प्रदेशको नाम र राजधानी

यसअघि सम्पन्न तीनै तहको निर्वाचनमा नेकपाले दुई तिहाइ मत प्राप्त गरेको छ । राजमार्गसँग उसको मोह ठिकै होला तर मधेसमा त्यो चल्दैन । अब उसले महेन्द्रीय विचारधारा छाड्नु उपयुक्त हुन्छ । नयाँ नेपालको निर्माण तथा मधेस उत्थानमा लाग्नुपर्छ । नलागे एक खर्बको सट्टा बढी खर्बको चामल निर्यात गर्नुपर्ने अवस्था पनि नआउला भन्न सकिँदैन । राजधानी जनकपुर नै हुनुपर्छ । वीरगन्ज त मुलुकभरिको आर्थिक राजधानी छँदै छ । प्रदेशको नाम राख्नेबारे भने म लेखकको विचारसँग सहमत छैन । मिथिला शब्द वैदिक हो र त्यसलाई कसैले मेटाउन सक्दैन तर मधेस शब्द मेटाउन सबै लागेका छन् किनभने यही नामले आन्दोलन भएको थियो । यस नामसँग पहाडी राजनीतिज्ञहरूलाई रिस छ र सुन्न पनि चाहँदैनन् । प्रदेशको नाम मध्यमधेस नै उपयुक्त हुन्छ ।
–डा. शिवशंकर यादव, छपकैया, वीरगन्ज