सडक मर्मतमा ढिलासुस्ती

कान्तिपुर संवाददाता

दसैं–तिहार आउन केही सातामात्र बाँकी छ  । तर सडकको दुरवस्थाका कारण चाडपर्व मनाउन घर जाने लाखौंले यसपाली पनि सास्ती खेप्नु पर्नेछ  ।

राजधानी भित्रिने र बाहिरिने जति पनि नाकाहरू छन्, ती सबैको अवस्था दयनीय छ । देशकै सबैभन्दा सवारी चाप बढी हुने मुख्य नाका नाकढुंगा–नौबिसे सडक खण्डको अवस्था सम्झँदा जीउ नै सिरिङ्ग हुन्छ । यो सडक खण्डको दुरवस्थाको कारण लाखौं यात्रुले सास्ती पाउने र समयमा गन्तव्यमा नपुग्ने सम्भावना छ । साथै यात्रुहरू कहाँनिर र कतिखेर दुर्घनामा पर्ने हुन्, ठेगान छैन । सडकमा हुने सवारी चाप, सडक जामको समस्या, अस्वस्थ पतिस्पर्धा, तीव्र गति र सडकको दुरवस्थाकै कारण अकल्पनीय दुर्घटना र अपूरणीय क्षति नहोला भन्न सकिन्न । हुन त अहिले नौबिसे–नाकढुंगा अन्तर्गत पर्ने सडक खण्डको मर्मत कार्य भइरहेको छ, जहाँ २ दिनअघि मर्मत गरेको सडक २ दिनपछि नै भत्किसकेको देख्न सकिन्छ । राज्यको लगानी बालुवामा पानी भएको छ । त्यहाँ न काममा तीव्रता छ, न गुणस्तर । सम्बन्धित निकायहरूले हाल भइरहेको कामको प्रभावकारी मूल्यांकन र अनुगमन गरी तीव्रतासाथ टिकाउ हुनेगरी सडक मर्मतको काम २ साता भित्रमा सकिनेगरी उपलब्ध स्रोत र साधनको सही परिचालन गरोस् । जसले गर्दा हरेक नेपालीले सुरक्षित गन्तव्यमा पुगेर आफ्नो परिवारजन र आफन्तसँग चाडपर्व मनाउन पाउन् ।
– सानु गिरी, सिद्धलेक–७, धादिङ

प्रकाशित : आश्विन १, २०७६ १२:१५
प्रतिक्रिया
पठाउनुहोस्

मेडिकल शिक्षामा बेथिति

कान्तिपुर संवाददाता

२० दिनदेखि बन्द रहेको चितवन मेडिकल कलेज तथा देशकै मेडिकल शिक्षामा देखिएको बेथिति शीघ्र समाधान हुनुपर्छ  ।

पढाइको समयमा आन्दोलनमा उत्रन बाध्य हुनु तथा २० दिन बितिसक्दा पनि राज्यले किन ध्यान नदिएको ? मेडिकल माफिया र राजनीतिको जरो निकै मजबूत छ । आफ्नो हकहितका लागि चितवन मेडिकल कलेजका छात्रछात्राले गरेको आन्दोलन विरुद्ध नागरिक समाजले पनि आफ्नो भूमिका पहिचान गरी राजनीतिक आरक्षणमा रहेको मेडिकल माफिया विरुद्ध आवाज उठाई विद्यार्थीहरूको अमूल्य समय खेर नजाओस् भनी सरकारलाई सतर्क गराउनु आवश्यक छ । समयमै सबैले सरकारलाई सचेत नगराउने हो भने मेडिकल क्षेत्रमा पूरै माफियाको रजाइँ हुनेछ ।
– राजीवकुमार सिंह, जनकपुर–१, धनुषा

प्रकाशित : आश्विन १, २०७६ १२:१५
पूरा पढ्नुहोस्
प्रतिक्रिया
पठाउनुहोस्