्फ ध्यान जाओस् ।
– विश्वास नेपाली, कालिका–३, रसुवा

प्रकाशित : कार्तिक १, २०७६ ११:४०
पूरा पढ्नुहोस्
प्रतिक्रिया
पठाउनुहोस्
×