चीनबाट अपेक्षा

उनको नेपाल भ्रमण उपलब्धिमूलक बनोस् भन्ने हरेक नेपाली चाहन्छन् । नेपाल सरकारले ‘बेल्ट एन्ड रोड इनिसिएटिभ’ अन्तर्गत यसअघि तय भएका ९ परियोजनालाई नै अघि सार्ने बताइँदैछ । चीनलाई मनाएर ती परियोजनालाई गति दिनसके नेपालका लागि ठूलो उपलब्धि हुनेछ । यिनै परियोजनाभित्र केरुङ–काठमाडौं रेल, सडक सञ्जाल र ठूला जलविद्युत योजनाहरू परेका छन् । जुन राम्रा छन्, तर काम भने आजसम्म सिन्को भाँचेको अनुभूत गर्न पाइएको छैन । जसलाई यो वार्ताले गति देला भन्ने अपेक्षा गरिएको छ । कुनै पनि योजना, परियोजना केवल कागजमा सीमित भए त्यसले कुनै प्रतिफल दिँदैन । त्यसका लागि कार्यान्वयन तहमा जानैपर्छ । तर चीनले बनाइदिने भनिएका ९ परियोजना अहिलेसम्म कागजमै सीमित भएको हुँदा चीन पनि केवल आश्वासनकै भरमा नेपाललाई थमथमाइराख्न चाहन्छ कि भन्ने शंका उब्जेको छ ।
भारतले २०७२ मा नेपालमाथि अनाहकमा नाकाबन्दी गरेपछि नेपालीहरूले चीनलाई निकै सम्झना गरे । नेताहरूले चीनबाट रेल र तेल जसरी भए पनि ल्याइछाड्ने भाषण गरे । तर जसै नाकाबन्दी खत्तम भयो, नेपालका नेताहरूले ती सबै कुरा बिर्से । उनीहरूले भोलि पनि कुनै दिन भारतले नाकाबन्दी गर्न सक्छ भन्ने दीर्घसोच राखी काम गर्न सकेनन् । जुन आवश्यक थियो । किनकि भारतले नेपाललाई एकपटक होइन ३/३ पटक नाकाबन्दी गरिसकेको छ । यो देख्दादेख्दै पनि नेताहरू चीनबाट रेल र तेल ल्याउन, फराकिला सडकहरू बनाउन र कम्तीमा ६ महिनासम्म पुग्ने इन्धन भण्डारण क्षमता बढाउन नलाग्नु उदेकलाग्दो पक्ष हो ।
– गोपाल देवकोटा, गौरीघाट, काठमाडौं